واقعة غريبة ويمكن لأول مرة تحدث في مصر، والبطل: خطيب جمعة قررت وزارة الاوقاف تعاقبه بسبب ملابسه، كما سمعت فملابسه كانت سبب في أن ينقلب المصلين عليه فماذا كان يرتدي وماذا كانت عقوبته؟ هذا ما نتعرف عليه من خلال التالي:
لو حد سألك ايه رايك في خطيب الجمعة، طبيعي تفكيرك هيروح لأخلاقه وسلوكه، وهل بيقدر يختار مواضيع كويسة لخطبة الجمعة؟ وهل لغته كويسة ولا لأ؟ لكن اللي حصل في بني سويف كان حاجة تانية خالص.
مديرية الأوقاف في المحافظة، قررت نقل خطيب مسجد، وكمان خصمتله مكافأة شهر عشان لبس زي مخالف، ازاي؟
الحكاية بدأت من مسجد الحاجة فاطمة مجاور اللي اتأسس سنة 2018 في المحافظة، وعلى حسب كلام الأهالى، خطيب الجمعة هناك متحال على المعاش وشغال بنظام المكافأة، لكن قبل كده كان إمام مسجد، يعني عارف تعليمات وزارة الأوقاف لصعود المنبر كويس اوي.
والمشكلة بقى إن الأوقاف محددة شروط للخطباء ومنها شكل الزي ومواصفاته، فلازم الخطيب يكون لابس الجلباب أو الزي الرسمي المكون من العمة والكاكولا.
ورغم كده، الأهالى اكدوا ان خطيب مسجد الحاجة فاطمة اتعود يخطب الجمعة وهو لابس قميص وبنطلون، فاتفقوا يقدموا شكوى فيه لمديرية الأوقاف، وبالفعل المديرية شافت انه خالف التعليمات وكان لازم يتاخد إجراء ضده.
ولما الخبر انتشر على المواقع والسوشيال ميديا، الناس اختلفت، منهم اللي عاب على الأهالى وشافهم مركزين في أمور غريبة وسايبين الأمور الأساسية، خصوصا إن القميص والبنطلون مش زي غريب عن مجتمعنا، وكان الأفضل ليهم يركزوا في أداء الإمام ويشوفوا عنده علم ولا لأ.
بس على الناحية التانية، في ناس أيدت قرار الأوقاف وشايفين ان الالتزام بالزي هو احترام من الخطيب للمنبر ولطبيعة شغله، خصوصا ان في مهن كتير بتفرض على اصحابها الالتزام بزي معين والا هيتعاقب، زي الدكتور والمهندس.
وعشان تبقى عارف، في تعليمات تانية بتعرض الخطيب للمساءلة، زي الخروج عن موضوع خطبة الجمعة المحدد من وزارة الأوقاف، أو عدم الالتزام بالوقت المحدد ليها بين 15 إلى 20 دقيقة.
وكمان في عقوبة لو الإمام مقالش الخطبة وساب المسجد من غير ماياخد اذن مكتوب من الإدارة التابع ليها، وقبل خطيب بني سويف، ومن اسبوع تقريبا خطبة الجمعة كانت سبب في جدل كبير على السوشيال ميديا بعد مفارقة قارئ قرآن للحياة في المنوفية.
واللي حصل ساعتها ان خطيب الجمعة الأساسي مجاش، فاختار مجموعة من المصلين واحد من الأهلى بيخفظ القرآن، ولما طلع على المنبر، مجموعة تانية من المصلين اتخانقوا معاه وبدأوا يوجهوا ليه الفاظ صعبة وخرجوه من المسجد، بعدها الأهالي راحت ليه بيته عشان يراضوه، لكنه تعب وفارق الحياة فجأة.
انتوا بقى رأيكم إيه في قرار وزارة الأوقاف ، وهل خطيب بني سويف كان لازم يلبس الزي الأزهرى؟ شاركونا برأيكم.
