حالة هرج ومرج ورعب عاشها الماك والزائرين فى الساحل الشرير الساعات الماضية بسبب ظهور القرش لهم فى البحر.. ويقال إنه ظهر فى شاطى منطقة تلال.
الكل بقى يجرى يمين وشمال وواقفين على الشط منتظرين ومترقبين اللى بيحصل وفجأة قدر ولطف ربنا وطلع واحد من فريق الإنقاذ وفى إيده القرش! وهنا كانت المفاجأة اللى كتير خدها بتريقة وهزار مش هتصدق طلعت إيه!
ياترى إيه اللى حصل فى تلال؟وليه المصيفين كانوا خايفين كده؟ هل فعلا طلع قرش؟ وليه الجمهور إتريق على تصرفات الناس على الشط؟ ليه البعض شاف إن الموضوع مضحك ومقدروش الحالة الصعبة اللى عاشوها ..اللى حصل مفاجأة كبيرة .. ولو رايح تصيف هقولك الأماكن اللى ممكن تلاقى فيها قروش خلى بالك ..
من بعد الواقعة اللى حصلت فى الغردقة الفترة الأخيرة ..لما القرش التهم السائح الروسى وبهدله ومخلاش فيه حته سليمة ..وكل الناس بقى عندها هسهس من البحر ،وبعد ما كانوا ينزلوا البحر ويدخلوا لجوه بقوا أخرهم على الشط وبس ..لإنهم مش ضامنين يطلع لهم القرش منين ولا إزاى ..
ورعب الناس مبقاش فى سواحل البحر الأحمر بس لأ.. الهوس وصل كمان لشواطئ البحر المتوسط ..وده اللى حصل فى الساحل مؤخرا وتحديدا فى منطقة تلال..
فيديو انتشر على التيك توك والسوشيال ميديا رعب المتابعين واللى كان ناوى يروح يصيف فى تلال لغى الفكرة بسبب إنهم قالوا إنهم طلعوا من البحر قرش ..وكان تحت عنوان مين فطم إبنه وأتعض السنادى؟
وفعلا ظهر فى الفيديو ناس كتير واقفين على الشط وخايفين جدا وبيجروا يمين وشمال ومش مصدقين اللى شايفينه..وفجأة ظهر واحد من فريق الإنقاذ طالع وماسك سمكة صاحية وبتلعب فى إيده ..المفاجأة بقى إنها سمكة تونة مش قرش !
ومن هنا الجمهور على التيك توك مسك الناس تريقة عليهم إنهم خايفين من سمكة تونة ..واللى يقول ده فرافير وخايفين من سمكة ،واللى يقول دول توتو خالص .. أما بتوع الساحل الشرير دول عليهم حركات!
لكن الناحية التانية الناس في الساحل الشرير بتشوف أن الموضوع مكانش يحتمل أى سخرية أو هزار، لأن اللى إنت مش بتخاف منه غيرك عنده فوبيا منه ومش موضوع مستوى إجتماعى ولا طبقات ..خاصة إن الموج كان عالى جدا وأكيد مع إنتشار الخبر على الشط والكلام بقى يجيب كلام وده يقول لده ف لحد ما يوصل الخبر لأخر واحد هيكون القرش بقى حوت ..والطبيعى هيكون فى خوف ورعب خاصة بعد واقعة السائح الروسي..بقى فى حذر ووعى شوية ..
اللى إتريقوا على رد فعل المصيفين فى الفيديو لو مكانهم كان هيبقى رد فعلهم غير كده خالص .ولاإنتوا رأيكوا إيه؟
مش واقعة السايح الروسى بس اللى سبب رعب للناس من البحر ..خاصة إن الواقعة دى كانت فى الغردقة وطبيعى يكون موجود قروش فى البحر الأحمر ..لكن هل ممكن يلاقوا قرش فى البحر المتوسط؟
أيوة ..حصل ولاقوا فعلا وكانت واقعة متقلش فى صعوبتها عن واقعة السائح الروسى، وحسب ما نشره موقع القاهرة 24 فى سبتمبر 2021 ..
أثارت واقعة إصابة أحد الغواصين بإحدى القرى السياحية بالساحل الشمالي جدل كبير لما سمكة القرش التهمته،وهنا أعلنت عدد من القرى السياحية، إغلاق شواطئها تمامًا بعد الإبلاغ عن ظهور سمكة قرش على الشواطئ، وإصابة منقذ ..
بعض النظر إن إتضح بعد كده إن الإصابة بسبب ألة ومش كائن بحرى لإن سمكة القرش عضتها بتكون زى هبشة فى الجسم مش مجرد تعويرة ،خاصة إنهم ملاقوش أى علامات لأسنان القرش على جسم المصاب..
ولكن ده ميمنعش أن فى خريطة لتواجد سمكة القرش فى البحر الابيض فى الإسكندرية فى شواطئ ميامي وبحر المكس والعجمي، وبتكون على بعد 15 كم من السواحل دى
إنتوا بقى لو مكان المصيفين فى تلال ولاقيتوا سمكة كبيرة من بعيد هتفكروا إنها سمكة قرش وتخافوا بردوا ؟ ولا شايفين إنهم أفوروا فى رد فعلهم زى ما البعض قال وإترريق عليهم؟
