خبر قيد يكون غريبا للبعض ومفرحا للبعض الآخر،وهو أنه سيتم تطبيق قرار زيادة الإيجار القديم من الشهر القادم لمن يمتلكون عقود إيجار قديمة، ولكن ما هي الفئات التي سيطبق عليها القرار، وما هو ميعاد الزيادة؟ وما الحالات التي يحق للمالك طرد المستأجر؟ تابعونا لمعرفة التفاصيل من خلال التقرير التالي:
قانون الإيجار القديم
في البداية لازم تبقى عارف أن قانون الإيجار القديم مبيسمحش بزيادة قيمة الإيجار، ومش من حق المالك أنه يطلب زيادة من المستأجر.
لكن بعد تعديل القانون الموضوع هيختلف شوية، لأن السنة اللي فاتت طلع قرار أن هيكون في زيادة في أسعار الإيجار القديم سواء كانت شقة أو محل.
ومن أول يوم 6 مارس اللي جاي وفقا للقانون هتتطبق الزيادة الجديدة اللي بتوصل لـ 15% من قيمة الإيجار.
الفئات اللي هتدفع
الزيادة في الإيجار القديم مش هتتطبق على كل الناس.. ومش كل الناس ملزمة أنها تدفع زيادة عن الإيجار اللي بتدفعه.
لأن القانون بيقول إن الزيادة هتكون على الوحدات التابعة للأشخاص الاعتبارية.. والأشخاص الاعتبارية دي اللي هي يعني الجهات والشركات الحكومية والخاصة.
إنما الأشخاص الطبيعيين اللي مأجرين شقق أو محلات أو حتى ورشة.. مش هتتطبق عليهم الزيادة.
الشقق والورش
يعني لو أنت قاعد في شقة إيجار قديم، يبقى مش هتدفع أي زيادة عن اللي كنت بتدفعه، لن مفيش لحد دلوقتي أي قانون بيقول تغيير قيمة الإيجار للوحدات السكنية، والتعديلات على الوحدات الإدارية وبس.
وبالنسبة للمحلات التجارية والورش، هي كمان مبتدخلش ضمن حالات الزيادة الجديدة لو كان اللي المالك شخص “طبيعي” لكن لو كان المالك شخص “اعتباري” زي مثلا المحلات اللي في “الموول” يبقى هتتطبق عليهم زيادة الـ 15%.
طرد المستأجر
القانون عشان يحفظ حق المالك، حدد عقوبات على أي شخص مش هيلتزم بقرار زيادة الإيجار.ومن حق المالك لو المستأجر مدفعش، أنه يرفع دعوى قضائية عليه، وبعدها هييجي إنذار للمستأجر، ولو مدفعش بعد الإنذار هيتم طرد المستأجر على طول والمكان يرجع للمالك مرة تانية، ومن حقه وقتها يأجره من جديد لشخص تاني.
فسخ العقد
وفي نقطة تاني مهمة في القانون الجديد.. خاصة بفسخ عقد الإيجار القديم.. و ده هيتم تطبيقه بعد 5 سنين من يوم تطبيق القانون.. يعني يوم 7 مارس سنة 2027 يعتبر عقد الإيجار انتهى.. والوحدة ترجع للمالك مرة تانية.
وعشان محدش يقلق، فسخ عقد الإيجار القديم ينطبق على الأشخاص الاعتباريين بس ومش هيتطبق على الوحدات السكنية أو على المحلات التجارية والورش بتاعت الأشخاص الطبيعيين.
زيادة إيجار الشقق
القانون الجديد اللي اتكلمنا عنه ده يعتبر خطوة أولى، وممكن في المستقبل يطلع قرار جديد للإيجار القديم للسكان والمستأجرين الطبيعيين.
والكلام ده كان قاله مجموعة من النواب في البرلمان.. وقالوا إن في نية طبعا لتعديل قانون الإيجار القديم للأشخاص الطبيعيين.. بس لما يحصل توافق وقبول من الناس في الشارع على القانون الخاص بتعديل أسعار الإيجار القديم للأشخاص الاعتباريين.
