لو انت من المقيمين في القرى وعندك بيت وبتفكر تبني أدوار زيادة انتبه وهذا لأن الحكومة أعلنت ضوابط جديدة لكي تمنع مخالفات البناء ولو بنيت مخالف تعرض نفسك لخطر الإزالة وكمان المسائلة القانونية.
طيب إيه الشروط الجديدة بتاعت البنا وهل هتطبق في كل الحالات ولا لأ وهتدفع كام لو حبيت تقدم على رخصة بناء؟ خليك معانا في التقرير ده وانت تعرف كل التفاصيل دي:
عشان الدولة تقضي على الفوضى والتجاوزات اللي بيعملها بعض الناس في عملية البناء قررت تحط ضوابط صارمة عشان تمنع المخالفات بتاعت البنا وطبعا كل السكان الموجودين في القرى ملزمين ينفذوا القرارات ولازم يستخرجوا التراخيص اللازمة لأي عملية بناء هيعملوها.
طيب واحد هيقولي انا ساكن في قرية وعايز أبني دور مثلا اعمل إيه عشان اطلع ترخيص وإيه الشروط والمستندات المطلوبة؟
بصي ياسيدي عندك أهم شرط عشان تطلع تصريح بنا في القرى إن العقد بتاعك يكون سليم ويكون معاك صحة توقيع.وخد بالك بعد ما تعمل صحة التوقيع لازم تسلم الأصل وصورة منه للمراجعة، وهتقدر تسترجع الأصل بعد المراجعة.
وخلي بالك لو العقد بتاعك مش متسجل في الشهر العقاري عادي وده لأنهم بيكتفوا في القرى بصحة التوقيع حتى لو انت مسجلتوش.
كمان لازم يكون مكان البنا اللي انت بتفكر فيه داخل الحيز العمراني للقرية بتاعتك، مش بس كده ده انت كمان لازم تقدم طلب عشان تقدر تاخد رخصة البناء في حالة لو كانت أرض فضاء أو رخصة تعلية
كمان لازم تعمل تحدي لموقع البيت أو قطعة الأرض بتاعتك بظبط وده بيتعمل عن طريق المجلس المحلي.وخلي بالك إنت كمان لازم تروح ل مكتب هندسي أو مهندس معتمد وده عشان يعملك الرسومات المعمارية والإنشائية للعقار بتاعك.
مش بس كده انت كمان هتحتاج تعمل توكيل للمهندس المعتمد أو المكتب الهندسي اللي انت هتروحله وده عشان تقدر تكمل باقي الإجراءات اللي هنقولك عليها دلوقتي.
وخلي بالك في الحالة دي التعلية للأدوار بتكون مسؤولية المهندس أو المكتب الهندسي المسؤول عن سلامة العقار وأعمال التعلية ومطابقتها للاشتراطات التخطيطية والبنائية للموقع والكود والمواصفات الفنية.
أما بقى لو بتسأل عن رسوم استخراج تراخيص البناء في القري فمتقلقش انت هتدفع 200 جنيه بس رسوم استخراج بيان صلاحية الموقع في المجلس المحلي اللي انت تابع ليه.وطبعا متنساش أتعاب المكتب الهندسي، وده بيكون حسب المكتب اللي انت بتختاره.
كمان هتدفع رسوم تراخيص تأمينات اجتماعية بنسبة 2.5% من تكاليف البناء الإجمالية.مش بس كده انت كمان هتدفع حاجة اسمها رسوم تحسين قيمتها 20 جنيه ودي هتكون لكل متر في الدور الأرضي بس
رايح فين استني استني لسه المصاريف مخلصتش هتدفع كمان 700 جنيه دمغات هندسية وكمان 600 جنيه حوافز هتدفعها في المجلس.
وكمان هتدفع 200 جنيه رسوم شهادة المتغيرات المكانية واللي بتكون حسب المساحة،
أما بقى لو بتسأل عن المستدات المطلوبة لاستخراج تراخيص البناء بالقرى، فأول حاجة عندك هي صورة بطاقة الرقم القومي وتكون البطاقة سارية .كمان لازم تجيب شهادة إشراف وعقد مقاولة من المهندس اللي انت اخترته، ومتنساش تقوله يعملك رسم هندسي يوضح فيه موقع الأرض وكل التفاصيل المحيطة بيها
وطبعا متنساش وانت رايح تاخد عقد الأرض اللي بيثبت الملكية الصريحة ليك.كمان متنساش تحتفظ بكل ايصالات السداد للمبالغ والرسوم المستحقة لاستخراج الترخيص لانك هتحتاج تقدمها كمستند رسمي.
قولنا رأيك في قانون البناء الموحد الجديد، وهل شايف إنه هيقضي على المخالفات فعلا؟
