“دلوقتي هتقدر تسافر بتأشيرة حج مباشر لجدة و السعودية بأقل التكاليف وبإجراءات بسيطة جدا كل اللي عليك تروح الرياض واحنا هنسفرك لجدة!” هل عرض عليك هذا الكلام وما دي صحته؟
وإيه حكاية إعلانات الحج المنتشرة على الفيسبوك؟ وإزاي تتاكد أنهم نصابين ولا لا؟ وهل ممكن أحج بتأشيرة زيارة؟ وموسم الحج هيبدأ أمتى؟ ويعني ايه حج فرادى؟
ناس كتير بتحلم زيارة بيت الله الحرام لكن مع ارتفاع الأسعار وصعوبة الإجراءات ده خلى الحلم بعيد، عشان كده ناس كتير بدأت تفكر ازاي ممكن يقدروا يحجوا بأقل تكاليف وأسهل الإجراءات.
وده خلاهم “صيدة” سهلة لشركات السياحة الوهمية اللي بدأو يعلنوا على مواقع التواصل الاجتماعي لرحلات حج مباشر وبإجراءات سهلة جدا.
لكن وزارة السياحة مسكتتش وحذرت من الإعلانات الوهمية المنتشرة على الفيسبوك اللي بتسوق لرحلات حج مباشر او حج بدون قرعه وده للي معاه تأشيرة السعودية وده بحسب موقع المصري اليوم.
وقالت إن الإعلانات دي مضللة وده لأن تأشيرة الزيارة متسمحش انك تحج بيها، وطلبت وزارة السياحة من المواطنين انهم ميصدقوش الاعلانات دي و ميمشوش وراها وده لأن اللي بيروج ليها كيانات غير شرعية
وقالت كمان انك ممكن تلجأ للوزارة عشان تتأكد من مصداقيتهم قبل ما تمضي معاهم العقد وقبل ما تدفع أي تكاليف.
الكلام ده أكدته وزارة الحج و العمرة في السعودية خلال بيان ليها اللي أعلنت فيه عن اجراءات جديدة
لمنع دخول حاملي تأشيرات الزيارة بكل أنواعها على رحلات المتجهة لجدة و المدينة وده خلال موسم الحج بس وده بحسب اللي نشره موقع فيتو.
ده كمان شركة مصر للطيران أصدرت تعليمات لجميع شركات السياحة ووكلاء السفر بعدم إصدار اي تذاكر أو قبول أي راكب يحمل تأشيرة زيارة لجدة او المدينة، وده في الفترة من 30 مايو حتى 28 يونيو.
وبحسب تصريحات سامية سامي رئيس الإدارة المركزية لشركات السياحة في المصري اليوم، قالت أن شركات السياحة بس هي اللي ليها الحق بتنظيم رحلات الحج الفرادى.
لكن ايه هو الحج الفرادى؟
أقولك يا سيدي الحج الفرادى ده الحج اللي المصري بياخد فيه تأشيرة حج مباشر وده بيكون خارج الحصة المقررة للدولة
وكملت وقالت ان شركات السياحة المنظمة لرحلات الحج هتنشر كل أسماء المواطنين المصرح ليهم بحج الفرادى عن طريق بوابة الحج المصرية
وبحسب تصريحاتها في برنامج الساعة قالت انها شافت اعلانات كتير وهمية بتروج ان الحاج ممكن يروح للشركات دي في الرياض وهما هيقدروا يوصلوه لجدة و المدينة
وقالت إن أغلب الشركات دي ملهمش مقرات ووزارة السياحة في الحالة دي بتشكل لجنة عشان ترصد الإعلانات دي وبعدها بيتم التواصل مع الشرطة لضبطهم.
وأكدت أن رحلات الحج في مصر بتم من خلال 3 جهات رسمية وهي وزارة الداخلية ووزارة التضامن الاجتماعي وشركات السياحة وده بيتم تحت اشراف وزارة السياحة.
وكل الجهات الرسمية دي مسؤولة عن الحج بالقرعة غير كده ده بيكون وهم ونصب، بس السؤال هنا موسم الحج هيبدأ أمتى؟
بحسب اللي نشرته جريدة الوطن المملكة العربية السعودية بدأت يوم الأحد في استقبال رحلات الحج، واخر ميعاد لأستقبال الرحلات هيكون يوم 4 ذي الحجة اللي هيوافق 22 يونيو.
وأول فوج لمغادرة الحجاج هيكون في 2 يوليو الجاي وهيستمر لمدة شهر حتى يوم 2 أغسطس،ودلوقتي قولنا اتعرضت لنصب من الشركات دي قبل كده ولا لا؟
