لا يوجد حديث في مصر هذه الفترة إلا عن القرار الخاص بمنع العمالة المصرية من دخول الكويت وهو القرار الذي كان صدمة لناس كثيرة في مصر يحلموا بالسفر ومنهم الكثيرين الذين كانوا يستعدون للسفر بالفعل.
لكن الإعلامي وعضو مجلس النواب مصطفى بكرى واللي معروف بعلاقاته القوية مع المسئولين في الكويت، خرج عشان يكشف عن مفاجآت مدوية في قرار منع العمالة المصرية من دخول البلد؟إيه حكاية مكالمة السفير المصري مع المسئولين في الكويت؟ وإيه مصير العمال اللي عايزين يسافروا؟ تفاصيل كتيرة نكشفها في الفيديو ده.
مع إعلان صحيفة القبس الكويتية عن لسان مصادر في الحكومة الكويتية عن أنه تم إصدار بمنع دخول العمالة المصرية للكويت بعد وقف اتفاقية التعاون بين وزارة القوى العاملة في مصر وبين هيئة القوى العاملة في الكويت.. مش بس كده لكن كمان تم إصدار بإيقاف جميع إصدار أذونات العمل للعمالة اللي جاية من مصر.
صحيفة القبس الكويتية قالت في الأخبار اللي نشرتها على لسان مصادر مسؤولة في الحكومة الكويتية ان القرار جاء بتوجيهات من النائب الأول لرئيس مجلس الوزراء ووزير الداخلية الكويتي الشيخ طلال الخالد اللي قرر وقف اتفاقية التعاون بين القوى العاملة في مصر والكويت بسبب أن الحكومة هناك عايزة تحط آلية جديدة لضبط الاستقدام من مصر، وشايفة أن السفارة المصرية بتخالف القوانين الكويتية المنظمة لسوق العمل في البلد وبالتالي لابد من أن يكون في آلية واضحة للتعامل مع العمالة المصرية.
ومع انتشار الأخبار دي بصورة كبيرة جدا.. خرج الإعلامي وعضو مجلس النواب مصطفى بكري، عشان يكشف عن مفاجآت مدوية في الموضوع وقال أنه لا صحة لما نشرته صحيفة القبس الكويتية عن وقف تصاريح العمل للمصريين بالكويت، وقال إن التقرير اللي نشرته صحيفة القبس وزعمت فيه منع دخول العمالة المصرية إلى الكويت غير صحيح.
مصطفى بكرى قال خلال تقديمه برنامج«حقائق وأسرار»، على قناة صدى البلد، إنه تواصل مع مصادر كبيرة في الحكومة الكويتية واللي أكدوا له أه حتى الآن ليس هناك أي صحة أو دليل على أن القرار ده اتنفذ بالفعل.
مش بس كده لكنه كشف عن مفاجأة تانية وهي أن السفير المصري أجرى اتصالات مع المسئولين الكويتيين هناك عشان يعرف منهم حقيقة ما نشر، لكن الغريبة أنهم أكدوا له أنه لا يوجد أساس لهذا الكلام، بدليل أن وزارة القوى العاملة المصرية الأسبوع اللي فات سفرت 50 طبيب و200 ممرض للعمل بالكويت واتعمل لهم العقود وتصاريح العمل بدون أي مشاكل.
مصطفى بكري أبدى اندهاشه من الكلام اللي قالته صحيفة القبس الكويتية، وإنه تم إيقاف الربط الإلكتروني بين البلدين، وده مش صح لأن المسئولين في الكويت قالوه أنه مفيش حاجة اسمها ربط إلكتروني بين مصر والكويت وكل الكلام اللي اتقال مفيش له أي أساس من الصحة والناس اللي عايزة تسافر هتسافر عادي بدون أي عواقب.
واختتم كلامه بالإشادة بالعلاقات المصرية الكويتية، وأكد مصطفى بكرى أن الكويت لها مواقف مساندة لمصر كتير وعندهم تقدير لأهمية العمالة المصرية، وأن يبقى الأمر حتى الآن عبارة عن شائعات ليس لها أي أساس من الصحة ومفيش قرار رسمي بده.
