مازلنا نكشف تفاصيل قضية وفاء مكي، التي انتشر حولها الأقاويل وأصبحت حديث السوشيال ميديا خلال الأيام الماضية، بعدما خرجت لتعلن برائتها من قضيتها الشهيرة لوكن بدات مفاجآت جديدة تظهر في الموضوع مثل علاقة أحمد راتب بهذه القضية؟..تابعونا لمعرفة التفاصيل:
تعالى ياسيدي نحكي شوية تفاصيل،، الست ريهام سعيد استغلت الحدث وعملت حالة كبيرة جدا من الجدل في برنامجها بسبب قضية وفاء مكي ، وفرقعت ريهام في وش الجمهور قنبلة ان في نجمين كبار متورطين في قضية وفاء وانهم شهدوا زور واتحكم عليها بالحبس سنة وقت القضية.
النجمين دول هما احمد راتب و ممدوح وافي اللي يرحمهم بقى ، لكن ريهام سعيد تسكت ؟ لا متسكتش طبعا .. طلعت ع الهوا تقول ان في شاهد في القضية قالها ان النجمين دول شهدوا زور و خدوا حكم سنة لكن مع وقف التنفيذ
طبعا ده بالنسبة لريهام خبر الموسم ، فحبت تحط التاتش بتاعها لكن مكنتش تعرف اللي هيحصلها، بنت احمد راتب بقى مسكتتش ، وقررت تجيب حق ابوها اللي مات وشبع وموت وجايين دلوقتي يقولوا انه شهد زور . فاعلنت انها هترفع قضية ضد ريهام سعيد وانها بتقول كلام مش حقيقي وياما تثبت اللي بتقوله او تعتذر.
الموضوع كبر جدا ، وبنت احمد راتب وقفت واقفة رجالة وقالت لريهام سعيد ان قدامها 48 ساعة تثبت فيها بالأدلة ان ابوها كان شهد زور فعلا مع وفاء مكي ، وانه عليه حكم حبس سنة وإلا هترفع عليها قضية تشهير.
لمياء بنت احمد راتب قالت ان ابوها مكنش ليه علاقة اصلا بوفاء مكي ، ومكنوش اصدقاء حتى وانه عرف القضية زي كل الناس وكان بيقرأ عنها في الجرنال وبس كدا.
ريهام سعيد بقت في نص هدومها ، ولا عرفت تثبت ولا عرفت تتصرف ، وهوووب جابت وار وطلعت اعتذرت عشان تلم الموضوع قبل ما يجرجروها في المحاكم تاني.
الجبن سيد الاخلاق برضه ، ريهام طلعت ع الهوا وقالت كلمتين حلوين عشان بنت احمد راتب تهدى ومترفعش عليها القضية .. قالت ايه بقى ست الكل ؟
أنا بعتذر لعائلة الأستاذ أحمد راتب مش علشان التهديدات إنما علشان أنا غلطت فعلا إني ما اتأكدتش بمستند ، بالرغم أن المعلومة اللي وصلت ليا كان المصدر متأكد منها إلا أن غلطتي إن ما كانش معايا مستند وده لصعوبة العثور على مستند من 23 سنة ..
ولحد دلوقتي محصلش جديد في الموضوع وخلاص ريهام سعيد عملت اللي بنت احمد راتب عايزاه ،، يمكن نخلص بقى من القصة دي خالص اللي بقالها 23 سنة وجاين دلوقتي يقولوا مين برئ ومين مذنب
كل الناس اللي اتكلمت في قضية وفاء مكي الايام اللي فاتت كانوا ضدها حتى ميار الببلاوي اللي كانت سبب في فتح القصة من تاني ، رجعت في كلامها وقالت انها كنت فهمة غلط وأنبت ضميرها على الفاضي ، وان وفاء كي متهمة فعلا بتعذيب البنتين ، وقالتلها ” ليكي حق تقولي انك مظلومة”.
كمان ظهر شاهد جديد و حكى كل اللي حصل في الحادثة زمان واكد انه شاف بعينه البنتين في بيت وفاء مكي وحالتهم ازاي كانت صعبة وان هي اللي عملت فيهم كدا مش بريئة ولا حاجة.
الموضوع كله مجرد تريند عشان ترجع وفاء مكي للاضواء من تاتي ويجيلها عروض للشغل والتمثيل بعد مابقت مش عارفة تعيش ولا تصرف على نفسها .
