الفنانة نادية الجندي والفنان نور الشريف ظلوا مقاطعين بعض حتى رحل نور عن دنيتنا سنة 2015..ما أسرار الخلاف الذي حدث بينهم هما الاثنين؟
وليه نور الشريف رفض يصالح نادية الجندي لما قعدت تحاول أكتر من مرة عشان ترجع المية لمجاريها وهو متربس دماغه؟.. ويا ترى إيه اللفظ اللي قالته في حق نور الشريف ومين الفنان اللي كان سبب في الأزمة دي؟.. يلا بينا نعرف التفاصيل في الفيديو اللي معايا.
نادية الجندي من النجمات اللي قدرت تثبت موهبتها وتكون نجمة شباك في السينما ونافست بشكل كبير طبعًا ده وسط عتاولة من النجوم.. ونور الشريف مفيش كلام على نجوميته وموهبته الكبيرة جدًا سواء في السينما أو التلفزيون.. للن الاتنين كان هيجمعهم فيلم سوا هو الباطنية بس الخلاف اللي حصل خلى الفرصة دي تختفي وميكونش ليها رجعة خالص وكانت السبب نادية الجندي اللي اتمنت إنها تشارك نور الشريف بعد كده لكن هو مرضيش خالص ولا حتى رضي يتصالح وفضلت المشكلة موجودة تفتكروا نادية هي اللي كانت غلطانة في القصة دي ولا إيه؟.
نجمة الجماهير
فيلم الباطنية اتعرض سنة 1980 وحقق نجاح كبير جدًا وهو اللي خلى نادية الجندي نجمة الجماهير.. وكمان كان من أفضل الأفلام التي أنجبتها السينما المصرية وبيعتبر من كلاسيكيات السينما العربية واستمر في دور العرض سنة كاملة وحقق أعلى إيرادات في تاريخ السينما المصرية ولحد دلوقتي الفيلم ده هو أنجح فيلم للفنانة نادية الجندي أصل هو حارب ظاهرة الممنوعات اللي كانت شائعة في القاهرة.
أسرار الخلاف
وقت تحضير نادية الجندي للفيلم وكانت إنتاج جوزها وقتها المنتج محمد مختار وتأليف السيناريست مصطفى محرم.. وقع اختيار محرم على الفنان نور الشريف عشان يعمل شخصية برعي في الفيلم وطبعًا الفيلم كان بيضم نجوم كتير جدًا زي فريد شوقي وفاروق الفيشاوي.. ولما اتعرض الفيلم على نور الشريف عجبته جدًا شخصية بُرعي وبدأ يشتري اللبس بتاع الشخصية ويذاكرها وخلاص هيدخل التصوير.. بس فجأة كده كل ده اتهد ونور الشريف خد استمارة 6 من الفيلم ده.
لفظ صعب
بعد ما خرج نور الشريف من الفيلم كانت نادية الجندي خدت بعضها وراحت هي وجوزها على الفنان محمود ياسين وعرضوا عليه الدور ووافق واتفقوا معاه وده اللي خلى مصطفى محرم يستغرب.. وكان ردها لما بدأ يعترض إن نور الشريف مينفعش للدور ووشه مش هيليق عليه عشان هو دور شرْ ونور ملامحه طفولية خالص ومش هتناسب الدور ده يعني شافته (بيبي فيس) زي ما بنقول دلوقتي لكن محمود ياسين اللي كان هو الفنان اللي ورا الخلاف ده لما وافق يعمل الدور ونادية كانت شايفاه بارع في الشر ووشه مناسب جدًا.
موقف نور الشريف
نور الشريف خد قرار إنه يقاطع نادية الجندي وجوزها خالص لأ وكانت قطيعة مش فترة وتعدي لأ دي قطيعة العمر ونادية الجندي وجوزها عرضوا عليه أكتر من فيلم بعد كده عشان يشتغل معاهم وهو رفض تمامًا.. الغريبة إن نور الشريف عمل أدوار شرْ في أفلام كتير بعد كده ووشه مش طفولي ولا حاجة زي العار ودائرة الانتقام وغيرهم.. طبعًا العداوة فضلت مستمرة بين نادية ونور وقاطعوا بعض لحد ما رحل عن دنيتنا ونادية قالت إنها عملت كده لصالح الفيلم وعشان يطلع بشكل كويس.
