يسقط يسقط حكم القايمة،هل تتذكروا تريند إلغاء القائمة الذي انتشر الأيام الماضية، الدولار جاء وأطاح بذلك التريند وبدأ الناس يفكرون في كتائمة قائمة الزواج بالدولار، إليكم أغرب قصة حدثت في التقرير التالي:
حمايا عايزني اكتب القايمة والمؤخر بالدولار! بالجملة دي نزل شاب حكايته عالفيسبوك وعاوز ياخد رأي الناس يتصرف زي.صاحبنا اللي علي وش جواز كتب يقول: حمايا عايزني اكتب القايمة والمؤخر بالدولار!بقوله ليه، قلي مانت شايف الجنيه بيحصل إيه وبعدين مش خسارة في بنتي اللي زي القمر دي ومش هضيع حقها لما تيجي تطلقها بعد عشرة ولا عشرين سنة لاقدر الله يبقى عالاقل حافظنا على قيمة فلوسنا لان دي مسؤلية ربنا هيحاسبني عليها.
وواضح كده ان الانخفاض المستمر في قيمة الجنيه خلي المصريين يعيدوا حساباتهم بدل المرة ألف حتى في الجواز، خصوصا يعني ان الجنيه من مارس 2022 ولغاية دلوقتي خسر اكتر من 90% من قيمته، وبعد ماكان ب16 جنيه تقريبا اهو دلوقتي مقرب من 30 جنيه.
بس طبعا في ناس كتير استغربت، معقولة بعد ماكنا بتناقش نكتب قايمة ولا لأ، دلوقتي بنشوف هنكتبها بالدولار ولا بالجنيه، هي دي حالة فردية ولا بقى قانون وهيمشي على الكل؟
المحامي عمرو ابراهيم شارك هو كمان وقال انه ممكن يستوعب ان في ناس كتير يغيروا أموالهم لدولارات أو يشتروا بيها دهب نظرا لتدني سعر صرف الجنيه وضعف قوته الشرائية.
لكن يوصل الحال بالبعض انهم يطلبوا قايمة منقولات زوجية لبناتهم بالدولار أو مشغولات ذهبية وسبايك بس، ده مكانش يخطر على بالي ابدا لغاية ماسمعته بوداني من شباب داخلين على جواز وجايين يستشيروني قانونيا.
والسؤال دلوقتي ينفع حد جوة مصر يكتب القايمة بالدولار؟
المحامي وليد هارون قال إن قائمة المنقولات المكتوبة في مصر بقيمة الدولار قانونية، وفي حالة الدفع، السداد هيكون بالدولار برضه، لأن القانون بيعترف بقائمة المنقولات أي كانت العملة المكتوبة بها.
وده رأي خالد رجب المحامي برضه، واللي أكد انه يجوز قانونا كتابة سعر المنقولات في قائمة المنقولات بالدولار أو بأي عملة متداولة.
بس مش منطقي برضه، كتابة أرقام مبالغ فيها توصل لملايين، في حين أن الزوج شغال موظف قطاع خاص.
وطبعا من حق الزوجة رفع دعوى تبديد قائمة المنقولات في حالة نقص أو بيع أي شيء من أثاث المنزل من قبل الزوج من غير موافقة زوجته وإخبارها، ولو ده حصل من حقها رفع جنحة تبديد منقولات لأن المنقولات الزوجية تعتبر على سبيل الأمانة بالنسبة للزوج.
فيا ترى بقى انتم رايكم إيه؟ مع الناس اللي بتنادي بتسهيل الجواز في ظل الوضع الصعب اللي احنا بنعيشه؟ ولا لازم نحفظ حق البنت وبأي طريقه حتى لو هنكتب القائمه دهب او دولار بس؟
واحكولنا لو انتوا في طرف العريس او العروسه ممكن تتصرفوا ازاي؟ واخر عادات الجواز في بلدكم وصلت لإيه والقايمة دلوقت بقت بكام؟
