هل طلاقها كان السبب؟..مفاجأة في السر وراء تغير شكل أصالة

السنة اللي فاتت دي كلها مكنش عندنا أي كلام جديد عن أصالة غير شكلها اللي اتغير وكل شوية تصغر أكتر وأكتر.. والناس كانت بتسأل عن السر، وهي رافضة تقول، وفجأة قررت تقول كلام مش لايق على بعضه.. بس احنا كلنا عارفين السبب الحقيقي.

أي ست بتدخل قصة حب جديدة بتحلو عشان بتهتم بنفسها وبتحب تظهر بشكل جديد، وأي ست بتتجرح أوي بتتبهدل شوية وبعد كده بتفوق لنفسها عشان تنتقم من اللي سابها خصوصا لو عشان واحدة تانية أصغر وأحلى.

والفنانة أصالة على قد ماهي ناجحة وبتوصف نفسها دايما إنها ست قوية، بس في الآخر هي ست،اتجرحت بشكل ميتوصفش خدت وقتها في الاكتئاب والعلاج ومحاولة تخطي الأزمة دي وبعدين بدأت بقى تنتقى على طريقة المرأة الكيادة

أصالة جربت تتجوز انتقاما من طليقها طارق العريان اللي سابها عشان الموديل الجميلة الصغيرة الحلوة نيكول سعفان.. حست إنها مخدتش حقها برضه والموضوع لسه معلم معاها.. قالت خلاص هستغل كل الإمكانيات المتاحة عشان أبقى أحلى منها.

ومع كل حفلة ليها أصالة كانت بتصغر أكتر، وشكلها بيتغير من يوم للتانين والناس كلها بقت بتسأل هو في ايه.. حاولت في الأول تخبي وتقول إنها زعلانه إن الناس مركزة مع شكلها مع إن المفروض يهتموا بفنها بس.

لغاية ما في الآخر كشفت الحقيقة،وصرحت بخطتها كلها، وفي أحدث ظهور ليها في كواليس برنامج سعودي أيدول، قالت كل الكلام من غير أي فلتر، كعادتها يعني، اللي بتكتبه على تويتر حاجة، واللي بتقوله بعفوية حاجة تانية خالص.

أصالة في آخر تصريحات ليها لبرنامج تريندينج، قالت إنها عاوزه ترجع تاني لشكلها وهي في عمر 25 سنة، مش هتسيب نفسها تكبر، عندها بنت فاتحة مركز تجميل، بتعمل كل حاجة عشان تحسن شكلها وترجعها عيلة من تاني

بعد ما كانت أصالة بتنفي إنها عملت عمليات تجميل، وبنتها شام الذهبي قالت إنها بتديها فيتامينات ومقويات للبشرة وكلام كده طبي مش مفهوم، كشفت المطربة الشهيرة كلها حاجة، وقالت إنها كانت بتعمل خطوات تجميل قبل كده اذت شكلها جدا.

أصالة غيرت في شكلها دقنها، وشالت حاجات مضرة من حوالين عينيها، وزنها قل، ورشاقتها بقت ملحوظة جدا.. وطبعا الشياكة دي ستايلست شاطرة تقدر تظبطها، أمال هتودي كل فلوس الحفلات والسفريات دي فين

من يومين أعلن لأول مرة ورسميا إن طارق العريان طليقها اتجوز نيكول سعفان،اللي كانت السبب في انفصالهم عن بعض.. ونيكول شابة جميلة خفيفة عالقلب، وليه أصالة متبقاش زيها، سبتني يا طارق طب أهو.

وعشان تغازل الجمهور ويقف في صفها،قالت أنا جمهوري ده بيدفع فلوس عشان يشوفني في أحسن صورة،  وشكلي هو استثماري، مش هظهر في أي صورة تاني وأنا شكلي تعبان، وهسيب الدنيا وأنا في هيئة واحدة عندها 25 سنة

مش عارفين لحد امتى أصالة هتفضل تعاني من مشاكل الهجر وإن أبو ولادها التوأم سابها عشان واحدة أصغر منها، رغم إنها اتجوزت بعده مرتين وعاشت حياتها برضه.