معك 3 جنيه؟ يمكنك شراء فوطة أو لحاف أو حتى ملاية، أسعارنا لا تقبل المنافسة، سعر الشواية بـ 19، والتلفزيون بـ 200
صدقت الأمر؟ هذا ما فعله سنتر شاهين للأدوات المنزلية والكهربائية، اعلن عن عرض وصدقه العديد من العملاء وذهبوا الى السنتر في تمام التاسعة صباحا للاستفادة من العروض ولكن ما وجدوه كان صادم لهم، سنتعرف على التفاصيل من خلال التقرير التالي:
سنتر شاهين غني عن التعريف، وشعاره ملوش منافسين، بس ببساطة أوي استغل ظروف الناس الصعبة وارتفاع الأسعار، وان الناس بتتعلق بأي قشة وبتكح تراب.
وبقاله شهر بيعمل دعاية ضخمة في فرع فيصل عن إن يوم الجمعة 4 نوفمبر هتبقى الجمعة الذهبية وإنك تقدر تشتري أي حاجة ب3 جنيه ومن غير أي شروط، واسم الإعلان كان “فعلا” ومعناها إن العرض ده فعلا وهتيجي تلاقيها فعلا.
آلاف الناس صدقت وصحيت من الفجر، وناس جات من محافظات تانية، وراحت وقفت قدام السنتر عشان تلحق العروض، لكن الموضوع كان كارثة، الناس بيداس عليها في الشارع من كتر الزحمة.. وستات طرحتها بتقع، خصوصا ان شارع فيصل اصلا زحمة من غير أي حاجة.
وكمان واقفة الناس قدام الفرع طبيعي وقفت حركة الشارع وعطلتها، لكن قصاد كل ده العرض كان وهم، أما العرض الحقيقي هو إنك تشتري منتجات بقيمة 10 آلاف جنيه.. وتاخد قصادها أي منتج بـ 3 جنيه.
وناس كتير قالت إنهم كانوا بيبعتوا على رسايل الصفحة إذا كان للعرض ده شروط معينة أو قيود ولكن الرد كان بيأكد إن مفيش اي شروط، وإن الاسعار زي ما هي في الاعلان.
وشهود كتير من الموجودين قالوا إن السنتر طلب من العمال يجيبوا أهاليهم تدخل السنتر الصبح بدري.. وبعدها خرجوا للناس قالولهم البضاعة بتخلص ومفيش كاشير اصلا!
وجزأ تاني كمل وقال إنهم دخلوا المحل واتخانقوا مع العمال وقالوا هياخدوا المنتجات بنفس العروض اللي كانت في الإعلان.
لكن في ساعتها إدارة السنتر طلبت الشرطة، والظباط قالوا للناس يسيبوا كل حاجة وإلا هيعتبر الموضوع سرقة.
والسنتر مسح إعلانات العروض وأعلن على صفحته، إن فرع فيصل اتقفل الجمعة لدواعي أمنية بس، وللأسف الغلابة دول اتعرضوا للهجوم إنهم صدقوا الدعاية دي وضحوا بيوم اجازتهم ونزلت .
يعني في الآخر الناس الغلبانة هي اللي طلعت غلطانة، أهالي كتير محتاجة تجهز بناتها، وشباب كتير بتجهز نفسها قالوا نروح نشوف مش هيحصل حاجة، ورغم إن يمكن منهم كتير متعلمين وفاهمين إن الاحتمال الأكبر إنها تبقى نصب.
فتخيل انت حد مات من الناس اللي راحت من شدة الزحمة والتدافع .. كارثة ولازم فيها وقفة، ولازم جهاز حماية المستهلك يبقى له موقف واضح.
وردود الافعال كلها مستغربة غرض الإعلان ده، وشايفين إن سنتر شاهين خسر سمعته بسبب حركة منعرفش كان غرضها “الشو” ولا يركب تريند وخلاص.
