من يومين انتشرت صور النجمة سمية الخشاب وهي ترتدي بالطو التكريم والشابوه ويتم تكريمها من مكان اسمه الأمم المتحدة للفنون، وكانت في منتهى السعادة وهي تتكرم وتصورت بالشهادة التي تحمل اسمها ، لكننا لا نعرف ما هو سبب التكريم؟
الموضوع غريب وفي حاجة غلط .. باينة اوي يعني ،، ايه اللي يخلي الامم المتحدة بجلالة قدرها تكرم سمية الخشاب ، مع احترامنا لتاريخها الفني يعني، بس ده ملوش علاقة بده خالص وكان موضوع مثير للتساؤلات
وبعدين ايه موضوع الامم المتحدة للفنون دي ؟؟ عمرنا ما سمعنا عنها ؟وكمان لو حقيقي ازاي الشهادة مكتوبة بالعربي عادي كدا ؟ اكيد في حاجة غلط وسمية الخشاب اضحك عليها زي نجوم كتير قبل كدا اتكرموا من اماكن وهمية استغلت اساميهم.
لما دورنا على اكونت المنظمة دي على الفيسبوك لقينا صفحة فيها 200 واحد ، يعني اي كلام ، وعاملين حاجة اسمها شهادة الدكتوراه الفخرية ، وبينظموا حفلة لتكريم حد مشهور ، كان منهم الدكتور حسام موافي طبيب القلب المعروف
بعد تكريم سمية الخشاب ده الدنيا اتقلبت لدرجة ان الامم المتحدة الحقيقة وصلها الموضوع ونفوا الكلام ده تماما وقالوا في بيان رسمي انهاردة ان مفيش حاجة اسمها الامم المتحدة للفنون ، وده مش من ضمن فروعها.
قصف جبهة كبير لسمية الخشاب و للمنظمة الوهمية اللي ضحكوا عليها وعلى الناس ، واكد مكتب الامم المتحدة في القاهرة ان الجهة دي مش تابعة ليهم خالص وملهمش علاقة بيها ولا يعرفوها وانهم مكرموش النجوم دول ولا مرة.
للاسف دي مش المرة الاولى اللي يتعرض فيها النجوم لتكريم وهمي زي ده ، لكن حصل قبل كدا اكتر من مرة ، لكن بعضهم مش بيفرق معاه مدى اهمية المكان ومصداقيته و بيكونوا فرحانين بشهادة تكريم عليها اسمه من غير ما يعرفوا انه ممكن يكون استغلال ليهم ومجرد شو باسمهم عشان يتعرفوا
هو ده اللي حصل مع محمد رمضان من حوالي سنة ، وبرضه اتكرم وخد شهادة فخرية زي سمية الخشاب ، لكن مش كدا بس ، ده الموضوع كان كبير اوي مع محمد رمضان لدرجة ان المكان الوهمي ده اداله لقب سفير الشباب العربي .. متخيلين اللي بيحصل؟
في مكان اسمه المركز الثقافي الألماني الدولي في لبنان هو اللي كرم محمد رمضان واداله الشهادة واللقب ده ، ونمبر وان طبعا يموت في الشو ده ، راح منزل صورة الشهادة عنده على انستجرام ووجه الشكر لوزير الثقافة اللبناني ، اللي اصلا ملوش علاقة بالقصة خالص.
وبعد ما الموضوع كبر ، طلعت القصة كلها ان المركز بيدي الشهادة دي لأي حد عادي جدا لكن بمقابل 100 دولار واتعملت حفلة كبييييرة على محمد رمضان بعد ما الناس عرفت حقيقة الدكتوراه الفخرية اللي اشتراها بفلوسه عشان يعمل شو لنفسه.
الكابتن سيد عبد الحفيظ كمان اتعرض لنصباية زي دي السنة اللي فاتت ، لما كرمته جامعة امريكية خاصة اسمها ديلفورد ، وادوله شهادة الدكتوراه الفخرية تقديرا لجهوده الرياضية.
لكن طلعت مش جامعة اصلا بالمعنى المعروف ، لكنها زي شركة كدا بتخدع الناس من خلال الدراسة اون لاين وبتديهم شهادات مختلفة طبعا بمقابل مادي.
نجوم كتير وقعوا في فخ الشهادات الفنكوش دي، بعضهم بيكتشف الموضوع على طول وبيرفض ، وناس تانية بتوافق وبتروح وتفرح بالشهادة وصورتين حلوين ع السوشيال ميديا.
