مفاجأة للمصريين من المللكة العربية السعودية، أي شخص معه تأشيرة لزيارة المملكة العربية السعودية يمكنه أن يدخل السعودية خلال فترة الحج.
طيب يعني إيه الكلام ده وامتى موعد وصول ومغادرة الحجاج، وإزاي القرار ده ممكن يطبق على المصريين؟،خليكم معانا في حلقتنا النهاردة وانتوا تعرفوا اي الحكاية :
كل سنة الحكومة السعودية بتعلن عن مواعيد دخول وخروج الحجاج من وإلى المملكة خلال موسم الحج وعن إجراءات مهمة لازم يتم اتباعها خاصة خلال فترة الحج، منها وقف اعتماد التأشيرات في بعض المطارات خلال موسم الحج.
لكن السنة دي شركة مصر للطيران أعلنت في إخطار رسمي ليها بعتته لشركات السياحة إنها تلقت تعليمات جديدة من سلطات الطيران المدني السعودي بمواعيد بدء استقبال موسم رحلات الحج واللي هتكون بداية من يوم 21 مايو الحالي ولحد يوم 22 يونيو الجاي.
وقالت إن مواعيد مغادرة الحجاج هتكون من خلال الفترة من يوم 2 يونيو ولحد 2 أغسطس الجاي
وده الكلام اللي أكده عمرو عدوي، رئيس قطاع الشؤون التجارية، ورئيس اللجنة الفرعية للحج والعمرة مايو الحالي بشركة مصر للطيران
وقال إنه حسب تعليمات السلطات السعودية، فـ هيُسمح لشركة مصر للطيران بقبول الحجز من أي راكب يحمل تأشيرة زيارة بجميع أنواعها إلى المملكة العربية السعودية، وده على الرحلات المتجهة إلى جدة خلال فترة الحج.
وده معناه إنه خلال فترة الحج أي حد معاه تأشيرة زيارة للمملكة أيًا كان نوعها هيتم الحجز عليها على خطوط الطيران لشركة مصر للطيران.
ولو انتوا فاكرين فـ السنة اللي فاتت مكنش مسموح لحاملي أي تأشيرة غير تأشيرة الحج بالسفر إلى 4 مطارات سعودية، وهي (جدة – المدينة – ينبع- الطائف) خلال موسم الحج في الفترة من يوم 10 ذي القعدة حتى يوم 10 ذي الحجة.
وعشان كده القرار ده جديد ومفاجئ لكل شركات السياحه وخطوط الطيران.وده طبعا مش جديد على المملكة العربية السعودية واللي بدأت تقدم الفترة اللي فاتت تسهيلات كبيرة لدخول أراضيها
والفترة اللي فاتت أعلنت وزارة الخارجية السعودية عن التأشيرة الالكترونية الجديدة واللي سهلت دخول المملكة بشكل كبير، واللي هتخليك تقدر تاخد التأشيرة بتاعت الزيارة أو العمل أو الإقامة بشكل الكتروني وفـ 3 أيام بس!
وحسب كلام الخارجية السعودية فـ الخدمة الجديدة دي هتلغي لاصق التأشيرة اللي كان موجود على جواز السفر وده لأنها هتتحول لتأشيرة إلكترونية واللي بيتم قراءة بياناتها من خلال رمز الإستجابة السريع الـ QR.
وبكده لو انت حبيت تزور المملكة العربية السعودية سواء بقا بغرض السياحة أو الزيارة العائلية هتقدر تدخل بكل سهولة للسعودية.
والجميل إنه بتعتبر التأشيرة الإلكترونية دي جزء من مبادرة الحكومة السعودية واللي بتستهدف بيها تطوير القطاع السياحي وتسهيل إجراءات الدخول للملكة لكل اللي حابين يزوروها.
مش بس كده ده المفاجأة بقى إنك لو حصلت على التأشيرة دي هتقدر تكون في المملكة بشكل قانوني ولمدة 90 يوم، دي كمان صالحة للاستخدام لمدة سنة من تاريخ إصدارها .
قولنا رأيك في قرارات المملكة العربية السعودية الأخيرة؟
