ارتبط اسمها بشكل كبير بالخلافات مع الفنانين، يمكن أشهر المواقف دي كانت أزمتها مع رامز جلال بسبب الحلقة بتاعتها في برنامج المقالب “رامز قرش البحر”، واللي وصلت للمحاكم وكان فيه بينهم قضايا كتير عن الموضوع، بالرغم من كده دي مش الازمة الوحيدة في حياتها، تعالو نشوف أبرز أزمات اثار الحكيم مع زمايلها الفنانين
مشاكل كتيرة ما بتخلصش ما بين الفنانة اثار الحكيم اللى بقالها فترة كبيرة مبتعدة عن الشاشة والسينما وبين زمايلها الفنانين، وكل شوية تصريح وتهديد بالمقاضاة القانونية من آثار لزمايلها، فمثلا بسبب مشكلة تخص برنامج الفنان رامز جلال
هاجمت الفنانة نشوى مصطفي الفنانة آثار الحكيم و سوء التفاهم كان بسبب تعليق الفنانة آثار الحكيم على ضيوف برنامج “رامز قرش البحر” ووصفتهم بأنهم “تافهين” ، فردت نشوى على الكلام ده.
فقالت اثار في تصريح ليها للأسف نشوى حطت نفسها في مواقف محرجة، لما وقعت نفسها في الغلط بمهاجمتها لي لآنها مسمعتنيش دي قالت كلام سمعته من غير ما تتأكد من حقيقته،والمحامي هيرفع ضدها قضية قانونية.
لكن الفنانة نشوى مصطفى نفت إن في سوء تفاهم بينها وبين الفنانة آثار الحكيم،للاسف مش بس نشوي ، ده مشكلة كمان كانت بين هيفاءوهبي وآثار الحكيم، لما هيفا تجاهلت آثار في عزاء الراحل حسين الأمام وقدمت واجب العزا لسحر أمام زوجة حسن وتجاهلت هيفا آثار اللى كانت واقفة وراها، وتجاهل هيفا بسبب مهاجمة آثار لفيلم حلاوة روح اللى قامت هيفا ببطولته وانتقدته آثار بطريقة جارحة ومينة لهيفاء.
أما الإعلامي أسامة منير فقال، ان الفنانة أثار الحكيم، وضعته في موقف محرج على الهواء لما استضافها في برنامجه من حوالي كام سنة، ووضح منير، أن فريق إعداد البرنامج أكد على آثار الحكيم انها متتكلمش عن أزمتها مع رامز، إلا أنها فاجأته على الهواء وأصرت على الكلام عن تفاصيل الأزمة والتأكيد على أن رامز اتحرش بها، وده اللى خلا أسامة، ينفعل عليها ويتهمها بأنها بتتحرش بيه إعلاميا.
أما ايتن عامر للممثلة الشابة فبتعتبر أن اللى حصل ليها قبل كده مع اثار الحكيم واحد من الذكريات اللى مش بتحب تفتكرها
وقالت آيتن عامر أن الخلاف بينهم بيرجع للقاء جمعهم مع الاعلامية سلمى الشماع في حلقة برنامجها “أفطر معانا” وكان موجود وقتها وزير التعليم
وكان موضوع الحلقة حولين الطلبة اللى ييشتغلوا بجانب دراستهم، وتواجدها كان كمثال لممثلة شابة بتشتغل جنب دراستها
وقالت أيتن كنت قاعدة جنب وزير التعليم، وأثار الحكيم وصلت متأخرة ولما لاقتني رفضت الدخول بسبب تواجدي، وفوجئت بأن فريق عمل البرنامج يبلغني مع أول فاصل اعلاني أنى مش هاكمل الحلقة بناء على رغبة اثار الحكيم عشان محدش بلغها بحضوري الحلقة “.
حسيت بالإهانة وإني قليلة بالنسبة ليها واللى ضايقني اكتر فقرة الإفطار، فبعد أذان المغرب فوجئت بعد جلوسي على سفرة الضيوف عشان الإفطار، بيطلبوا مني اتنقل لسفرة تانية خاصة بفريق إعداد البرنامج، وعلى الفور غادرت المكان وروحت البيت.
ومحدش عارف ليه كمية الحدة والهجوم اللى دايما بتظهر في تصريحات الفنانة آثار الحكيم ، ومؤخرا ظهرت شائعة عن وفاتها لكن نفتها آثار تماما ونفتها كمان الفنانة رغدة على حسابهم على السوشيال ميديا.
