مريم عبد الرحمن شوقى، وهى الاسم الأكتر انتشاراً الان على السوشيال ميديا بعد إعلان والدها اختفائها المفاجئ، الكل بيبحث عليها، لمعرفة أين هي وكيف اختفت؟
والدها في حالة صعبة جدا، وحالته النفسية كل يوم عن يوم بتسوء، عنده إبن من ذوي الهمم الله يباركله فيه ويقدره عليه، ودلوقتي بقى عنده بنت مفقودة نتمنى ترجعله.
مريم فين؟ وإيه اللى حصلها؟ .. كلها أسئلة محتاجة لإجابات هنحاول نعرفها مع بعض في الفيديو ده.
في البداية كده وقبل ماندخل فى صلب الموضوع، الفيديو ده فيديو إنسانى بحت، بنحاول على قد مانقدر نؤدي دورنا الإنساني والإعلامي وأن نساعد فى ان بنت متخفيه توصل لأهلها اللي قالبين الدنيا عليها، وأنتم كمان مطلوب منكم تساعدوا في رجوع البنت دى لأهلها، على الأقل شيرو الفيديو ده على صفحاتكم وعرفوا الناس بقصتها.
من يومين بالظبط، نشر الأب اللى إسمه عبد الرحمن صورة لابنته الكبيرة على حد علمنا، وكتب على الصورة دى كلام حزين جدا عن بنته ضناه اللي فجأة اختفت منه مرة واحدة، لايعرف هي فين ولا ايه اللى بيحصلها.
على حسب كلامه بنته اختفت من يوم الثلاثاء اللى فات، كانت رايحه لدروسها الجامعية في العباسية وفجأة لاحس ولاخبر ليها، الأب هيتجنن عمل كل اللى يقدر عليه عشان يعرف البنت فين، كل أصحابها وأهل أصحابها حتى راح لمكان دروسها يسأل يمكن حد يدله، بس للأسف مفيش أي حد رد عليه بنتيجة أو على الأقل اداله معلومة تنورة فين بنته.
الأب لما تقطعت به السبل تماما كتب الرساله دى على الفيس بوك في محاولة أن الناس تساعده وتدور معاه على بنته، ها ننقلكم الرسالة بالنص عشان تعرفوا كم الألم والحزن اللى فيه الأب، بيقول:” أحبتي في الله سامحوني اني اشغلكم في الشهر الكريم واثقالكم بالهموم ولكن لقد تقطعت بس السبل وطرقت جميع الأبواب إلا بابكم الكريم لقد اختفت ابنتي وفلذة كبدي من يوم الثلاثاء الماضي الساعة 8.30 صباحا اثناء ذهابها لدروس جامعتها في العباسية، ومنذ ذلك الحين وابنتي لا اعلم عنها اي شيئ استحلفكم بالله واستجدي حضراتكم بدموع اب انقطعت به السبل الا باب الله الكريم ارجوكم ساعدوني من يعرف شيئ عن بنتي او يستطيع مساعدتي بأي طريقة ستكون مساعدته لي جميل اطوق بة عنقي ليوم الدين اختكم او بنتكم مريم في كرب فارجوكم ساعدوني”.
دى كانت رسالة الأب نقلناها لحضراتكم زى ماهوا كتبها بالظبط ونتمنى منكم مساعدته حتى ولو بالدعاء أنه يلاقى بنته، وللعلم الأب ده عظيم جدا، على حسب ماهو متداول على السوشيال ميديا فا الراجل ده بيمر بظروف تانى صعب جدا عليه، وهوا أنه عنده كمان طفل من ذوي الهمم بيربيه ويرعاه كويس جداً، كان الله فى عون الأب، ربنا يصبره على اللى هوا فيه ويقويه و يربي إبنه كويس ويلاقي بنته فلذة كبده.
إحنا كده عملنا دورنا اللى مفروض علينا ونشرنا قصته واستغاثته علشان الكل يشوفها ويمكن حد منكم يعرف أو يلاقيها ويساعد انه يوصل ليها، ودلوقتي حان دوركم أنتم كمان تساعدوا يا إما بالدعاء له أنه يلاقي بنته، أو نشر الفيديو ده وعمل شير يمكن حد من صحابكم أو حبايبكم يلاقيها ويقوله عليها.
