لو انت من المصريين العاملين في المملكة العربية السعودية، إذا يهمك أن تعرف إن في تعديلات جديدة ومهمة خاصة برسوم تأشيرات الدخول والخروج من وإلى المملكة.
اعرف هتدفع كام السنة دي في 2023، لو خرجت من المملكة وإزاي تتجنب الغرامات وتجدد إقامتك خلال إجازتك في مصر، خليك معانا:
مجلس الوزراء بالمملكة العربية السعودية، قرر النهاردة يعدل قيمة رسوم تجديد تأشيرات الدخول والخروج للمملكة وتجديد الإقامة والتعديلات دي اختص بيها الحالات اللي بيكون فيها المقيم خارج المملكة، وطبعًا من ضمنهم المصريين العاملين بالمملكة.
والنهاردة وزارة القوى العاملة قالت إنها جالها تقرير بالتعديلات دي، وعشان كده أعلنت الضوابط الجديدة عشان كل المصريين اللي في المملكة يستفادوا.
طب إيه هي التعديلات وهل في زيادة في الرسوم ؟
هقولك يا سيدي ، التعديل الجديد بيقول إن رسوم تأشيرة الخروج والعودة للمملكة بقت 200 ريال وده بيكون للسفر مرة واحدة لمدة شهرين بحد أقصى.
بس خلي بالك إنت هتدفع كمان 100 ريال زيادة عن كل شهر إضافي هتزوده لو انت مقيم داخل المملكة، لكن لو كنت مقيم خارج المملكة بيكون وقتها رسم الشهر الإضافي الضعف، وطبعًا لازم تكون الإقامة سارية.
ولو حابب تسافر أكتر من كده فالمملكة حددت 500 ريال رسوم التأشيرة وده لو سافرت أكتر من مرة لمدة 3 شهور، بس هتدفع 200 ريال زيادة عن كل شهر إضافي هتزوده عن الـ3 شهور وده في حالة لو كنت مقيم داخل المملكة، أما لو كنت وقتها خارج المملكة، بيكون الرسم الإضافي الضعف.
كمان المملكة عدلت تجديد رخصة الإقامة لمرافقي العامل الأجنبي والعمالة المنزلية وقالت إنهم لو كانوا خارج المملكة يقدروا إلكترونيًا لو هما برة يجددوا رخصة الإقامة، وده من خلال الدخول لـ البوابة الإلكترونية لوزارة الداخلية بس هيدفعوا رسوم مضاعفة عن اللي المفروض كانوا يدفعوها لو كانوا في المملكة.
وخلي بالك وزارة الداخلية بالمملكة العربية السعودية مؤخرًا كانت حددت مجموعة من الشروط اللي لازم المقيمين والوافدين يلتزموا بيها لو عايزين يجددوا الإقامة بتاعتهم، منها دفع قيمة رسوم تجديد الإقامة أول بأول وكمان لو في أي مبالغ متأخرة لازم تسدد عشان تقدر تعمل أي إجراء تاني.
كمان لازم يكون الشخص اللي عايز يجدد الإقامة معندوش أي بلاغات متقدمة ضده لأنه في الحالة دي هيترفض طلبه.
ولازم طبعًا يكون جواز السفر ساري الصلاحية، ويكون ليك صورة وبصمة في قاعدة البيانات الخاصة بنظام الجوازات في السعودية.
وخلي بالك، المملكة مؤخرًا قالت إنها هتوقع عقوبة حازمة على الوافد اللي بيشتغل لحسابه الخاص، واللي هتكون غرامة مالية تصل إلى 50 الف ريال، والسجن مدة توصل لـ 6 شهور والترحيل، عشان كده لازم تلتزم بكل إجراءات التشغيل هناك عشان متتعرضش لعقوبة زي دي.
قولنا رأيك في إجراءات المملكة الأخيرة الخاصة بالوافدين؟
