احتفالات مانشتر سيتي بعد الفوز بدوري أبطال أوروبا مبتنتهيش، وخصوصا إن ده اللقب الغالي اللي كانوا بيسعوا لتحقيقه من سنين طويلة رغم حسمهم لبطولات كتير ولكن اللقب ده كان الأغلى على الإطلاق، وشوفنا ماتش النهائي مع نادي إنتر ميلان الإيطالي واللي انتهى بفوز السيتي، بعد ماتش قوي وحماسي، وخلال الاحتفالات دي وقبلها ظهر بقى طفل صغير عسل كدة قلب السوشيال ميديا وهو روني فيل فودين.
خلاص الحكابة انتهت وبيب جوارديولا حسم الثلاثية التاريخية وهي دوري أبطال أوروبا والدوري الإنجليزي وكاس الاتحاد الإنجليزي، عشان يأكد على اسمه كواحد من عمالقة التاريخ في تدريب كورة القدم، واحتفالات السيتي من وقتها موقفتش.
في وسط الاحتفالات ظهل الطفل روني فيل فودين، ابن لاعب ونجم الفريق، واللي قدر يلفت الأنظار ليه وينال إعجاب الجمهور للشبه الكبير بينه وبينه باباه، وكمان بسبب خفة دمه والطريقة اللطيفة اللي بيظهر بيها والرقصات والحاجات اللي بيقدمها قدام الشاشات.
روني اللي عمره 4 سنوات، ظهر في أكتر من لقطة سواء داخل مركز التدريب مع لاعيبة السيتي، أو حتى بعد نهاية الماتشات سواء في غرف خلع الملابس أو في الملعب، وبقى ليه معجبين وصفحات وجروبات باسمه، لدرجة إن البعض اعتبره هو نجم الاحتفالات دي.
روني فيل فودين كان ليه أكتر من لقطة خصوصا مع إرلينج هالاند نجم السيتي، مرة منهم في غرفة خلع الملابس لما كان هالاند بيتصور وهو وقف وراه في الصورة وطلع لسانه واتصور معاه، ومرة كمان في الملعب أثناء الاحتفالات، ظهر روني وهو بيكلم هالاند وبيقوله «كنت فاكرك بنت».
روني كمان ظهر مع جاك جريلش في غرفة الملابس وهو بيعمله تدليك وبيركبله ضمادات طبية وكأنه بيعالجه بشكل لطيف جدا وعجب الجمهور، إلى جانب تواجده بشكل دائم في احتفالات الفريق وداخل الباص حتى وبيظهر وه وبيرقص أو بيقول تعليقات مضحكة.
روني من الأطفال اللي عندهم قبول كبير وخفة ظل طبيعية، والده فيل فودين بيقول إن حلمه إن روني ينضم في يوم من الأيام لمدرسة مانشتر سيتي لكرة القدم، ويكمل مسيرته.
كمان لاعيبة مانشتر سيتي بيحبوه جدا وبيحبوا يلعبوا معاه وده بيظهر في لقطات وفيديوهات كتير، خصوصا إنه واخد عليهم وهما متعودين عليه وهو بيتعامل بشكل طبيعي ومريح معاهم.
روني اتولد سنة 2019 ومامته هي صديق فيل فودين، ريبيكا كوك، ومن وقتها بقى وهو عايش على حب فريق مانشتر سيتي زي والده اللي بدأ حياته الرياضية في السيتي ومازال مستمر معاهم لحد دلوقتي.
فيل فودين حصل على الكرة الذهبية في كاس العالم للشباب 2017، ومن أهم اللاعبين الصاعدين في إنجلترا، ومن أهم العناصر اللي بيعتمد عليها بيب جوارديولا، وكان أصغر لاعب يفوز مع فريقه بالدوري الإنجليزي.
مسيرة فيل فودين من الواضح إنها هتشهد قفزات ونجاحات كبيرة، خصوصا إنه في عمر صغير قد يحقق عدد كبير من البطولات مع فريقه.
وفوق النجاحات الكبيرة اللي بيحققها الأب كلاعب كرة قدم، بيظهرلنا الابن كمان عشان يرفع من اسم والده، ويخليه طول الوقت اسمه موجود بين المعجبين في كل مكان في العالم واللي بيحبوا يتابعوا فيديوهاته واللقطات الطريفة اللي بيعملها دي.
بالتأكيد لو تمكن روني من إن هو يكون لاعب كورة كويس في فريق السيتي هيكون من بين أشهر اللاعبين في العالم، لأانه مرعزف كطفل فأكيد هيكون نجم كبير وهو لاعب.
