الفنانة الجميلة شيرين سيف النصر واحدة من أجمل الناس الذين ظهروا على الشاشة لكنها اختفت بسرعة لأنها كانت تنوي أن تترك كل شئ وتتزوج من الملك عبدالله التاني ملك الأردن وكان زمانها مكان الملكة رانيا الآن.
بس يا ترى ليه مشروع الجواز بينهم مكملش؟ وإيه علاقتها بالملك فهد في السعودية؟ وإزاي وعادل إمام كرّهها في الفن.. تفاصيل وحكايات كتيرة هنعرفها مع بعض في التقرير التالي:
ميغركوش العيون الزرقاء والشعر الأصفر.. دي مصرية جاية من الصعيد وحياتها مليانة أسرار وكواليس محدش هيصدقها.. وفي ثري سعودي اتجوزها ودخلت الفن وحصلها شوية مشاكل من ورا الشغل حتى جوازتها من الوسط الفني مكملتش 4 شهور وانتهت وبختها كان قليل في كل حاجة.
علاقة بالأسرة الهاشمية
وفي صلة قرابة بتجمع شيرين سيف النصر مع العيلة الهاشمية في الأردن.. وشيرين إلهامي سيف النصر اتولدت في 27 ديسمبر سنة 1967 لأب مصري بيشتغل صحفي وأم من أصول فلسطينية اسمها ليلى هاشم أخت حنان هاشم اللي بنتها تبقى الملكة علياء مرات الملك حسين بن طلال ملك الأردن.. ومن هنا بقى اتولدت فكرة جوازها من الملك عبدالله التاني ملك الأردن.
جوازة فاشلة من ملك الأردن
في صحف أردنية قالت إن حنان هاشم خالة الفنانة شيرين سيف النصر كانت في الأردن وشيرين من وهي صغيرة وكانت بتزور خالتها حنان في الأردن وكان خالتها دي بتتمنى تكون شيرين بنت أختها مرات الأمير عبدالله التاني اللي كان ولي عهد الأردن وبقى ملك الأردن دلوقتي لكن فشلت الجوازة دي عشان وقف فيها أبوه الملك حسين بن طلال واللي رفض الأمر تمامًا.
مشوار شيرين مع الفن
شيرين سيف النصر كانت عايشة ما بين فرنسا والأردن.. بس استقر بيها الحال في مصر بعد ما اتعرفت على الأديب يوسف فرانسيس واللي بدوره عرفها على المنتج ممدوح الليثي واللي كان رئيس قطاع التلفزيون ومن هنا دخلت بوابة الفن في مصر من خلال التلفزيون وبقت بطلة فيلم تلفزيوني اسمه الأستاذ مع الفنان أحمد بدير وبعدها دخلت السينما من فيلم البلدوزر مع الفنان يوسف منصور وطبعًا جمالها وعلاقاتها وصلة القرابة مع ملك الأردن اتفتحت ليها طاقة القدر وبقت نجمة التسعينات وقتها وكمانة فتاة أحلام الشباب.
جوازات شيرين سيف النصر
في 3 جوازات في حياة شيرين سيف النصر.. الأولانية كانت من الشيخ السعودي عبدالعزيز وده يبقى أخو الأميرة جوهرة زوجة الملك فهد وبعدها حصل انفصال بينهم.. وبعدين شيرين طلعت قالت إنها اتجوزت ثري عربي في السرْ.
الجوازة التانية في حياة شيرين سيف النصر كانت من المطرب مدحت صالح وقعدت 4 شهور وبس وفيفي عبده خربت عليهم حياتهم عشان اتقال إنها كانت شريكة مدحت في تأسيس استوديو صوت في الهرم وخد منها 2 مليون جنيه ولما اتجوز فجأة من شيرين سيف النصر رفعت عليه قضايا وطالبته بحقها الكامل في الاستوديو وده اللي خلى حياته الزوجية اتدمرت.. وفيفي قالت إن مكانش في بينها وبين مدحت أي قصة حب.. وكانت الجوازة التالتة من طبيب تجميل سنة 2010 وانفصلت بعدها بفترة ومفيش أي أسباب اتقالت.
غابت شيرين بعدها عن الفن وعاشت وحيدة مع مامتها اللي رحلت بعد كده وقالت إن اختفائها ده كان بسبب الفنان عادل إمام اللي ضيّع سنين كتير من عمرها في مسرحية بودي جارد وده اللي خلاها تكره الفن وسنينه ومش عاوزة تمثل تاني.
