كل هذه أموال، الواحد لو اشتري بها كوكب الأرض بسياراته وبحوره ومحيطاته والفلل التي عليه لن تنتهي تلك الأموال!!!
هذا ما قاله اعلامي شهير عن قيمة صفقة انتقال ميسي لنادي الهلال السعودي، وانت برضه لما تسمع الرقم ممكن تقول نفس الكلام لان السعر خيالي واحتمال يزيد أكتر، ده 57 مليون جنيه في اليوم
يوم ورا التاني بتكتر الاخبار عن انتقال الفائز بخايزك افضل لاعب في العالم ميسي إلى الدوري السعودي وخاصة نادي الهلال، بس السر كله في قيمة العقد..
بعد الجرايد الاسبانيه اتكلمت عن ان العقد هيوصل ل 400 مليون يورو، عشان كده الإعلامي الرياضي ابراهيم فايق مكنش مصدق نفسه وقعد يحسبها يعني ايه 400 مليون يورو، واللي قاله كان مفاجأة!
: كده ميسي هيقبض في اليوم 57 مليون جنيه، والساعه الواحدة ب 3 مليون جنيه، ده لو دخل ينام فهو بيعمل فلوس من الهوا
عشان كده استغرب ابراهيم فايق وقال ايه اللي ممكن حد يشتريه ب 400 مليون يورو؟ هيشتري كوكب الارض بعربياته بفلله وكل اللي عليه؟!
بس المفاجأة الأكبر بقى، إن في صحف فرنسية، حسب موقع كورة بلس، اتكلمت عن قيمة أكبر لعقد انتقال ميسي، انت متخيل انهم بيتكلموا عن 500 مليون يورو وممكن يوصلوا ل600 مليون يورو في كل سنة؟!
وطبعا اي حد يسمع الأرقام دي لازم يفكر في سؤال واحد: ياترى واحد زي ميسي جمع فلوس من الكورة قد إيه؟
ميسي ياسيدي وحسب مجلة بيزنس انسايدر، جمع من اول ظهوره لغاية دلوقتي اكتر من مليار دولار، بس صافي ثروته 600 مليون دولار.
وعشان يضمن مستقبله بعد الاعتزال ويخلي الفلوس تجيب فلوس: استثمر ثروته في العقارات والفنادق، وعشان كده عنده مجموعة بيوت في أسبانيا والارجنتين وامريكا، وأشهرهم قصره في برشلونة بتكلفة 8 مليون دولار.
وده غير سلسلة MIM للفنادق المملوكة واللي بتضم عدد من المنتجعات في مدن مختلفة.
تعال بقى شوف إزاي بيقضي مشاويره وسفرياته.. هتندهش، أسطورة برشلونه عنده طيارة خاصة تمنها اكتر من 15 مليون دولار، وعلى ديل الطيارة مكتوب 10 رقمه في فريق برشلونة، وعلى سلم الطيارة مكتوب اسم مراته وعياله.
وياريت الحكاية خلصت لغاية هنا، ميسي عنده هوس بالسيارات الفخمة والغريبة، لدرجة انه يمتلك اسطول سيارات فيه 20 إلى 30 عربية من أغلب الماركات العالمية زي تويوتا وأودى ورنج روفر وكاديلاك وفيراري مرسيدس بإجمالي 45 مليون يورو.
بس في عربيتين هما الاشهر من غيرهم باجاني زوندا رودستار، ودي ممنوع قيادتها في الشوارع اصلا بسبب امكانيتها الجبارة، وموجود منها 40 نسخة في العالم كله.
والعربية التانية فيراري 335 إس سبايدر سكاليتي، ودي الأغلى في اسطول سيارات ميسي : سعرها 34 مليون يورو، وهي تاني أغلى سيارة في العالم.
انت بقى شايف ال400 مليون رقم خيالي، ولا النادي السعودي كسبان؟
