لو أنت لستموظف ومرتبك قليل وتريد أن تشتري شقة بنك مصر حلها لك وهذا لإنه قدم برنامج تمويل عقاري هتقدر من خلاله تجيب الشقة التي تحلم بها حتى لو مرتبك 3000 جنيه فقط، فما حكاية هذا البرنامج وما الشروط؟ ..تابعونا لمعرفة التفاصيل:
لو نفسك تشتري شقة وعايز تجيب قرض ومش عارف عشان دخلك على القد أستنى ومتفكرش كتير أنت دلوقتي ممكن تشتري شقة بكل سهولة
أيوة خلاص مشكلتك اتحلت وهتشتري شقة وده لأن بنك مصر طرح برنامج تمويل عقاري لأصحاب المهن الحرة و الأنشطة التجارية و الصناعية
بس إيه حكاية البرنامج ده؟ بحسب موقع المصري اليوم البرنامج ده بيمول حتى 75% من قيمة الوحدة السكنية وكمان بأقل مصاريف إدارية
ومدة القرض بتوصل لـ 15 سنة و كمان فيه وثيقة تأمين على الحياة و العجز الكلي واللي بيتحملها البنك، لكن أستنى ده فيه شروط للقرض ده وهي إن دخلك ميقلش عن 3000 جنيه والحد الأقصى للقسط هيكون 40% من الدخل.وكمان يكون سنك بعد إنتهاء القرض 65 سنة.
الأوراق المطلوبة
بنك مصر وضح الأوراق المطلوبة بالتفصيل واللي منها إيصال مرافق زي الكهربا و الغاز و المياه و التليفون فيه عنوانك وميكنش عدا عليه أكتر من 3 شهور.
كمان من ضمن الأوراق صورة بطاقة الرقم القومي ولازم تكون سارية، وبتقدم كمان كشف حساب بنكي أو شهادة من الضرايب بتبين دخل العميل آخر 3 سنين وده وفقا للسياسة الائتمانية.
طيب بالنسبة لأصحاب المهن الحرة إيه الأوراق المطلوبة منهم؟هنا بقي أنت بتقدم صورة من ترخيص مزوالة المهنة وصورة من البطاقة الضريبية.
وفي حالة برنامج أصحاب الأنشطة التجارية أو الصناعية أو الخدمية، بتقدم صور مستخرج رسمي حديث من السجل التجاري أو الصناعي اللي بيمر عليه أكتر من 3 شهور.
وكمان بتقدم صورة من البطاقة الضريبية وصورة من آخر تعديل لعقد تأسيس الشركة وده لتحديد نصيب الشريك لو موجود وبعد كده بتقدم المستندات الخاصة بالوحدة السكنية للتمويل العقاري من البنك
واللي بتتقسم ل3 حالات وحدة سكنية مسجلة و وحدة قابلة للتسجيل ووحدة غير مسجلة في حالة إن الوحدة مسجلة، هنا بتقدم سند ملكية مسجل خالي من الحقوق العينية.
وبتقدم رخصة البناء أو تصريح البناء وشهادة من الضرايب العقارية بتثبت أسم المالك وشهادة تصرفات عقارية لمدة 15 سنة وأي مستند بتطلبه الإدارة القانونية.
أما في حالة إن الوحدة قابلة للتسجيل بتقدم عقد ملكية الأرض في الشهر العقاري خالي من الحقوق العينية للغير أو قرار التخصيص و معاهم محضر تسليم الأرض
وصورة من رخصة المباني وشهادة من الضرايب العقارية بتثبت أسم المالك و أن الضرايب العقارية مسددة بالكامل، وبتقدم كمان شهادة تصرفات عقارية عن العقار لمدة 15 سنة.
وكمان موافقة جهاز المدينة عن نقل الملكية إلى المستفيد ورهن الوحدة لصالح البنك، والرسومات الهندسية للوحدة السكنية وشهادة من الحي تفيد بعدم وجود أي مخالفات على الوحدة.
طيب في حالة إن الوحدة غير مسجلة هنا بقى بتقدم عقد الوحدة السكنية وصورة طبق الأصل من رخصة البناء ومستند إضافي بتطلبة الشئون القانونية
ودلوقتي قولنا إيه رأيك في برنامج التمويل العقاري لبنك مصر؟
