عمري ما انسى لما مد إيده على أمي.. كنت كل مرة بتشعلق فيه شايفاه الأب المثالي بس لما عمل كده بقيت بتشعلق فيه وأنا مش مرتاحة.. كلامي هنا عن المطربة أنغام التي فتحت قلبها وقالت أسرار كتير عن علاقتها بأبوها الموسيقار محمد علي سليمان.
أنغام قاطعت أبوها 10 سنين ولما تعب راحت تزوره.. العلاقة بينهم من الطفولة متوترة ولما فضفضت سابت جمهورها يفسر سر علاقتها الصدامية بأبوها واللي عملت تاريخ من الأزمات ما بينهم.
إيه حكاية البنت وأبوها.. ليه عمرها ما هتنسى لما مد إيده على أمها؟.. إيه أسرار الخلاف بين أنغام ووالدها؟ ليه قاطعته 10 سنين؟ وهل من حقها تعمل كده في أبوها؟.. خليكوا معايا في الفيديو ده هحكيلكم الحكاية وانتوا احكموا.
في يوم 19 يناير سنة 1971 نورت الدنيا أنغام محمد علي سليمان واللي اتشهرت وبقت المطربة أنغام بنت الموسيقار محمد علي سليمان.. عندها 51 سنة وطفولتها مكانتش ألطف حاجة عاشت 9 سنين من المعاناة لحد ما جالها أخوها خالد وشاف المعاناة معاها لحد ما اتمردت على كل حاجة حواليها وشالت مسؤولية خالد اللي شاف بلاوي أكتر من اللي هي شافتها.. وعلشان حكايتها مش أي حد يستوعبها.
مش هتنسى مد الإيد
صعب أوي لما تكون عيل صغير شايف الأب هو النموذج وهو القدوة وهو الهالة اللي الكل بيعملها ألف حساب وحساب وبعدين كل ده يتغير في ثانية وكان فعلاً اضطراب علاقة أنغام بأبوها كانت في ثانية.. لما كبرت واتعلمت واتثقفت شافت إن أبوها وأمها نفسهم مكانوش عارفين هما عاوزين إيه؟ عمرها ما نسيت ولا هتنسى أول مرة أبوها بوظ علاقته بيها.. وده لما مدْ إيده على أمها.
قبل الوقت ده أنغام كانت بتحب أبويا جداً طبعاً كانت عيلة صغير والحب كان بشكل هستيري جنوني قول زي ما انت عايز.. بس بعد لحظة مدْ الإيد على الأم اتحولت العلاقة واتحول الحب.. يعني مثلاً هي فاكرة إنها لزقت في الحيط ومرضيتش تسلم عليه وهو خارج وقتها هو كأب اتخض مكانش عارف هو عمل إيه وإيه اللي اتزرع جواها.. زعلت أوي على أمها ومن وقتها شافته شخص تاني والأب اللي كانت بتتشعلق في رقبته مش عاوزة تتشعلق فيه وحتى لما اتشعلقت بعد كده مكانتش مرتاحة.
تاريخ من الأزمات
من يوم ما العلاقة اتوترت وقت الطفولة كانت أنغام متمردة على البيت والأسرة شافت أبوها بشكل تاني اشتغلت وشالت مسؤولية وعاشت مرحلة في حياتها مكانش ده وقتها.. بقت أنغام الطفلة المشهورة اللي بتعرف تشيل مسؤولية وتجيب فلوس واتحملت أخوها خالد وشالت مسؤوليته واستمرت المعاناة لحد ما الأزمات بينها وبين أبوها كبرت معاها.
أنغام قررت تتجوز من مهندس الصوت مجدي عارف وهو أبوها رافض الجوازة وعشان كده بقى غي قطيعة فنية بينهم.. وبسبب تعب أبوها راحت تزوره ومعاها دكتور مخصوص واتصالحوا بعد قطيعة 10 سنين.. دعمته في انتخابات نقابة الموسيقيين سنة 2011.. حضر بعدها حفل ختام مهرجان الموسيقى العربية في دورته العشرين وصعد على المسرح وحضنها قدام الكل.. بس بردوا في حاجة كده في العلاقة مش لطيفة لتظهر كل فين وفين.
هل من حقها تتكلم عن العلاقة
تصريحات أنغام المدوية دي قلبت السوشال ميديا وفي اللي شاف معاناتها هي معاناتهم وفي اللي قال مش من حقها تتكلم كده عن أبوها ومهما كان مينفعش تتكلم كده عشان في الأول والآخر ده أب وكمان دي أسرار مينفعش تطلع كده.. وما بين انقسام الجمهور على تصريحات أنغام انتوا بقى شايفين من حقها تتكلم كده عن أبوها وتقول أسرار البيت كده؟ اكتبولي في التعليقات.
