يهتم العديد من الفنانيين والمشاهير باقتناء بعض الشياء الغريبة فلكل منا هوسه الخاص وقد ينفقون أموال كثيرة في أشياء غريبة لمجرد أنها نادرة أو مختلفة ، ومن خلال هذا التقرير سوف تتفاجئ بهوس المشاهير بالمقتنيات الغريبة وأغرب الشياء التي دفع فيها أموال طائلة فتابعونا:
متقلقش لما تسمع إن الفنان اللي بتحبه ولا الشخصية المشهورة اللي بتتابعها.. عندها مشكلة في اقتناء أشياء مش مفهومة.. عادي.. بقولك أهو ده عادي جدا.. كل إنسان عنده هوس مختلف عن التاني.. والمشاهير بتوعنا مش مختلفين أوي يعني.
يعني عندكوا مثلا الفنانة أحلام.. اللي يدخل بيتها يحس إنه دخل مغارة علي بابا.. مجنونة بتجميع المجوهرات.. بتحب الزمرد والألماس.. لدرجة إنها اشترت عقد تمنه 4 مليون جنيه.. من سنين.. أيام ما كان المليون له شنة ورنة يعني.. وده مش جديد عليها .. هي دايما بتقول إنها بتحب تصرف على المجوهرات
وراها على طول أخوها راشد الماجد.. ماهما الخلايجة كده.. فلوس كتير وتقاليع كتير.. وطالما الستات بيحبو المجوهرات.. يبقى الرجالة هيحبوا ايه؟
صح العربيات وراشد الماجد عنده عربية مفيش منها كتير في السوق، اسمها مايباخ، تمنها أكتر من مليون دولار، بيحافظ عليها وحاططها جوه عيونه.. حتى لما حاول توم كروز يستعيرها منه عشان يصور في أحد أفلامه، قاله لا معطلكش، عربيتي مش للبيع ولا الإيجار
طبعا الهوس ده مش مقتصر على العرب بس.. لا كمان الفنانين والمشاهير الأجانب عندهم تقاليع غريبة.. زي بيونسيه كده.. اللي راحت اشترت عروسة باربي مرصعة بالألماس والمجوهرات
بيونسيه قالتلك وأنا هجيب لبني هدية عيد ميلاد عادية كده. .لأا طبعا .. أنا هجيب لها باربي بتنور كده.. كلها دهب أبيض وألماس.. وتمنها آلاف الدولارات.
ولإن الأبوة مش بالساهل.. والفنانين على قد شهرتهم بيحبوا ولادهم أوي.. الفنان توم كروز لما كانت كاتي هولمز حامل منه.. راح اشترى جهاز سونار.. قالك عشان يتابع حركة طفلته اللي سماها بعد كده سوري.. وبقت دلوعة أبوها
وحبيبنا كلنا توم هانكس.. عنده هوس غريب شوية بس لايق على شخصيته.. بيحب يصرف فلوسه على الآلات الكاتبة القديمة.. وبيحافظ عليها وبيكتب عليها لحد النهارده جوابات ومراسلات زي الأفلام
ونرجع للمشاهير العرب.. وأجملهم على الإطلاق هيفاء وهبي.. اللي عندها كراش صغير كده مش قادرة تبعد عنه.. وهو النجم كريستيانو رونالدو.. اللي اشترت الحذاء بتاعه بمبلغ كبير جدا في مزاد بدبي.. ده انتي لو جورجينا مسكتك مش هتسيبك.. وعشان متبقاش مدلوقة أوي.. خدت معاه كمان كورة نهائي كأس العالم 2010.
والفنان نيكولاس كيدج .. عنده بقى باكيدج من الحاجات الغريبة.. في الأول اشترى هرم صغير كده عشان يتحط على قبره لما يموت.. بيحب الفراعنة أوي شكله
ودفع فلوس كتير جدا عشان ياخد أو نسخة من مجلات السوبر هيروز وتحديدا لشخصية سوبر مان اللي بيحبها.. ولو جتلك فرصة تدخل بيته هتلاقي جمجمة ديناصور شكلها غريب كده.. متخفش ده مجرد هوس مش حاجة تانية.
