أخبار الاقتصاد

سر تأخر البنوك في طرح شهادات الـ 20% وهل ستُطرح أم لا؟

الكل ينتظر طرح شهادات ال20% في البنوك، بعد قرار البنك المركزي برفع أسعار الفائدة بنسبة 3% والكل يترقب هذا القرار من البنوك، فعهل ستطرحها البنوك حقا، أم نبحث عن حل آخر، ولماذا تأخرت البنوك في طرح تلك الشهادات؟ أم أنهم لم يقوموا بطرحها من الساس؟ كل هذا سنتعرف عليه من خلال التالي:

بعد رفع البنك المركزي لسعر الفايدة بنسبة 3 % مرة واحدة، خرجت توقعات كتير بإصدار البنوك وخاصة الحكومية شهادات ادخار بعائد مرتفع 20% أو اكتر كمان، وطبعا ده عشان يقدم عائد حقيقي للعملا مع وصول معدلات التضخم إلى 21%.

ومع حالة الترقب والانتظار من كل عملاء البنوك والناس اللي عاوزة تربط شهادة بفلوسها بس مستنية طرح شهادات ال 20% ، هشام عكاشة رئيس مجلس إدارة البنك الأهلي طلع ينفي صحة التوقعات دي تماما.

عكاشة قال إن لا البنك الاهلي ولا حتى بنك مصر عندهم نية اصلا في طرح شهادات بفائدة 20٪ الفترة الجاية.

طيب هل ممكن البنوك الخاصة هي اللي تطرح الشهادات دي؟
صعب جدا ده يحصل، لأن البنك الأهلي وبنك مصر هم أكبر بنكين في مصر، ولو لاحظت على مدار الفترة اللي فاتت اي شهادة بفايدة عالية كانت بتطلع من عندهم الأول، وبعدها باقي البنوك بتحاول تلحقهم.

وفي الحالة دي بقى مفيش حل غير انك تختار من الشهادة الموجودة دلوقتي، وخلينا كده مع بعض نشوف ايه البنوك اللي بتدي أعلى عائد.وأولهم المصرف المتحد، اللي بيقدم شهادة ثلاثية العائد عليها بيختلف حسب دورية الصرف.

يعني هيبقى 16.25% لدورية صرف العائد الشهرية، و16.5% لدورية صرف العائد ربع السنوية، و17% لدورية صرف العائد السنوية، و18% سنويا مع الصرف في نهاية المدة، يعني مش هتاخد العائد الا بعد انتهاء ال3 سنين.

كمان موجودة الشهادة البلاتينة في البنك الأهلي وشهادة القمة في بنك مصر، وشهادة بريمو جولد في بنك القاهرة، ال3 شهادات دول مدتهم 3 سنوات، وتقدر تشتريهم بداية من ألف جنيه.

و العائد عليهم متاح بنسب مختلفة: 17.25% لدورية الصرف السنوية، أو 16% لو هتصرف العائد كل شهر، و 16.25% العائد الربع السنوي، أو 16.50% للعائد النصف سنوي.

وبرضه بنك ناصر الاجتماعي، رفع الفايدة على الشهادة أجل 3 سنوات المخصصة لكبار السن من سن 60 عاما فأعلى، عشان توصل الى 17.5% سنويا بدلا من 15.25%، وبيتم صرف العائد سنويا.

وكمان رفع سعر عائد الشهادة الادخارية أجل 3 سنوات ذات العائد السنوي المتاحة لكافة العملاء لتصل 17.25% بدلا من 15%.

والبنك التجاري الدولي CIB ، بيقدم 3 شهادات ادخار، تقدر تصرفهم شهريا، الاولى شهادة PRIME، ودي فايدتها 14%
وشهادة plus، فايدتها 14.5%، وكمان شهادة Premium، وفايدتها اعلى بتوصل لـ 15%

لكن البنك العربي الافريقي الدولي، فبيقدم شهادة “أميرالد” الثلاثية بعوائد مختلفة، يعني لو صرفتها شهريا هتاخد فايدة 16%

ولو صرفتها ربع سنويا، هتبقى فايدتها 16.25% ، او 16.5% لو اتصرفت نصف سنوي، واخيرا 17.25 لو صرفتها كل سنة.

انتوا بقي هتعملوا إيه بعد ماسمعتوا كلام رئيس البنك الأهلي، هتشتروا الشهادات الموجودة حاليا، ولا بتفكروا في استثمار تاني؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى