أخبار الاقتصاد

بعد تثبيت سعر الفائدة..مفاجأة بشأن مصير الشهادات في البنوك

الناس كلها كانت تريد أن تعرف قرار البنك المركزي في اجتماعه الأخير وهذا بسبب تخوفهم منأي زيادات في الأسعار، ولكي يعرفوا ما هو مصير شهادات الادخار وهل سيتم طرح شهادات جديدة؟

لكن تفتكروا بعد قرار البنك المركزي بتثبيت سعر الفايدة البنوك هتعدل سعر الفايدة على شهادات الإدخار؟ وياترى إيه مصير الناس اللي اشتروا شهادات بالفعل؟، وهل القرار ده في مصلحتهم ولا لأ؟

بعد ما البنك المركزي قرر تثبيت سعر الفايدة عند 18.25% للإيداع و 19.25% للإقراض خلال اجتماع شهر مايو، وكمان تم الإبقاء على سعر الائتمان والخصم عند مستوى 18.75%.

تفتكروا ده هيخلي البنوك تعيد ترتيب حساباتها بالنسبة للفايدة على الشهادات؟

حسب مسؤولين في بنكين اتكلموا مع موقع مصراوي فـ قرار البنك المركزي بتثبيت سعر الفائدة في اجتماعه الأخير هيخلي البنوك تعيد النظر في سعر الفائدة على الشهادات اللي عندها وده بناء على اجتماع لجنة “الكو” ولو مسمعتش الأسم ده قبل كده فـ دي ياسيدي اللجنة المسؤولة عن الفائدة في كل بنك

وقالوا إنه كمان تثبيت المركزي للفائدة هيساهم في إن البنوك تاخد زي ما بيقولوا نفسها شوية وتقليل وتيرة المنافسة على رفع سعر الفائدة على الشهادات بين البنوك.

وعشان كده رئيس قطاع الخزانة في أحد البنوك الخاصة ، قال في تصريحات لمصراوي إن البنوك هتعمل مجموعة اجتماعات خلال الأسبوع الجاي وده عشان تعيد دراسة أسعار الفائدة على كل أوعية الادخار وده بعد قرار البنك المركزي وتحركات البنوك المنافسة

قال كمان إنه متوقع إن البنوك تلجأ لـ وقف الشهادات مرتفعة العائد عندها خاصة بعد تحقيق الهدف منها وهو جذب سيولة من السوق، والاحتفاظ بمدخرات العملاء ولكن مع تثبيت المركزي للفائدة هيخلي البنوك تبدأ تعيد حسابتها

كيف تتأثر البنوك برفع الفائدة؟

لو انتوا فاكرين فـ بعد قرارات البنك المركزي برفع الفايدة بتبدأ البنوك تتسابق على إنها تصدر شهادات بفايدة كبيرة وكل بنك بيحاول يفوز بـ أكبر قدر من العملا عشان يجذبوا ليهم خصوصًا إن البنوك الحكومية الفترة اللي فاتت أصدرت شهادات بفايدة عالية زي البنك الأهلي وبنك مصر

وعشان كده باقي البنوك اللي شغاله في السوق بدأت هي كمان تنزل شهادات بفايدة عالية وده أكيد بيأثر على ربحية كل بنك وبيحطهم تحت ضغط المنافسة.

وده لأنه لأول مرة تنافس البنوك الخاصة البنوك الحكومية على طرح شهادات مرتفعة العائد آجال 3 سنوات للعائد الثابت على الجنيه المصري بسعر فائدة وصل لـ 19% و20% سنويا وده طبعا بهدف الحفاظ على عملائها

وحسب تقرير نشره موقع مصراوي فـ البنك المركزي كان متوافق مع أغلب توقعات الخبراء واللي كانوا شايفين إنه هيثبت الفايدة

وفعلا قرر تثبيت سعر الفائدة في ثالث اجتماع للجنة السياسة النقدية الخميس اللي فات وده بعد تراجع وتيرة التضخم وده لأن زيادة الأسعار بدأت تقل .

وفي حالة لو انت اشتريت شهادة وقلقان من اللي هيحصل فـ المصادر أكدت إن تعديل أي بنك لـ سعر الفائدة على الشهادات للعائد الثابت مش بيتأثر بيه العملاء الموجودين بالفعل ولكن بيتم تطبيقها على العملاء الجدد بس

أما بقى لو مستنى يتم طرح شهادات جديدة بعد قرار المركزي فـ حسب تصريحات الدكتور علي الإدريسي لـ المصري اليوم فـ مستبعد جدا إن البنوك تطرح شهادات ادخار جديدة بفايدة أعلى وده لأن الشهادات المطروحة دلوقتي بتقدم فايدة كويسة وقدرت فعلا تحتوي السيولة اللي موجودة في السوق.

دلوقتي قولنا رأيك في قرار البنك المركزي ؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى