علقت الإعلامية رضوى الشربيني، على واقعة نشر فيديو رقص الفتاة صاحبة الفستان الأزرق، التي تصدرت التريند الأيام الماضية، بعد انتشار فيديو رقص لها في أحد الأفراح.
وقالت “الشربيني” خلال برنامج “هي وبس“: “أي حد بقى ممكن يصور أي حاجة في أي مكان وينشره في المكان اللي يحبه تحت مسمى الحرية الشخصية”.
أول تعليق ناري من رضوى الشربيني على فيديو صاحبة الفستان الأزرق
وتابعت: “هتقولولي مينفعش تدافعي عن واحدة بترقص؟ أنا مش بتكلم على الرقص أنا بتكلم على الموقف، وأنا بطالب المسئولين عن رقابة الإنترنت إن لازم يبقى في عقوبة لأي بني آدم ينشر أي حاجة تخص الحياة الشخصية لشخص تاني”.
وأكملت: “هي حرة من حقها تعمل اللي هي عاوزاه.. عندها ربنا يحاسبها، الموضوع بتاع الشير ده بقى سبب خراب بيوت وتهديد وسمعة سيئة لناس كتير.. ده إفتراء على خلق الله”.
وأضافت: “برجو المسئولين وأي حد بيسمعني.. أرجوكم عاوزين رقابة على فكرة إن حد ينشر حاجة تخص الحياة الشخصية لحد تاني، الموضوع مستفز أوي”.
وفي وقت سابق،تداول نشطاء مواقع التواصل الاجتماعي “فيس بوك”، مقطع فيديو لفتاة ترتدي فستان أزرق وهي ترقص في أحد الأفراح، وظهر اندماجها وتفننها في إبراز مواهبها الفنية ومقوماتها الجسدية، وهو ما أثار موجة من الانتقاد لذات الرداء الأزرق، بعد تداول الفيديو بشكل واسع، ما دفعها إلى الظهور مرة أخرى لتطلق استغاثة لحذف الفيديو خوفا من الطلاق.
وعلقت نهاد أبو القمصان، عضو المجلس القومي لحقوق الإنسان على الفيديو المنتشر، من خلال فيديو بحسابها على فيسبوك، قائلة: «فتحت اليوتيوب لقيت بنت قمر، بترقص بمنتهى التلقائية والسعادة والفرجة على الفيديو مبهجة، لأنها بترقص الرقص البلدي المصري على أبوه».
وأضافت: «اللي أزعجني أن لقيت أوصياء للإنترنت، داخلين بمنتهى الوقاحة، أنا بعتبرهم براغيت وفيران الإنترنت بتعليقات سافلة وكلها جرايم».
