ما يفعله سعد الصغير في حياته يجعلنا نقول هذا كثير والله الستات في حياته ليس لهم آخر وكل واحدة ورائها مشكلة كبيرة ولا يعرفوا لماذا نجوم الأغاني الشعبية والمهرجانات حياتهم هكذا.
اللي حصل المرة دي بين سعد الصغير ومراته برلنتي عامر حكايته كبيرة وعشان كده كشفت سر الانفصال بينهم وكمان حكاية شغل المحاضر والأقسام بينهم هقولكم عليها وليه وصلوا لحد كده.. تابعوا معايا التقرير التالي:
غالباً كده سعد الصغير كان مجبر إنه يعلن جوازه من برلنتي عامر.. وده مش عشان خاطر عيونها ده عشان الشائعات الكتير اللي اتقالت وقتها وهي أصرت يطلع معاها في فيديو ويقول إنهم اتجوزوا رسمي، ده حصل بعد ما كان سعد الصغير مستقر مع مراته أم عياله. تخيلوا عنده ابن أطول منه ولاعب كرة قدم يادي الخيبة.
المهم الجواز تم بين برلنتي عامر وسعد الصغير بعد شائعات كتير عن علاقتهم وبرلنتي نشرت فيديو متسجل للمطرب سعد الصغير على حسابها في فيسبوك وقالها إنتي مراتي حبيبة قلبي وكل سنة وانتي طيبة ويارب نبقى مع بعض السنة الجاية”.. لحد هنا والأمور مية مية.
انفصال مستمر
هما كل شوية يتطلقوا.. ده كلام الجمهور دلوقتي أصلهم زهقوا من الحوارات الكتيرة دي.. وده لأن برلنتي عامر طلعت في شهر فبراير اللي فات تقول إنها انفصلت عن سعد الصغير.. وقتها الاحترام والتقدير ليه كانوا هما الأساس.
ياريته تم وقتها كنا خلصنا بس عشان السبب وقتها تافه رجعوا لبعض تخيلوا بتقول إنها انفصلت عنه عشان هو وعدها تبقى معاه في المسرحية اللي هيعملها في السعودية قائلة إن سبب طلاقهما هو المسرحية التي كان بيشارك فيها سعد الصغير في السعودية وكان في وعد ياخدها معاه بس محصلش نصيب أصله قالها تبقي طالق بالتلاتة لو مكنتيش معايا وعشان مسافرتش قالت يافكيك وأعلنت الانفصال.
كلاكيت تاني مرة
من ساعات بقى أعلنت برلنتي عامر تاني إنهم انفصلوا تاني أصل المرة الأولانية اللي كانت طلاق بالتلاتة دي عدت كده عادي.
ما علينا بردوا الانفصال المرة دي رسمي وعليه مشاكل وحكايات ملهاش آخر.. وسعد الصغير المرة دي في واحدة تانية في حياته لو تفتكروا من فترة كده حصل كلام عن واحدة اسمها رانيا صالح قدمت بلاغ للنيابة إن سعد ومراته برلنتي اعتدوا عليها في شقتها وهوب الموضوع قلب بجد وراحت مطلعة فيديو وهما داخلين العمارة عندها.
المهم هو عمل محضر قصادها بردوا والموضوع هدي شويتين لحد ما طلعت رانيا دي الست اللي بسببها حصل الانفصال بين سعد وبرلنتي.. وعشان التأكيد إن في خيانة قالت إن النصيب مع سعد الصغير وقف لحد الخيانة.
طيب ما هي برلنتي عملت كده قبل كده في مرات سعد الصغير نور الهدى وهاجمتها وعملت حكايات معاها وإنها بتتعرض لتهديدات وكلام رخم على جروب ستات واتهمت نور إن هي اللي مسلطاهم.. لكن برلنتي قالت إن في ناس وصحفيين محترمين بيحاولوا يتواصلوا معاها وهي مش عارفة ترد وبتكتب الكلام بالعافية وبيتكتب غلط يعني من الآخر تلفونها متراقب.. ورزعت واحدة حسبي الله ونعم الوكيل..
ده غير بقى إن في تهديدات علشان متتكلمش ولا تقول للناس حاجة بس الموضوع كبير جداً ومش مجرد واحدة بيخونها سعد معاها لا ده في فيديوهات وإثبات وفويسات وسعد نفسه بيقول دي عندها داء خطير يعني إيه الكلام ده مش عارفة بس قال إن هو غلط علشان حاجة غريبة.. برلنتي أكدت إنها مينفعش تنزل مستواها وتتكلم على واحدة زي دي بس الموضوع فيه بلاوي ومصايب تشيب.
تفتكروا ليه سعد الصغير بالذات حكاياته كتيرة مع الستات.. وموضوع برلنتي عامر هيخلص لحد كده زي اللي قبله ما خلص ولا لسه المستخبي هيبان أكتر الفترة الجاية؟
