الفنان يوسف الشريف كان واحد من أهم علامات شهر رمضان، خصوصا إنه يقدم أعمال فنية جديدة ومختلفة في فكرتها، وإن كان أحيانا بيتعرض لانتقادات، ولكن هو من النجوم القليلين الذين لهم شبه ألتراس يقدر يدافع عنهم طول الوقت، لأنه قدر إنه يجذب شريحة من الجمهور أغلبهم من الشباب بيتابعوا أعماله.. لكن ايه موقفه من رمضان 2023؟
من وقت ما انفرد الفنان يوسف الشريف ببطولة بعض الأعمال الفنية، وهو قادر إنه يحقق نجاح كبير، وخصوصا إن دايما موضوعاته بتكون مختلفة وفيها فكرة وتشغيل دماغ وخدعة ما، ودي من الحاجات اللي تنجح في جذب لجمهور وبتخلق حالة من التشويق.
يوسف الشريف بالطريقة دي قدر إن هو يبعد عن المساحات المعتادة في الدراما الرمضانية وخلق لنفسه منطقة محدش بينافسه فيها، من خيال علمي لدراما بتتكلم عن جرايم بس بطريقة مختلفة وفيها ذكاء.
والفنان يوسف الشريف كان آخر أعماله الدرامية مسلسل «كوفيد 25» وده اتعرض في رمضان 2021، ومن ساعتها اختفى النجم يوسف الشريف ومحدش يعرف عنه حاجة، كل شوية بتطلع أخبار عن أعماله ولكن بتتنفي تاني، للدرجة اللي خلت البعض بعتقد إن هو مريض، ولكن زوجته إنجي علاء نفت الكلام ده وقالت إن هو بصحة جيدة.
لكن بيفضل السؤال هل هيشارك يوسف الشريف في أعمال خلال موسم رمضان 2023 يرجع بيها للجمهور بعد غيابه عن السباق الرمضاني السنة اللي فاتت.
في أغسطس السنة اللي فاتت تم إعلان توقيع يوسف الشريف مع شركة منتجة ومن الأكبر في السوق المصري، عشان يقدم مسلسل جديد في رمضان 2023، وكان المفروض إن المسلسل هيكون من إخراج أحمد نادر جلال، لكن الحقيقة مكانوش عارفين هو العمل نفسه ايه.
يعني هما اتفقوا على المخرج والبطل، بس ماختاروش مسلسل يعملوه، وده لأن السيناريوهات المعروضة على يوسف الشريف مكنش في منها حاجة مناسباه، وفي الآخر استقر الأمر على إن يوسف الشريف هيكون صاحب الفكرة، وزوجته إنجي علاء هتكتب السيناريو، ولكن العمل اختفى في ظروف غامضة.
اتقال إن خروجه من السباق الرمضاني وتوقف عملية الإنتاج كان بسبب التكالليف الضخمة، لكن مفيش معلومات بتوضح في ظل تكتم شديد على الموضوع، ولكن الأكيد إنه تم تعديل الخريطة بتاعة عرض مسلسلات رمضان ويوسف الشريف مش موجود فيها لحد دلوقتي.
إنجي علاء كشفت إن هي بالفعل كتبت المسلسل وسلمته، ولكن متعرفش ايه حصل بعد كدة، ولكن هي قالت إن المخرج كان حسام علي، مش أحمد نادر جلال.
ولحد كدة اللي وصلناله إن يوسف الشريف مش هيشارك، ولكن طلعت أخبار جديدة، إن يوسف الشريف بالفعل وقع عمل درامي جديد هيكون من 10 حلقات، وإنه بالفعل بدأ التحضير ليه، وده هيتم عرضه بعد مسلسل «الكتيبة 101» المكون من 20 حلقة، عشان يكون مكمل للموسم، ولكن لحد دلوقتي باردو محدش عارف مصير العمل ايه، غير الكلام المعتاد بتاع بيتم الاتفاق على فريق العمل والنجوم، والاعتطاف على التصوير لمحاولة اللحاق، ولكن لم يتم الإعلان عن بداية التصوير لحد دلوقتي.
