انتشرت صور وفيديوهات كثيرة الفترة الماضية على مواقع التواصل الاجتماعي وظهر فيها تجار الدواجن بيخرجوا الدواجن البرازلية من الغلاف الخاص بها، ثم يقطعوها ويبيعوها للمستهلك بانيه وأورواك وشيش طاووك.
طيب ياترى الصور دي حقيقية وهل فعلا التجار ضحكوا على المواطنين وباعولهم الفراخ البرازيلي على إنها بلدي؟، وياترى كسبوا كام من القصة دي؟، تعالوا نشوف اللي حصل مع بعض في التقرير:
طبعا في الأزمات معروف إنه لازم زي ما بتخلق ناس جدعان يهمهم مصلحة البلد وإن الأزمة تعدي بتخلق بردو ناس مستغلة كل اللي يهمهم يحقووا مكاسب غير مشروعة من الازمة.
وده اللي حصل في أزمة ارتفاع أسعار الدواجن وبعد ما الحكومة حلت المشكلة وقدرت تستورد فراخ برازيلي غرقت الأسواق بسعر منخفض عن كل اللي بيتباع في السوق.
جه بقى شوية تجار حبوا يضحكوا على المصريين ويبيعوا ليهم الفراخ البرازيلي على إنها بلدي لكن على مين الذكى في الأذكى منه وفي عصر السوشيال ميديا مبقاش في حاجة تستخبى خلاص.
وبدأت تنتشر صور على مواقع السوشيال ميديا ظهر فيها تجار الدواجن بيخرجوا الفراخ البرازيلي بكميات من الأكياس وبعد كده بيحطوها في أحواض كبيرة عشان يبدأو يقطعوها ويخرجوا منها قطع مختلفة بانية وصدور وشيش وهكذا وبدأوا فعلا يبيعوها للمستهلك على إنها فراخ مصرية، وطبعا ده كسبهم الضعف.
وده لأن سعر البرازيلي الكيلو ب ٦٥ جنيه، أما الفراخ المزارع في مصر بتبدأ من ٨٥ جنيه للكيلو للبيضا والبانيه من 175 ولحد 180 جنيه حسب المنطقة، انتوا متخيلين الفرق!
عبد العزيز السيد، رئيس شعبة الثروة الداجنة بغرفة القاهرة التجارية، على على اللي بيحصل ده وقال إن التجار دول اشتروا كميات الدواجن البرازيلية بسبب سعرها المنخفض بالمقارنة بسعر الداوجن المحلية، وقطعوها عشان يبيعوا مكوناتها بأسعار السوق العادية واللي بتوصل سعرها لـ 190 جنيها لكيلو البانيه، و90 جنيها لكيلو الأوراك، وبكدة حققوا أرباح مضاعفة.
لكن “السيد” سأل وقال هو فين دور الجهات الرقابية في الأسواق؟ ، المفروض إن استيراد الدواجن البرازيلي كان بهدف توفيرها للمواطنين بأسعار مخفضة .
وقا إنه بكدة الدواجن البرازيلية مش متوفرة بالأسواق بشكل مناسب، وده لأنها محققتش الهدف منها وهو تخفيض سعر الدواجن المحلية واللي لسه مستقر عند 73 جنيها للكيلو عند باب المزرعة.
وطالب رئيس شعبة الثروة الداجنة بغرفة القاهرة التجارية بتدخل الجهات الرقابية فورا لتحديد مصدر الصور والفيديوهات المنتشرة، وده عشان يحاسبوا المتسببين في الجريمة دي واللي بـ تهدر حق المستهلك وبتزيد من المتلاعبين في الأسواق المحلية.
وطبعا منقدرش ننكر إن الفراخ البرازيلي عملت زلزال في أسعار الفراخ خلال الأيام اللي فات بعد ما طرحتها الحكومة في السوق بسعر 65 جنيه للكيلو.
وبعد ما كانت الفراخ البيضا بتنافس اللحمة وسعر الكيلو فيها بيقرب من 100 جنيه ، دلوقتي سعره نزل إلى 73 جنيه تقريبا، حتى البانيه بقى بيتراوح ما بين 150 لـ 190 جنيه بس، بعد ما كان كسر سعره حاجز الـ 200 جنيه.
وصحيح الأسعار لسة غالية مقارنة بنفس الفترة من السنة اللي فاتت لما كان الكيلو بيسجل 39 جنيه وشوية، لكن الناس فرحت بالخطوة اللي أخدتها الحكومة وشافت إن بكده الأسعار ممكن تقل فعلا تدريجي.
بس اطمنوا خلاص لأن المهندس عبدالمنعم خليل رئيس قطاع التجارة الداخلية بوزارة التموين والتجارة الداخلية قال في تصريحات ليه إنه الوزارة حطت خطة بداية من2023 لتطهير السوق المحلية من المنتجات المغشوشة والمقلدة ومنتهية الصلاحية بالتعاون مع الإدارة العامة لمباحث التموين بوزارة الداخلية.
وقال خليل إن ملامح تلك الخطة هتتمثل فى شن حملات مكثفة ودورية على الأحياء والمناطق الشعبية والنائية بالمحافظات، غير كمان متابعة ومراقبة المنتجات اللي يتم طرحها فى أكشاك السلع الغذائية والمحال التجارية فى كافة المناطق.
دوقتي انتوا جربتوا الفراخ البرازيلي ولا لسه؟ وايه رايكم في التصرف اللي عملواه تجار الفراخ ؟
