ليه مبناكلش لحمة الحمير؟..تامر أمين يثير الجدل ويدعو المصريين لأكل لحوم الحمير

هو إحنا ليه مبناكلش لحم الحمير والخيول؟ مالها لحوم الحمير؟ هذا السؤال الذى سأله الإعلامى تامر أمين وقال بالأدلة فوائد لحوم الحمير ، وإن كل الدول المتقدمة بياكلوها ..فليه لأ؟

هنا بقى الدنيا قامت عليه من جماهير السوشيال ميديا وقالوله..ومين قالك إننا مش بناكل لحم الحمير؟إيه يا أستاذ تامر كلنا فى الهوا سوا وعارفين اللى فيها ..كل يوم والتانى مطعم يقفل ويتشمع بالشمع الأحمر ..ده لسه من كام يوم فيديو إنتشر لصاحب المطعم إياها بتاع السيدة زينب مطعم بحة ..اللى مفيش حد مجربوش فيكى يا مصر! وزى ما بيقولوا شهد شاهد من أهلها!

يعنى مش لحمة برازيلى مستوردة؟ لالا بيقولك لحم حمير ..سواء بقى قال أو مقالش كلنا عارفين بس عمرنا ما بنقول ،وبالهنا والشفا ..ومطرح ما يسرى يمرى ..

لكن تامر أمين قال ..وبيطالب بدل ما تعمل نفسك بيضحك عليك ..لا أدخل المحل وأطلب نص لحم حمير مشكل بسلطاته وظبط الدنيا.. ياترى إيه سر مطالبات بعض الإعلاميين لأكل لحم الحمير والفراخ المجمدة كمان! تخيل؟ .. هل دة لمواجهة أرتفاع الأسعار؟ اللى جاى كلام خطير ..

مفيش على لسانهم الأيام اللى فاتت غير كل الدول المتقدمة بتاكل كده..وزى ما يكون لعنة وصابت كل الإعلاميين ..إشمعنا هنقلد الدول المتقدمة فى أكل لحوم الحمير والفراخ المجمدة .. واللى هو أنا باكلها عادى فالشعب كل ياخدهم قدوة ونعيش علي الفراخ المجمدة ..

الحقيقة الأيام اللى فاتت حصلت بعد الوقائع اللى خلت الناس تكره العيشة واللى عايشنها ..وبلاها أكل خالص ،مش هيبقى غلاء فى كل حاجة ووجع بطن .. هنا بقى بعض الإعلاميين من وجهة نظرهم شايفين إنهم بيساعدوا فى حل الأزمة الإقتصادية فى البلد..

من بعد واقعة بحة الشهيرة والفيديو اللى قلب الدنيا ..أنتشرت الأخبار إن تم ضبط جزار باكستانى فى الدقهلية بيبيع لحوم الخيول والحمير وعلى عينك يا تاجر ..والغريب إن الجزار أعترف وقال يا جماعة دى لحمة حصان مش أزمة يعنى ..

تامر أمين أكد إن الراجل قالهم دي حلال ومش ببيع حاجة حرام؛ لكن هى مش مصرح ببيعها فى مصر .. تبيع لحوم الأغنام والماعز والبقر والجاموس بس.

تامر أمين أستغرب إن أزاى الباكستانى ده بيبع كيلو لحم الحصان ب160جنيه! وقال أنا معلوماتي أن الحصان غالي؛ معلوماتي أن الحمار من 12-15 ألف جنيه النهاردة والحصان كمان غالي بأرقام كبيرة أزاي لحم الحصان الكيلو بـ 160 جنيه؟ ده أكيد خيول مريضة وبعافية وفى اواخر أيامها

هو أحنا ليه مبناكلش لحم أحصنة ولحم حمير؛ خلونا في الكلام العلمي الأول ، لحم الحصنة والحمير بيباع ويؤكل في دول كتير في العالم.. ومن الأطباق الغالية جدا في باريس؛ أنا لما كنت في باريس من كام سنة في أحد أشهر المطاعم هناك اكتشفت أن أغلى طبق هو لحم الخيل ولما سألت أنتوا أزاي بتاكلوا الخيل؛ قالولي دا صحي جدا..

السؤال هنا هل لحوم الأحصنة والحمير أمنة؟
تامر أمين رد وقال عشان الناس اللي بتبقي خايفة ويقولك أنا أكلت امبارح سندوتشات سجق وكبدة وبيتهيقلي أنها لحم حمير ممكن أموت أو اتسمم فأنا بطمنه وأقوله متقلقش أوي..

ده بالنسبة للحوم بغض النظر عن إن صاحب مطعم بحه نفى الفيديو اللى إنتشر وقال إ ن الفيديو مش حقيقي ، والشخص اللي ظهر فيه بينتحل شخصيته، وإنه واخد فلوس علشان يقول كده، مش معقول هاقول على نفسي كده!
بس واقعة الجزار الباكستانى حقيقة وحصلت فعلا ..ولاقوا عنده راسين لحصانين

اما بقى بالنسبة للفراخ المجمدة .. الإعلامى رامي رضوان قال أنها السبب في خفض أسعار الدواجن أساسا..ليه محسسنى انها كارثة أنا باكلها عادى .. تتوقعوا يعني إن البرازيل مثلا هل بتصدر الفراخ ومش بتاكلها انتوا فاكرين الدول المتقدمة عندهم فرارجية؟

من هنا بعض الناس قدامها حلين إما ان تحصل موافقة مجتمعية على اكل لحوم الحمير والأحصنة وبالتالى هتكون مقننعة ومصرح بها أو تكون نباتية ,,وبلاها لحوم وفراح مشكوك فيهم ،بس ياترى لما نمنع اللحمة والفراخ هيكون ده الحل؟هنقدر نوفر ولا كإنك يا أبو زيد ما غزيت؟