هل لاحظتم تغير حجم البيض في الأسواق، فما سر تغير حجم البيض مع ارتفاع سعره، تابعونا من خلال التقرير التالي لتعرفوا المفاجئة.
من 2022 ولغاية دلوقتي كرتونة البيض عاملة للمصريين قلق والصراحة الناس مستغربة: ازاي كرتونة البيض سعرها يعدي ال80 جنيه ويقرب من ال90 كمان.
ومش بس السعر اللي أصبح مشكلة حتى نوعية البيض نفسها بقى فيها أزمة.ودلوقتي أحمد نبيل، نائب رئيس شعبة البيض باتحاد منتجي الدواجن كشف سبب انتشار بيض حجمه صغير خلال الفترة الأخيرة في الأسواق.
وحسب كلامه، اللي بيحصل ده نتيجة تقليل حجم الوجبات المقدمة للدواجن من الأعلاف بعد ارتفاع أسعارها ونقص المعروض منها في السوق ، وطبعا ده بيأثر على حجم البيض وإنتاجه بشكل عام.
والغريب في الحالة دي، ان الحكومة من شهر ديسمبر اللي فات وهي بتفرج عن الأعلاف تدريجيا و بالفعل خلال الاسابيع الأخيرة بدأ التجار يتكلموا عن انخفاض اسعارها بس للاسف شكله الحلو ميكملش.
ورئيس، شعبة البيض قال إن أسعار الأعلاف رجعت تزيد من تاني بسبب بطء الإفراج عن خامات الأعلاف الموجودة بالموانئ وده اللي بخلي المستوردين يتحكموا بالأسعار.
وحسب آخر تعاملات السوق، دلوقتي سعر طن الصويا 29 ألف جنيه مقابل 26 ألف جنيه الأسبوع اللي فات،وزاد سعر الذرة إلى 14 ألف جنيه مقابل 13 ألف جنيه.
بس في المقابل عبدالعزيز السيد، رئيس شعبة الثروة الداجنة بغرفة القاهرة التجارية، أكد إن سعر كرتونة البيض فى أرض المزرعة نزل حوالي 7 جنيه ليتراوح بين 76 جنيها للطبق الأبيض و78 جنيه للطبق الأحمر فى المزرعة.
والمفروض انه خلال الساعات الأخيرة تراجع سعر كرتونة البيض الأبيض للمستهلك إلى 82 جنيه والأحمر إلى 85 جنيه.وحسب السيد، تربية الدواجن شغال فيها مابين 50 و60 ألف منشأة، بينها 20 شركة كبيرة، وخلال الشهور الأخيرة الكل كان بيشتكي من نقص الاعلاف.
لدرجة ان عدد كبير منهم قفل المزارع وخرج عدد من النواب يقولوا ان ثروة مصر من الدواجن هتنتهي خلال 40 يوم وكلنا شفنا فيديوهات رمي الكتاكيت والتخلص منها.
ولو فاكرين من كام اسبوع سمعنا عن بيض مخصب في السوق والناس حست بالقلق، ساعتها محمد الشافعي الصحة، نائب رئيس الاتحاد العام لمنتجي الدواجن في مصر وضح الفرق بين الاتنين.
يعني البيض المخصب ناتج عن الأمهات إنما البيض العادي اللي متعودين عليها طالع من دواجن معينة اسمها دواجن بيض المائدة.
ومع أزمة الاعلاف، المربين مبقوش عاوزين كتاكيت لان تكلفة تربيتها عالية فاتجهوا لبيع البيض المخصب ده في الأسواق بسعر أقل من بيض المائدة.
والاكيد ان كل الانواع دي صالحة للأكل بس هيفضل السؤال كده خلاص كرتونة البيض مش هتنزل عن 80 جنيه؟ طيب وسعر الفراخ نفسها هتوصل لفين؟ فعلا الكيلو عدى ال60 جنيه؟
قوللنا الأسعار في منطقتكم
