رغم إن المودليز يضرب بيهم المثل، وأيضا ملكات الجمال يكونوا طوال القامة، إلا إن الواقع بقول غير هذا، حيث أن يوجد مشاهير كثيرين ليسوا طوال القامة.
دايما معايير الجامل اللي بنسمع عنها، بتكون فيها البنت طويلة، لكن الحقيقة مش كدة، في بنات كتير قصيرين وحلوين وكمان نجوم، ومش بس كدة، ده في دراسات قالت إن البنت القصيرة بتكون أكتر جاذبية للراجل من الطويلة، لإنه ببساطة هيعرف يحتويها كدة، ما هي كلها كام سم مش كتير، وكمان بيتقال إنها بشكل ما بتبان للراجل إنها أكتر خصوبة، والحاجة الأهم ودي اللي مش هتعجب رضوى الشربيني، إن قصر البنت بيحسس الراجل إنه هيكون صاحب السلطة، وإنها مش هتنازعه فيها، وده يمكن مبرر مش مضمون أوي، ده حتى في مثل بيقول «احترس من كل من اقترب من الأرض».
المهم يعني إن القصر كويس وكل حاجة متقلقوش، وفي نجمات بيبانوا على الشاشة عاديين يعني، لكن في الحقيقة هما قصيرين شويتين، ولكن عندهم طاقة جبارة وموهبة كبيرة، وفوق كل ده الجاذبية وحب الجمهور.
من بين أقصر الفنانات في الوسط الفني تظهرلنا الفنانة ميريام فارس، وأهي غنت في كاس العالم قطر 2022 وهي كلها على بعضها طولها 150 سم، وهي حتى لو لبست كعب باردو قصيرة، ولكن جبارة.
من بين النجمات في قائمة الأقصر، هنلاقي النجمة رزان مغربي واللي طولها 149 سم ودايماً بنشوفها بالكعب العالي، ومع ذلك بتعمل كل حاجة وتقدم برامج، وساعات كمان بتعمل أفلام أكشن.. اللي هو «مش مهم جسمي كفاية اسمي»
ومن النجمات القصيرين نانسي عجرم، واللي طولها 157 سم وهي واحدة من أقصر النجمات العرب، واهي زي مانتم شايفين، قالبة الدنيا.
عندنا كمان مي عز الدين، واللي طولها 152، ولكن هي ماشاء الله مبتهتمش بالطول، كفاية الجمال، والشطارة اللي عندها وشكرا على كدة.عندنا كمان الفنانة والمذيعة الكويتية حليمة بولند بطول 152 سم، وأهي زي الفل ماشاء الله.
وعندنا واحدة من أصحاب أقوى الأصوات، وهي الفنانة أصالة نصري وطولها حوالي 150 سم، مع إن صوتها ميقولش كدة خالص!
ومننساش طبعا المتألقة كندة علوش، اللي مهما لبست كعب عالي مفيش فايدة، لأن طولها 154 سم. والفنانة الجاية رغم صوتها وصيتها والمشاكل اللي عاملاها، لكنها من أقصر الفنانات وهي شيرين عبد الوهاب، طولها 150 سم، بس هي مش مهتمة، ونادراما بتلبس كعب عالي.
وأكيد أكيد الفنانة منى زكي، واللي طولها 150 سم ماشاء الله، ولكن من أهم نجمات مصر والوطن العربي.وطبعا عندنا الفنانة شيري عادل، وطولها 147 سم، وتقريبا دي أقصر واحدة فيهم بقى، ولكنها قمر أوي الفل وشاطرة وناجحة وكل حاجة.
اللي عايزين نقوله يعني، إن القصيرين جامدين أوي ومسيطرين، يا ترى البنات اللي بتتفرج علينا.. طولكم كام سم بقى؟
