مقدمة برامج الطبخ أميرة شنب في أزمة كبيرة منذ عدة أيام بسبب كلبها المفترس، الذي تسبب في قطع نافذ في أوتار وأعصاب جارها وهو الآن حالته خطيرة في غيبوبة، ما القصة التي قلبت الدنيا؟
من كام يوم انتشر على مواقع التواصل الاجتماعي قصة دخول مدير في أحد البنوك العالمية المستشفى في حالة حرجة.. بعد ما اتعرض للعض من كلب مفترس.. واتضح بعد كده إنه الكلب ده ملك لمقدمة برامج الطبخ الشهيرة أميرة شنب
ونشرت هند بنت الفنان سعيد صالح تفاصيل حالة جار أميرة شنب.. عندها على فيسبوك.. وقالت إنه الشخص ده اسمه محمد محب.. وحظه إنه ساكن تحته المذيعة أميرة شنب اللى بتقدم برنامج أميرة في المطبخ.. واللي عندها كلب بيتبول ضخم العضلات
على كلام بنت الفنان سعيد صالح.. الكلب البيتبول ده.. محظور استيراده دوليا.. وبالرغم إن محمد محب للحيوانات فعلا.. إلا أن الكلب ده كان دايما يهاجمه في الطالعة والنازلة.. وكان بيقول إنه صعبان عليه جدا إنه مش واخد عناية كافية في تحسين السلوك.. وإنه بيهاجم كل اللى بيشوفه
المهم.. يوم الأحد اللي فات قرر محب إنه يخبط على باب مدام أميرة عشان يطلب منها يسيطروا شوية على كلبهم بدل ما هو عمال يهاجمهم كده من ورا السور القصير اللي عادي جدا إنه ينط من فوقيه.. فتحت له الشغالة، وقبل ما يفتح بقه بكلمة واحدة خرج الكلب المفترس ده من وراها.. وهجم علي محب في مدخل العمارة اللي كان واقف فيه ابنه.. وحاول إنه يفدي ابنه.. الكلب افترسه بدون مبالغة.. عضه في الذراع والفخذ وأماكن متفرقه من الجسم نتج عنها قطع نافذ في الأوتار والأعصاب.. وفجأه مدخل العمارة كله بقى دم.
وبالعناية الإلهية قدروا يفلتوه من بين أسنانه.. واتوجهوا بيه لمستشفى “دار الفؤاد” بحكم إنها أقرب مستشفي كبير ليهم.. وبعد الفحوصات أكدوا إنه هيحتاج لعملية نقل أعصاب من القدم إلى الذراع اللي تم تمزيقه.. وبعد إجراء الفحص الطبي المطلوب دخل محمد غرفة العمليات.
بس للأسف الإصابة كانت أكبر بكتير من إنه الدكاترة يلحقوها.. وبعد ما خد حقنة التخدير اتوقف القلب لمدة ٣٠ دقيقة تقريباً.. ودخل فى غيبوبة وعملوا له صدمات للقلب ونقلوه للرعاية المركزة.. وتم تأجيل العملية لأجل غير مسمى حتى يعود مرة أخرى للحياة.
الراجل لغاية دلوقتي لسه مفقش من الغيبوبة.. والناس كلها كانت مستنية تعليق أميرة شنب على الواقعة.. بس هي واخدة قرار بالسكوت تماما.. وكل اللي قالته:” لما يقوم بالسلامة إن شاء الله هطلع بيان أوضح الموضوع بالكامل، موضحة إنها بتتابع حالته فى الوقت الحالي”
