![صفاء الهاشم](https://www.l2tat.com/wp-content/uploads/2023/02/erem-news_import_media_2020_12_Eh0M25_WsAIuklR-1029x675-1.webp)
رجعت مرة تانية صفاء الهاشم للهجوم على المصريين اللى شغالين في الكويت، بدون سبب كده من غير ماحد يعملها حاجة، وطالبت بتقليل عددهم أو منعهم من الأساس من دخول الكويت مرة أخرى.
إيه سر هجوم صفاء الهاشم على المصريين في الكويت ؟ .. وهل هيتمنع فعلا المصريين من دخول الكويت ؟ .. ده هنعرفه مع بعض في التقرير التالي:
هجوم كبير الفترة دى على المصريين اللى شغالين في الكويت، مرة واحده كده وبدون سبب طلع عدد كبير من الشخصيات المهمة في الكويت وهاجمت المصريين اللى شغالين هناك وطالبت بأنهم يرجعوا ومايروحوش هناك تانى.
من أسبوع بالظبط كان نائب كويتي، طلع وقتها وطالب بتقليل العمالة الوافدة تماما، ومنها العمالة المصرية وقال أنهم عبئ كبير على الكويت وعلى الاقتصاد الكويتي، والظاهر كده الموضوع عجب النائبة الكويتية السابقة صفاء الهاشم، ورجعت من تانى تصرح بأن العمالة المصرية في الكويت بتهدر موارد الدولة ومش مدية أي فرصة للكوايتة أنهم يتمتعوا ببلدهم.
وكمان قالت بالنص كده: “هو إيه كل العمالة مصرية دي، دول بيجوا هنا يعملو ملايين من فلوسنا ويروحوا بلدهم يشتروا قري سياحية وفلل”.
بعد التصريحات دي الناس قالت هى صفاء الهاشم مالها مستكتره الفلوس علينا ليه، ده احنا جايبينها بعرقنا واشتغلنا لحد ما تعبنا، وسألوا ليه بتعمل كده دلوقتي.
اتضح أن الموضوع له علاقة بالأزمة الاقتصادية العالمية، وهي عايزه تحافظ على فلوس بلدها وشايفة أن أسلم طريقه هي تقليل العمالة الغريبة من الكويت واللي أغلبها زى ما أنتم عارفين مصريين.
وكمان لأن المصريين دلوقتي بيحاولوا يسافروا الكويت الفترة دى، لان الدينار الكويتي دلوقتي بيعمل تقريبا 100 جنيه مصري فكل المصريين عايزين يسافروا الكويت علشان في هناك فلوس حلوه ويقدر يوفر منها العامل المصري اللي يكفيه بعد كده لما يقعد ويبطل شغل.
صفاء الهاشم اللي جددت هجومها على العمالة المصرية وطالبت بمنعهم من الدخول.. مش بس كده لكن كمان المصريين هناك مسلموش منها لأنها طالبت بفرض رسوم كبيرة على العمالة المصرية الموجودة في الكويت في اي مصلحه يعملوها، يعني لو مواطن مصري شغال في الكويت ومره واحده تعب وحب يروح مستشفى فهي طلبت بفرض رسوم كبيره عليه وعدم صرف أدوية مجانية ليه، وبعد التصريح ده طلعت وقالت ان ده خفف أو هيخفف من تواجد مصريين هناك ودخولهم المستشفيات.
الأخطر من كده أنها طالبت أن اي عامل مصري شغال فى مهن الجزارة والسائقين أنهم يمشوا من الكويت ويجي بدالهم عمال من اندنوسيين وباكستانين، لأنهم أرخص من العمالة المصرية، على الرغم من أن العمالة المصرية أمهر منهم وأشطر بكتير.
الفكره بقي والخوف عند العمالة المصرية دلوقتي أن كلام صفاء الهامش والنائب الكويتي ده يطبق ويمنع العمالة المصريه من أنها تدخل الكويت تانى نهائى بغرض الشغل، ده طبعاً هيأثر على العمالة المصرية جدا.
ولكن الحمد لله كان طلع وزير القوى العاملة المصري من شهر تقريباً وقال إن العلاقة بين الكويت ومصر كويسة جدا والكلام عن تقليل العمالة المصرية في الكويت غير صحيح خالص، لا ده كمان ها يتم زيادة عدد العمالة المصرية في الكويت عن طريق اتفاقات تمت بين السلطات المصرية والكويتية، بموجبها اللى عايز يسافر الكويت وزارة القوى العاملة المصرية هى اللى ها تدور ليه على فرصة شغل هناك.
كل العماله المصريه دلوقتي بتدعي ان مايتمش الموافقة على مطالبات صفاء الهاشم، وأن كلام وزير القوي العاملة هو اللي يمشي. من رأيكم تتوقعوا كلام مين اللى يمشي، اكتبوا في التعليقات.