ناس كثيرة تسأل عن إضافة المواليد خاصة بعدما أعلن وزير التموين الدكتور على مصيلحي في تصريحات له عن فتح باب الإضافات على البطاقة التموينية. فما هي شروط ضافة مواليد جديدة على البطاقة التموينية والعدد المسموح بإضافته؟ وما هي الأوراق المطلوبة؟تابعونا لمعرفة التفاصيل..
بقالنا سنين مستنين القراره ده وهو إن وزارة التموين تفتح خدمة إضافة المواليد على البطايق التموينة.وفعلا وزارة التموين والتجارة الداخلية أعلنت إنها بدأت في تلقي الطلبات المواطنين لإضافة المواليد.
طيب ياترى ده لكل الناس ولا لفئات معينة؟ بص ياسيدي وزارة التموين والتجارة الداخلية، قالت إن خدمة إضافة المواليد هتكون لـ 4 فئات من أصحاب البطاقات التموينية.
لو انت من الفئات اللي هنقولك عليها دلوقتي يبقي بنبشرك انك تقدر تضيف أبناءك على بطاقة التموين،وده لأن وزارة التموين أعلنت إنها بتستقبل حاليا الطلبات.
والفئات دي هي الأسر من “مستحقي معاش تكافل وكرامة، حاملي كارت الخدمات المتكاملة، ومستحقي معاش التضامن الاجتماعى، وأبناء الشهداء،و زوجات الشهداء، أبناء الأسر البديلة”.
طيب ياترى إيه الأوراق اللي تاخدها وانت رايح تقدم ؟
هقولك وانت رايح تقدم لازم معاك اسم صاحب البطاقة والرقم القومى ورقم البطاقة التموينية وعدد افراد البطاقة، والأفراد اللي انت حابب تضفهم وأرقامهم القومية.
وخد بالك الوزارة بعد ما زاد عدد المترددين على مكتب خدمة المواطنين بديوان عام وزارة التموين لتقديم طلبات لإضافة المواليد للفئات الأكثر احتياجًا.
الوزير علي مصيلحي كمان أخد قرار وبلغ بيه كل المديريات ومكاتب التموين التابعة ليها بأنهم يستلموا من المواطنين طلبات إضافة المواليد وإن المواطن مش مضطر يروح لمقر الوزارة
والقرار ده كان بهدف تيسير الإجراءات دي على المواطنين.
لكن خلي بالك في شرط مهم جدا لو هتقدم طلب إضافة مواليد لأبنائك وهو أنه ميقليش أعمارهم عن 4 سنين .
يعني مثلا البطاقة المقيد بها فردين “زوج وزوجة” هيكون ليهم حق لها إضافة 2 من الأبناء والبطاقة المقيد بها 3 أفراد هتقدر تضيف فرد تاني بإجمالي 4 افراد بس للبطاقة الواحدة.
وبعد ما بتروح لمكتب التموين التابع لمنطقتك وتقدم طلب إضافة المواليد مع الأوراق المطلوبة، بيبدأ المكتب التمويني في تجميع طلبات إضافة المواليد على بطاقات التموين مع المستندات المطلوبة وبيرسلها بعد كدا لـ مديريات التموين اللي بتفحص الطلبات دي.
وخلي بالك إن لازم تروح بنفسك وده لأن موقع دعم مصر مأعلنش عن إتاحة تسجيل أو إضافة المواليد على بطاقة التموين، لكن لو محتاج تعمل تحديث للبطاقة فممكن تعمله من خلال الموقع .
طيب إيه الهدف من إضافة المواليد للفئات دي؟
بص يا سيدي وزارة التموين والتجارة الداخلية بتستهدف من القرار ده إضافة مواليد الأسر الأولى بالرعاية على بطاقات التموين بحد أقصى 4 أفراد للبطاقة، وده عشان تساعدهم على تحمل المعيشة وسط الغلا اللي احنا بنشوفه
وده لأن الوزارة بتقدم لكل فرد داخل بطاقة التموين 50 جنيه كل شهر يقدر يصرف بيها سلع تموينية من فروع المجمعات الاستهلاكيه ومنافذ الصرف التموينية.
ده غير كمان إنه هيقدر يصرف العيش بـ 5 قروش بس للرغيف الواحد بمعدل 5 أرغفة يوميا لكل فرد مقيد بالبطاقة التموينية.
دلوقتي قولنا رأيك في منظومة الدعم التموينية في مصر وهل انت شايف إنها كافية؟
