إشترى قطعة والقطعة الثانية مجانا، لا إشترى قطعتين الثالثة مجانا ،إذا إشتريت ب2000 أو أكثر ستأخذ فوتشر عليه 50%. حاول أن تتجول في المحلات خلال السنة ستجد هذه العروض لدرجة تصيبك بالشك، فعل هذه العروض حقيقية ام أنها وهمية لجذب العملاء؟
شهر نوفمبر بيبدأ بنفضل نعد الأيام والليالى لحد أخر أسبوع فيه هتقولى لا ده فى أوله مش فى أخره عيد الحب المصرى4 نوفمبر ،عيد الحب؟ حب إيه اللى إنت جاى تقول عليه؟ أنا أقصد البلاك فرايداى اللى فى نوفمبر ياترى بتكون إعلانات وهمية ولا التخفيضات حقيقية؟ وهل لو وهمية ممكن المحلات تتحاسب؟ والغرامة كام؟ وإنت تعمل إيه فى الحالة دى؟ تفاصيل كتير حطها حلقة فى ودانك وإنت بتشترى يالا بينا..
طرق التخفيضات كتير، واللى بيضحك عليهم أكتر،تدخل المحل وتتهور لما تلاقى إعلان أسعار تبدأ من 150 وتلاقى الأسعار دى على كولكشن فى ستاند كده من الخمسينيات، من مخزون السنين اللى فاتت حقيقى زى ما بيقولوا كده مركونة ،لكن باقى المحل يقولك أصل ده نيو كولكشن. المفروض بقى تاخد بالك ومرة على مرة بتقفل من المحلات دى وتبقى بالنسبالك فى القايمة السودا.
ولا الإعلان على بلوزة مثلا ب 200ج وبخط صغير تحت يتشاف بالميكرسكوب يقولك بيتدى من 200ج .تقول عليها بقى جمعة بيضا، ربنا يجعلها بيضا دايما، هتقول جمعة ذهبية زى أغلب محلات الادوات الكهربائية أو حتى البلاك فرايداى،المهم النتيجة هتشترى هتشترى مفيش كلام.
الجمعة البيضا بين مؤيد ومعارض ناس شايفة إنك ممكن توفر من 300 ل500 جنيه هتشترى بدلة مثلا ب 1200 بدلا من 2000 يا بلاش !هتتهور وتقول فرصة دى كانت من شهر ب2000ج ،لا وتتقهر أكتر لو كنت إشترتها ورحت فى الجمعة البيضا ولاقتها هى نفسها بالسعر ده ،عارفة الإحساس ده أوى .
بس الغريب هل بتشترى الحاجات اللى تلزمك فعلا ومحتاجها؟ ولا تخفيضات بتخفيضات وفرصة مبتجيش غير كل سنة فبتعبى وخلاص؟ شكلك بتنزل وإنت وحظك وعلى الله حكايتك مش عايز حاجة معينة، وحقيقى فى اللى مخطط يشترى مثلا تلاجة غسالة وهكذا وتكون التخفيضات دى مفيده أحيانا لعروسة وتجيب شئ وشويات ومن مجاميعه.
لا كمان فى محلات طول السنة متعتبهاش، البنطلون مثلا ب 5 ألاف جنيه فالتخفيضات بقى 2500 بردوا يا بلاش إنت عارف كان بكام قبل التخفيض .
فى علاقة غريبة بين السن الصغير والأسعار ، كل ما اللبس بتاع الأطفال يبقى لحديثى الولادة هيكون أغلى فبعض الناس بتستغل الجمعة البيضا علشان يشتروا ماركات عالمية بأسعار على قد الإيد.
كل كلامنا ده عن المحلات اللى بتدخل فى منافسة الجمعة البيضا ، تدخل بقى محل وتقوله مفيش تخفيضات له؟ يقولك مش محتاجين نعمل تخفيضات إحنا أسعارنا طول السنة تخفيض والأسعار معقولة. لا بجد؟
دايما التخفيضات بتكون فى المحلات والمولات الكبيرة ،لكن واحد عنده معرض أجهزة كهربائية بيبيع كل حين ومين تلاجة هيدخل فى تخفيضات الفرايداى ليه؟
الحقيقة إن طرق الدعاية أحيانا بتكون خادعة للجمهور، وممكن فى لحظة تهور زى أغلب الستات اللى عندهم حب الشوبينج وكده يقعوا فى فخ الإعلانات الوهمية دى.
المهندس أيمن حسام، رئيس جهاز حماية المستهلك، بيقول إن الجهاز هيتصدى لمخالفات الاعلانات المضللة دى فى موسم تخفيضات الجمعة البيضاء ،وده طبقا لنص الماده (9) من قانون حماية المستهلك رقم 181 لسنة 2018، واللى بيلزم المورد والمعلن بتجنب أى سلوك خادع ينصب على عدد من العناصر منها، والإعلان عن وجود تخفيضات فى السعر على خلاف الحقيقة، واللى بيخلى عند المستهلك انطباع مش حقيقى أو مضلل، ووقوعه فى خلط أو غلط.
طيب نفترض إنت وقعت فى فخ الإعلانات الوهمية دى تعمل إيه؟
الحقيقة المهندس أيمن قال فى الحالة دى فى عقوبات رادعة للمعلنين، كل اللى عليك تقدم شكوى فى جهاز حماية المستهلك من خلال الخط الساخن 19588من أى تليفون أرضي أو عن طريق خدمة الواتس آب 01281661880 أو عن طريق الصفحة الرسمية لجهاز حماية المستهلك على مواقع التواصل الإجتماعى، أو الموقع الإلكترونى للجهاز أوالتطبيق الإليكترونى على الهواتف الذكية.
ووضح إن مأمورى الجهاز ومفتشيه هيراقبوا الأسواق خلال الفترةدى علشان يتأكدوا من صحة العروض المعلن عنها للمستهلكين، والتأكد من عدم تضمينها أى بيانات أو ادعاءات كاذبة ، وهيتم التحقق من الأسعار قبل وبعد التخفيضات من واقع سجلات وفواتير السلاسل والمحال المشتركة فى عروض تخفيضات الجمعة البيضاء.
كمان حذر جهاز حماية المستهلك، كافة الموردين والمصنعين والبائعين ومقدمى الخدمات، من استخدام عروض واعلانات خادعة للترويج عن تخفيضات وهمية لجذب المستهلكين ،وكمان أكد إنهم يلتزموا بالقانون ،وإن يكون السعر شامل الضريبة ،ويكون من حق المواطن يستبدل أو يرجع المنتج وفى حالة لو حد خالف كل القوانين دى ميلومش غير نفسه لان هتتطبق عليه الغرامة الى ب2 مليون.
بكده أكون خلصت كل التفاصيل الخاصة بالجمعة البيضا وتكون بيضا إن شاء الله بس خد بالك وحطلها حلقة فى ودنك الدور عليك إنت بقى متخليش حد يضحك عليك .
