الأيام الأخيرة انتشر كلام عن تطبيق زيادة جديدة على شرائح الكهرباء المختلفة خلال شهر يوليو الجاري، لكن حتى الآن لا يوجد إعلان عن تطبيق هذه الزيادة.
لكن السؤال هنا: هل هيتم تأجيل الزيادة زي ما حصل قبل كده؟ وليه ما تمش تطبيقها لحد دلوقتي؟ والزيادة دي قد إيه؟
السنين الأخيرة الحكومة أعلنت زيادة أسعار شرايح الكهربا، لكن كانت بتأجلها أكتر من مرة بسبب الظروف الاقتصادية للبلد، لكن السنة دي كان ظهر كلام أنه خلاص هيتم تطبيقها في شهر يوليو الجاري
لكن لحد دلوقتي مفيش أي زيادة في أسعار الكهربا، وده خلى ناس كتير تسأل هي الحكومة هتطبق الزيادة ولا لأ؟
بص يا سيدي، حسب مصدر مطلع بوزارة الكهربا لمصراوي، إن إقرار الزيادة الجديدة في شرايح استهلاك الكهربا واقف لحد اللحظة دي على قرار من مجلس الوزرا ببدء تطبيق الأسعار الجديدة على الشرايح المختلفة
وقال إن ممكن يكون التأخير ده بسبب ظروف العيد لكن من المؤكد تطبيقها خلال الفترة الجاية
ده قال كمان إن الأسعار اللي تم إعلنها في 2020 هيتم تغييرها بالكامل وده بسبب تغير سعر الصرف وزيادة أسعار البنزين و السولار، لأنه بيمثل عبئ كبير على الحكومة
ولما إتسأل هو ممكن الحكومة تأجل تطبيق الزيادة السنة دي زي ما حصل قبل كده؟
رد وقال إن تطبيق الزيادة بقى أمر حتمي خصوصا بعد حصول الحكومة على القرض الأخير من صندوق النقد الدولي اللي اشترط أكتر من مرة رفع الدعم عن الكهربا
ومش بس كده ده قال إن الزيادات الجديدة لا غنى عن تطبيقها نهاية يوليو وده بالنسبة للعدادات القديمة، أما بقى بالنسبة للعدادات مسبقة الدفع أو اللي بتشتغل بكارت الكهربا فدي بقى هيتم تطبيق الزيادة عليها أول ما يتم الإعلان عنها
وقال كمان إن لحد دلوقتي مفيش أي تعليمات صدرت بالزيادة الجديدة المقرر تطبيقها في يوليو وتحصيلها في أغسطس الجاي، عشان كده فواتير شهر يوليو اللي هتتحصل الشهر الجاي هتكون بالأسعار القديمة سواء للعدادات القديمة أو مسبقة الدفع، لكن في حالة إصدار أي تعليمات بالزيادة فهيتم تطبيقها فورا
وبحسب مصدر بشركة الكهرباء لمصراوي، إنه هيتم إقرار زيادات مختلفة على الشرايح الـ 6، أما بقى الشريحة السابعة اللي بتستهلك أكتر من 1000 كيلووات فهيتم زياداتها من 145 قرش لـ 2 جنيه و20 قرش بزيادة قيمتها 75 قرش لكل كيلو
وعن تطبيق الأسعار الجديدة فهو قال إنها جت بعد دراسة مستفيضة نتيجة تغير سعر الصرف وزيادة أسعار الغاز الطبيعي و المواد البترولية اللي بيتم استخدامها في عمليات إنتاج وتوليد الكهربا وده شكل عبئ على الوزارة، خصوصا بعد ارتفاع معدلات الفقد الناتجة عن زيادة معدلات سرقات التيار الكهربي في بعض المناطق
وعلى فكرة ده قال إن كل قطاعات الشئون التجارية والنظم بمختلف الشركات انتهت من استعدادتها لتطبيق برامج الزيادة وقت تطبيقها
وده لأن من المفترض أن شركات التوزيع هتعمل اختبارات للعدادات عشان تتأكد من صحة وسلامة تطبيق البرنامج الجديد الخاص بحساب شرايح الاستهلاك الجديدة، وده عشان تمهد ربطها مع برامج الشحن المختلفة مع شركات الشحن الالكتروني
نسيت أقولك أن الدكتور مصطفى مدبولي رئيس مجلس الوزرا كان أعلن في أكتوبر 2022 تأجيل تطبيق زيادة أسعار شرايح الكهربا لحد 30 يونيو 2023، وده بعد ما كان مقرر تطبيقها في أول يناير 2023، ده غير أنها أتاجلت 3 مرات قبل كده بسبب الظروف الاقتصادية، نتج عن التأجيلات دي تحمل الدولة 25 مليار جنيه بسبب زيادة أسعار الغاز الطبيعي و الوقود
ودلوقتي قولنا رأيك في أسعار شرايح الكهربا الجديدة؟
