احتفال غريب لأهالي إسنا بالأقصر بقدوم شهر رمضان .. العروسة هي شاب يضع مكياج ويرتدي لبس عروسة في واقعة انتشرت بصورة كبيرة على السوشيال ميديا فما القصة؟
إيه الشكل الغريب اللى ظهر بيه ابن الاقصر ده؟ .. ليه عمل كده؟ .. والناس قالو عليه إيه؟ .. كل ده واكتر هنعرفه مع بعض في التقرير التالي:
امبارح كان فيه مشهد غريب خالص فى منطقة إسنا بالأقصر، ظهر فيديو لشاب حاطط مكياج على وشه ولابس لبس عروسه والرجاله عماله تلف بيه المنطقه على عربيه نص نقل، لولا ان الصوره ركزت عليه شوية ما كنش حد هيقدر يفرق بينه وبين العروسه الحقيقه.
كان حابك الدور قوى لدرجه أنه ماسك منشه هواء عمال ينش بيها على نفسه زى الستات بالظبط، ومش أى ست دى الهانم بنت المدينه زي ما بيقولوا فى الأرياف.
المهم أن التصرف اللى الشاب ده عمله قلب الدنيا على السوشيال ميديا، الكل عايز يعرف ايه الحكايه، لشكهم طبعاً أن الموضوع اكيد وراه حكايه، ماهو الشاب مش هيعمل كده لوحده يعنى، ده شاب من الأقصر اللى هما من اجدع الناس فى مصر، ويعرفوا في الواجب والعيب، وأكيد لو ظهور الشاب ده من غير سبب كبير فهيبقى عيب كبير قوى فى حقه وحق كل رجاله الأقصر.
واتضح أن الموضوع ده مش غريب على الأقصر، ومفيهوش حاجه عيب ولا حاجه، ليه أسبابه بس العمليه كانت افورت شويه من الشاب وخلاص.
وفقاً للكلام المتداول على المواقع الإخبارية فا ظهور الشاب ده بالشكل اللى انتم شفتوه كان جزء من طقوس لعاده سنوية تقام ليلة كل أول يوم من رمضان، فيها الأهالي بتفرح وتنبسط وتلف البلد كلها مع بعضها.
والمشهد ده بيبقى جزء بسيط جدا من فعاليات دورة شهر رمضان المبارك، واللى فيها بيطلع كل واحد معاه عربيه أو حتى موتوسيكل يلف مع الناس فى شوارع الأقصر كلها، ويتم خلال الجولة دى توزيع هدايا وحلويات والعاب وفاكهة على الأولاد الصغار من أبناء المحافظة.
اللافت بقى أن مشهد الشاب اللى لابس لبس عروسه ده معداش كده بالساهل على السوشيال ميديا، كان عليه ردود فعل كتيره قوي، وكل واحد ليه رأيه فى القصه دى، منهم اللى شايف انه من حقه يعمل اللى هو عايزه طالما بيحتفل بأدب وبدون ما يؤذي حد، ومنهم اللى شايف ان اللى عمله ده غلط وتشبه بالحريم، و مكنش يصح لراجل أبدا أنه يعمل كده، خصوصاً من الأقصر والمنطقة دى، فين الأدب وفين التربيه.
الاخطر بقى أن فيه ناس طالبت بالقبض على الشاب ده ومحاكمته، محاكمته بقضية ايه بالظبط محدش يعرف، المهم ان فين ناس متغاظه وخلاص من المشهد اللى هو عمله وشايفين انه لازم محاكمته.
لحد هنا ونكون وصلنا لنهاية الفيديو، وقبل ما نقفل عايزين نعرف بقى انتم رأيكم ايه فى اللى الشاب ده عمله، هل صح ولا غلط؟.
