كما يوجد فنانين تزوجوا أكثر من مرة ، نجد ان بعض الفنانيين لم يفكروا في خوض التجربة حتى الآن، ونجد بعضهم اكتفى بخوض التجربة مرة واحدة، تابعونا لمعرفة أبرز هؤلاء النجوم:
مصطفى شعبان اتعرف على طليقته في الجيم
وبيتعبر مصطفى شعبان من أبرز الفنانين اللي ظهروا على الشاشة بيقدموا دور الراجل متعدد الزيجات لدرجة إن البعض أطلق عليه لقب “المزواج” ونقاد كتير طلبوا منه يخرج من الدور ده، لكن اللي في الحقيقة عكس كده خالص، فهو ملوش غير تجربة زواج واحدة واتقال إنه اتعرف على طليقته دي في الجيم وجوازهم استمر 7 شهور بس ومكانش في بينهم أطفال.
ومن بعدها رفض مصطفى شعبان يكون ليه تجارب تانية وقال في تصريحات تلفزيونية ليه إنه بيتمنى يكون زواجه غير تقليدي ويكون في قصة حب بينهم واشترط تكون متفرغة ليه تمامًا ومش مرتبطة بأي وظيفة، وبسبب الشروط دي هو ملقاش فتاة أحلامه لحد دلوقتي.
عبدالمنعم عمايري رفض يعلن طلاقه
أما الفنان السوري عبدالمنعم عمايري فواضح إنه لحد دلوقتي بيحب طليقته وأم أولاده الفنانة أمل عرفة وده اللي خلاه يقعد سنين رافض يعلن طلاقهم وقعد سنين كده لحد ما في يوم قرر يصرح في برنامج تلفزيوني، واللي يلاحظ هيلاقيه قريب من ولاده وبيعزمهم على العشا بره ويخرج معاهم وبصحبتهم بناتهم، وده اللي فسره الجمهور على إنهم ممكن يرجعوا لبعض لكن في تأكيدات من الاتنين إنهم بيراعوا بناتهم وبس، وفي نفس الوقت كمان أمل عرفة مخاضتش تجربة زواج تانية من بعد عمايري.
وائل كفوري والشائعات
وانفصل وائل كفوري عن زوجته وأم بناته أنجيلا بشارة من حوالي سنتين وده بعد زواج استمر قرابة عشر سنين ورغم المشاكل اللي حصلت بينهم بسبب نفقة البنتين انتهت الأمور بينهم بتسوية الأمور بعيد عن المحاكم، ومن وقتها الشائعات ملازمة وائل كفوري ما بين ارتباطه بالفنانة نوال الزغبي وما بين ارتباطه بحبه القديم وهي فتاة مغربية اسمها ماجدة أليموس، وهي من خارج الوسط الفني واللي اتقال إنه اتجوزها عشان هي حب عمره القديم اللي من 19 سنة لكنه مصدر مقرب منه نفى الشائعة دي.
نجوى كرم ومسؤولية الجواز
واعتكفت اللبنانية نجوى كرم عن الزواج للمرة التانية بعد فترة زواج مستمرتش كتير من يوسف حرب وقالت إنها مكررتش التجربة لأنها بتشوف فكرة الزواج مسؤولية كبيرة.
سلافة معمار وسيف سبيعي بيراعوا بنتهم
أما بقى زيجة سلافة معمار من المخرج سيف الدين سبيعي فأسفرت عن فتاة هي اللي بتربطهم ببض وسيف بيقول إنه على تواصل دائم مع طليقته وبنته وبيطم عليهم يوميًا، لكن فكرة إنهم يرجعوا لبعض أمر صعب ومن وقتها سلافة معمار قررت تعيش لبنتها ورافضة فكرة الزواج للمرة التانية لحين إشعار آخر، وبردوا سيف متجوزش تاني لحد دلوقتي.
نوال الزغبي والاهتمام بأبنائها
رغم المشاكل الكتير اللي حصلت بين نوال الزغبي وطليقها إيلي ديب إلا إنها لحد دلوقتي بترفض تتكلم عن تفاصيل المشاكل دي وكذلك إيلي بيقول إنه بيراعي ولاده وبيستقبلهم في بيته من فترة للتانية ده غير إنه مهتم بدراستهم وبيتابع الأمور دي، أما نوال فقررت عدم الزواج مجددًا ومهتمة بتربية ولادها والاهتمام بيهم وبس رغم مرور 15 سنة على الطلاق ده.
