مصر بدأت تعاني خلال الشهور الأخيرة من أزمة نقص العملة التي كانت سبب رئيسي في ارتفاع أسعار معظم السلع بشكل كبير جدا، وهذا أدى لإنتشار تجار العملة والسوق السوداء بشكل كبير جدا.
عشان كده الجهات الأمنية كثفت جهودها وقدرت خلال الساعات الأخيرة أنها تقبض على عدد من تجار العملة كانوا سبب من أسباب الأزمة في مصر، لكن يا ترى إزاي كانوا سبب في أزمة العملة؟ وأتقبض عليهم إزاي؟ وأسعار الدولار وصلت إنهاردة لكام؟
خلال الشهور الأخيرة مصر عانت من أزمة نقص العملة الأزمة دي كانت سبب في انتشار السوق السودا للدولار بشكل كبير جدا، عشان كده الجهات الأمنية كثفت جهودها عشان تقضي على تجار السوق السودا
وبالفعل رجال أمن القاهرة قدروا خلال الساعات الأخيرة، من ضبط 3 أشخاص في القطامية بتهمة الإتجار الغير مشروع في النقد الأجنبي
لكن أتقبض عليهم إزاي؟
أنا أقولك، حسب موقع صدى البلد، الحكاية بدأت لما الأجهزة الأمنية قبضت على شخص من محافظة سوهاج وقت ركوبه عربية قرب قسم شرطة القطامية وهو معاه 9 مليون جنيه وساعتها شكوا فيه
وتم القبض عليه بعدها أعترف بمزاولته نشاط غير قانوني في مجال الإتجار بالنقد الأجنبي خارج نطاق السوق المصرفي وده من خلال التحويلات النقدية من وإلى داخل البلد للدول التانية، بالإشتراك مع شخص مقيم في قنا و 2 مقيمين في بعض الدول بره مصر
المتهم قال كمان إن الشخصين المقيمين في الدول بيجمعوا العملات الأجنبية وبيحجبوا دخولها للبلد وبيسلموا لأصحابها اللي بيساويهم بالعملة المحلية جوا البلد عن طريقه هو والمتهم التاني
أما بالنسبة للمبلغ اللي كان معاه، فهو قال أنه حصيلة نشاطه من تجارة العملة وأنه كان رايح يسلمها لشريكه
وعلى فكرة شريكه اللي في قنا تم إستهدافه والقبض عليه هو وشخص تاني كان معاه ومعاهم مبلغ مالي من نشاطهم في تجارة العملة وعلى طول تم إتخاذ الإجراءات القانونية ضدهم
أنت لازم تعرف أنها مكنتش دي العملية الأولى للأجهزة الأمنية في القبض على تجار العملة، وده لأن من شهور تم القبض على شخصين بتهمة الإتجار في النقد الأجنبي، لكن إيه حكايتهم وإزاي تم القبض عليهم؟
أنا أقولك، حسب موقع مصراوي، الأجهزة الأمنية قبضت على شخصين خلال شهر إبريل اللي فات بدايرة قسم أول الشيخ زايد وهما راكبين عربية ومعاهم مبالغ مالية
وبمواجهة المتهمين أعترفوا إن المبالغ المالية اللي معاهم كانت بغرض الإتجار الغير المشروع بالعملة الأجنبية
وخلال التحقيقات كشفوا عن مصدر تحصليهم للعملات وقالوا إنهم اتخصصوا في الإتجار بالنقد الأجنبي خارج القطاع المصرفي بالإشتراك مع شخص مقيم في مدينة نصر
ومع الوقت تم إستهداف المتهم التالت والقبض عليه وهو معاه مبالغ مالية من العملات المحلية والأجنبية بالإضافة لهاتف محمول اللي بفحصه أكتشفوا محادثات بتدل على ممارسته للنشاط، وبمواجهته أعترف وتم إتخاذ الإجراءات القانونية ضده
لكن السؤال هنا: هو الدولار وصل لكام؟
حسب بوابة الفجر، بعد أخبار استبعاد تعويم الجنيه الدولار في السوق السودا انخفض شكل ملحوظ ووصل لـ 38 و 39 جنيه بعد ما وصل في يوم من الأيام لـ 42 جنيه
أما بقى بالنسبة لسعر الدولار في البنوك فهو مستقر من فترة ودلوقتي سجل 30 جنيه و 95 قرش
ودلوقتي قولنا شايف إن السوق السودا ممكن تنتهي في يوم من الأيام؟
