ابيض علي الأبيض واحلي علي الأحلى طب واللي خايف يروح..هذه إفيهات وجمل أصبحنا معتادين على تواجدها في مسلسلات رمضان، وتنتشر هذه الجمل ويبدأ رواد السوشيال ميديا يتبادلوها .
خلال بداية موسم رمضان ظهرت الأعمال الفنية اللي كان بيتحضرلها، وكل نجم زي ما نقول رمى زهره ومستني يشوف حظه، كل واحد عمل اللي عليه واللي ذاكر ذاكر خلاص، لكن دايما الأعمال بتاعة المواسم سواء كان رمضان أو عيد، بتحتاج نوع مختلف من الترويج عشان تقدر إن هي تبان وسط زحمة الأعمال الفنية.
وبقى من بين خطط الترويج للأعمال اللي بتعتمد على البطل الواحد الجامد أوي اللي بيقدر يعمل كل حاجة، هي جمل مصنوعة على وزن واحد، وبيكون معناها كبير، اللي هو المختصر المفيد، وطبعا دي حاجات بنشوفها كل موسم، قدرنا نحصر شوية منهم ولسة اللي جاي كتير..
مسلسل «بابا المجال» كان ليه نصيب الأسد من الأعمال الفنية اللي مليانة جمل كلها مصنوعة ومركبة، بنلاقي إن مصطفى شعبان تقريبا ونجوم العمل مبيتكلموش عادي زي الناس، كل كلامهم بتاع أشباح
بيقول مثلا «أخوك على قده بس مفيـش حد قده… وفي كارنا مفيش مقارنة».ولما بيعبر عن قوته بيقول «لو الأصول منفعتش أنا إيدي متقطعتش»
ولما حب يبين إنه جامد مش أي كلام بيقول «أنا أشيل جبل على كتفي بالحب.. ولا أشيل حبة رمل بالغصب»ولما حب يبقى رومانسي قال «يارب تبوري.. لحد ما أظبط أموري»
ولما حب يبقى شبح قال «تعمل معايا لقطة مش هزعل.. لكن لما أعمل معاك فيلم انت اللي هتزعل»ولما حب ينصح واحد شايف نفسه قال «آخرة الشقاوة عيش وحلاوة» وقاله كمان «مشكلتنا لما بنيجي نعمل الغلط بنبص يمين وشمال وبننسى نبص لفوق»
ومش مصطفى شعبان بس، جومانا مراد دخلت في السكة وقالت «لو الكلام ده لينا يبقى انتي من أعادينا»، حتى في طفلة صغيرة بتقول «إحنا بندلع بشقانا.. لا قريب ولا غريب إدانا» مسلسل كل ابطاله معلمين
الفنان عمرو سعد اللي بقى كل موسم بيلعب دور الواد ابن البلد الرجولة وقلبه ميت ومحدش قده، فلازم يكون كلامه كله حكم، نلاقيه مثلا بيقول في مسلسل «الأجهر»: «السكة سالكة والرب واحد»، و«عودة الرجال اللي علموا على الأسود في الأدغال»، والجملة الأشهر «أبيض ع الأبيض» واللي خايف يروح
طبعا الفنان محمد رمضان مش هيعدي من الموضوع كدة من غير ما يرمي كام جملة هو كمان، لازم يكون في احترام للشقاوة باردو، فهنلاقيه في «جعفر العمدة» بيقول «فوايدي حنينة أحن من البنوك»، وهنا كان بيعاكس زينة، ولما حب يتخانق قال «اه يا نسب مفيهوش عصب».
برنس الشغلانة دي بقى، وصاحب الجمل اللي بتعلم مع الناس، هو أحمد العوضي نلاقيه في مسلسل «ضرب نار» وهو بيقول «التار يا دم بدم.. يا ديه.. يا فراق»، ولما قفش واحد من ضحاياه بيقوله «اللي يقابل التاني حلال على التاني.. وادينا قابلتك»، ولما حب يبقى رومانسي قال لياسمين عبدالعزيز «أحلى على أحلى»، ولما عبر عن حزنه قال «أنا قلبي فضى اللي جواه.. ونشف من كتر البكا على اللي باعوني وخليو بيا».
طبعا مهرة اللي بتلعب دورها ياسمين عبدالعزيز ليها كتير ومنهم وهي بتقول «اللي عنيها مليانة ميغريهاش الألوان».
أمير كراراة في «سوق الكانتو» عامل دور برنس وجامد أوي باردو، وكان لازم يعدي يسيب بصمته من الجمل دي ونلاقيه بيرد على فتحي عبدالوهاب لما كان بيقول «خايف أبلع ريقي أتسم»، فرد وقاله «متقلقش الحية مبتبلعش سمها».
وفي خناقة بقى وقف في وسط الشارع وقال للناس «اللي هيجي جنب فرشتي هفتحله قرن.. قريب قبل الغريب.. واللي شايف نفسه فيه عافية يستجرى يقف قصادي».
طبعا تعليقات الجمهور إن الكلام ده ينفع حكم يتتكتب على التكاتك وعربيات النقل من اللي بنشوفها على الطريق وإحنا ماشيين لكن صعب تكون في حوار مسلسل.
