الحكومة هذه المرة وفت بوعدها، ورسميا نزلت خطة تخفيف الأحمال أو ببساطة توقيت قطع الكهرباء لكي يعرف كل شخص مواعيدها ويطبط أموره على هذا.
فياترى الجدوال دي هنشتغل بيها لغاية إمتى؟ وهل الكهربا هتقطع في القرى اكتر من المدن؟الخبر اللي الكل كان مستنيه حصل، والحكومة أعلنت عن خطة تخفيف أحمال الكهرباء فى المحافظات المختلفة
وحسب مجلس الوزرا الخطة هيبدأ تنفيذها من يوم الثلاثاء الساعة 12 الضهر تحديدا، وده بعد التنسيق بين وزارتى الكهرباء والبترول.
والمهم ان مجلس الوزرا بدأ بنشر خطة تخفيف الأحمال فى محافظة القاهرة وخلال لساعات الجاية هتنزل جداول انقطاع الكهرباء في باقي المحافظات وهيبقى موضح فيها ميعاد القطع واسم مركز او الحي المتأثر في تخفيف الأحمال.
واللي حصل انه خلال الاسابيع اللي بدات الحكومه في قطع الكهرباء ضمن خطه لتحفيف الاحمال على مستوى الجمهوريه كلها باستثناء المناطق السياحيه والاماكن الحيويه اللي فيها مستشفيات او مصالح مهمة.
وحسب بيانات الحكومه الازمه سببها ارتفاع شديد في درجات الحرارة وده عمل ضغط على محطات الكهربا واتسبب في زيادة استهلاكها، عشان كده بدات الحكومه في خطه لتخفيف الأحمال.
والفكره ان الحمله دي مستمره طول شهر اغسطس وكمان ممكن تكمل معانا لغايه اول اسبوعين في سبتمبر لو الوضع ما تحسنش.
وحسب تصريحات رئيس مجلس الوزراء الدكتور مصطفى مدبولي تخفيف الأحمال مستمر طالما درجة الحرارة فوق 35 درجة.
ده كمان تم اختيار يوم الأحد عشان يكون يوم عمل من البيت لموظفين الحكومه اللي شغلهم مش محتاج تعامل مباشر مع الجمهور.
وفي نفس الوقت كل محافظة هتحط خطة لتخفيف استهلاك الكهرباء في المصالح الحكوميه إنارة الشوارع واللوحات الإعلانية، وكل المباريات هتتلعب قبل المغرب عشان نوفر استهلاك الكهرباء في الاستادات.
ومع بداية الأزمة، طلعت وزاره الكهرباء بيان قالت فيه ان قطع الكهرباء هيكون على رأس الساعه قبلها او بعدها ب 10 دقائق. لكن دلوقتي الجديد هو الاعلان الجداول عن مواعيد منظمه لقطاع الكهرباء في كل حي.
وده بعد شكاوى الأيام اللي فاتت وصلت للحكومة
بإن في قرى الكهرباء بتقطع فيها بالخمس والست ساعات واكتر كمان، في حين الكهرباء بتقطع في المدن لفترات أقل.
وده اللي خلى المتحدث الرسمي لمجلس الوزرا، نادر سعد، يقول ان ده فعلا حصل وممكن يكون سبه أخطاء بشرية إن اللي فصل الكهربا نسي يرجعها تاني، ودي أخطاء وارد تحصل في كل مكان لكن ده مش تحيز للمدينة عن القرى
وعموما مع الإعلان عن جدوال تخفيف الأحمال، كله هيعرف ساعات القطع في كل منطقة ولو حد شاف إن في تحيز لمنظقة عن التانية يقول رأيه ونتقبل الرأي والرأي الأخر.
وحسب كلامه، خبراء الأرصاد قالوا إن شهر أغسطس مش هتقل درجة حرارته عن يوليو، وكمان ممكن تبقى أشد سخونة
عشان كده السيناريو الأسوأ إن أزمة الكهربا ممكن تتحل خلال الأسبوع التالت من شهر سبتمبر لأن درجات الحرارة محتمل تتحسن وقته.
واهو دلوقتي تقدر تدخل على صفحة مجلس الوزرا على الفيسبوك عشان تعرف مواعيد الكهربا في منطقتك بس قولنا بقى: انت ساكن فين والكهربا بتقطع كام مرة، وفي كل مرة بفضل فاصلة قد إيه؟ وهل انت من الناس اللي فكرت تشتري مولد كهربا عشان تريح دماغها؟
