” الحكومة لازم تمشي”.. “والشعب بيغلي في الشارع” .. تصريحات جريئة قالها الإعلامي مصطفى بكري حيرت المصريين، طيب تفتكروا لماذا قال هذا الكلام الآن، وماذا يقصد به؟ وهل حقا سيكون هناك تغيير وزاري مرتقب؟ تابعونا من خلال هذا التقرير لمعرفة التفاصيل:
محمد مصطفي بكري محمد والمعروف بـ “مصطفى بكري”.. وده سياسي مصري وكاتب صحفي واعلامي، وبيعتبره المصريين واحد أهم الرموز السياسية المثيرة للجدل واللي معروف عنه إنه آرائه وانتماءاته السياسية بتتغييير كل شوية، ودايما بيطلعلنا بتصريحات غريبة عشان يثير الجدل.
طيب هو إيه اللي حصل؟ هقولك ياسيدى الإعلامي مصطفى بكري، طلع علينا بصريحات غريبة شوية وقال برنامج «حقائق وأسرار»، اللي بيتزاع على قناة صدى البلد، إن الدولة بتواجه تحديات كتيرة الفترة دي، لكن في ناس بتحاول تستغل الأزمة اللي بنمر بيها عشان تضرب استقرار الدولة.
وقال إن وضعنا دلوقتي متوقع إنه يكون في تعديلات وزارية وكمان حركة محافظين جديدة، وإنها أًصلا جاهزة عشان تتعلن في أي وقت.
ده كمان أكد إن التعديلات دي هيختاروا فيها قيادات تكون عندها كفاءات وقدرات على إنجاز تكليفات القيادة السياسية بسرعة.
وحسب كلام “بكري” فـ الرئيس السيسي عارف وحاسس بكل اللي بيعاني بيه المواطن، وعارف كمان أن الشارع المصري بيتكلم عن التغيير الوزارة وحركة المحافظين ومستنيها.
ورجع “بكري” يخفف من هجومه على الحكومة ولحق نفسه وقال إنه محدش يقدر يشكك في نزاهه الدكتور مصطفى مدبولي رئيس الوزراء، ولا في أداء الحكومة في الفترة اللي فاتت؟
لكن الأكيد إن المرحلة الجايه لازم تشهد تغيير في الوزراء، عشان تقدر مصر تنفذ البرنامج الوطني وتحقيق رؤيتها.
ورجع تاني وهاجم الحكومة وقال بالنص: «ناس كتير شايفه إن الحكومة الحالية أدت دورها في الفترة اللي فاتت، وأن مصر محتاجة دلوقتي لـ شخصية اقتصادية كبيرة لرئاسة الحكومة».
وقال بكري، إن تعيين رئيس وزراء اقتصادي بقى مهم جدا خاصة وإن التغيير بقى سنة الحياة وده اللي الشارع المصري شايفه وعشان كده القيادة السياسية بتدرس دلوقتي إنها تاخد قرار التغيير بكل هدوء ودقة.
والغريبة بقا إن الإعلامي مصطفى بكري، رجع في كلامه وكان بيناقض نفسه في نفس الوقت وقال كلام مختلف تماما ، وأكد إن في ناس شايفه ضرورة استمرار الوضع الحالي زي ما هوا وكان يقصد بكلامه بقاء الحكومة.
وقال إن الحكومة الحالية عملت مجهود كبيرة في الفترات اللي فاتت واكتسبت خبرات كتيرة، وإن استمرارها ضروري عشان نعدي الأزمة، وإن التغيير الوزاري ملوش أي لازمة ولا مبرر دلوقتي.
وقال إن في حالة غضب في الشارع المصري بسبب ارتفاع الأسعار في الشهور الأخيرة، وإن احتواء الشارع المصري في هذه الأيام دي بقى ضروري.
تتفكروا فعلا ممكن نسمع عن تعديل وزاري قريب، وهل ده فعلا اللي الناس محتاجاه؟
