كشف الفنان محمود البنا، أسباب غيابه عن مجال التمثيل خلال السنوات الماضية، مؤكدًا أن الفن زمان اختلف عن الأعمال الفنية التي تقدم حاليًا.
وقال محمود البنا، في تصريحات صحفية إنه ابتعد عن المجال الفني منذ 6 سنوات، بسبب التغييرات التي حدثت في الوسط الفني حاليًا، مردفا: أنا مختفي بسبب الوسط والمناخ والأعمال والورق.. حاجات كثير اختلفت عن الفترة اللي فاتت.
وتابع محمود البنا: الجمهور نظرتهم للفن اتغيرت.. زمان كان في ثقل وعمق.. دلوقتي كله بيبص على اللبس والأسلوب، ولكن نفسي نعمل ميكس ما بين الماضي والحاضر، ويبقى في إيديولوجية نقدم بيها مصر.
واستكمل الفنان محمود البنا: لما تيجي تعمل مسلسل.. لازم تبص على مصر من وجهة نظر العقاد وطه حسين ونجيب محفوظ، ويكون عندنا غيرة على مصر علشان نعمل فيلم عظيم، ولكن لا يوجد أحدًا يعمل بذلك المنظور.. للأسف البعض بيبقى عايز يقبض وخلاص، والأعمال دلوقتي بقت زي التورتة.. كل واحد ياخد حتة وخلاص.
وواصل: هناك أعمال تعرض عليا حاليًا، ولكن بعتذر عنها لأني بظهر فيها بأدوار مكررة.. مفيش عروض مغرية زي زمان.
