من يسمع اسم الفنان الراحل وائل نور لابد أن يتذكر “البخيل وأنا، ذئاب الجبل، المال والبنون، ترويض الشرسة”، والتي تعتبر من أهم أعماله هذا غير الأفلام والمسرحيات الكثيرة التي قدمها.
ورغم إنه سايب ورث فني لجمهوره يستمتع بيه لكنه ساب ورث لأهله وأسرته بيتنازعوا عليه، أيوه زي ما سمعت كده عدى 7 سنين على رحيله ولسه طليقته وأرملته بينهم قصص وحكايات كانت مستخبية ومحدش عارف عنها حاجة والموضوع وصل لاتهامات متبادلة بينهم كمان، إيه الحكاية؟ هتعرفوها معنا في التقرير التالي:
جوزات وائل نور
الفنان وائل نور مشي من دنيتنا يوم 2 مايو سنة 2016 يعني بقاله 7 سنين بالتمام والكمال، بس الحياة الشخصية لوائل كانت معروفة اتجوز وطلق واتجوز تاني ودي سنة الحياة عادي، أول جوازة كانت من الفنانة أميرة العايدي وهي فنانة معروفة للجمهور وليها أعمال هنفضل فاكرينها وخلف منها ولد وبنت اللي هها “سارة ويوسف”.
وبعد 7 سنين جواز اتطلقوا وتقريبًا كان في خلافات بينهم هنعرفها في بقية الفيديو، المهم وائل عاش حياته عادي لحد ما اتجوز تاني غادة محمد أبو نوح واسها الفني غادة النجار ودي عاشت معاه لحد ما رحل وكانت حامل وولدت ابنه بعد 9 أيام بس من رحيله وقبله كانت مخلفة اتنين ولد وبنت يعني ولاده كلهم بقوا خمسة.
الافترا وحش
بصوا هو محدش عارف الحقيقة فين ودايمًا القصة بيكون ليها تكملة محدش بيقول كل حاجة كاملة واللي بيصرح بيقول اللي هو عاوز يقولوه ويخلي حتة كده لنفسه، والمشكلة ظهرت لما أرملة وائل نور قالت في تصريحات ليها إن أميرة العايدي طليقة جوزها الراحل عاوزة تطردها هي وعيالها من بيتهم .
وبتقول إن دي شقتها لدرجة إنها اتفاجئت بدعاوى قضائية ضدها من أميرة العايدي بتطالب فيها باستلام الشقة اللي هي قاعدة فيها على أساس إنها بتاعتها، الأرملة استغربت دي أساسًا الشقة دي وائل نور مقعدنا فيها هو وعياله من وقت جوازنا جاية دلوقتي تتكلم طيب ليه متكلمتش من الأول وعملت المشاكل اللي هي بتعملها دي والمفاجأة بقى إنه لما وائل رحل طليقته أميرة العايدي أقرت في محضر جرد التركة إن الشقة ملك وائل، إزاي بقى هي عاوزاها؟.
البداية من هنا
بداية النزاع على الشقة دي بدأ من بعد سنة من الإقرار بتاع طليقة وائل نور أميرة العايدي يعني قول كده من 2017 أو بداية 2018 ووقتها أميرة رفعت دعوى بتقول فيها إنها معاها صورة ضوئية من عقد ابتدائي بالشقة وبتطعن على العقد المتسجل اللي بتملكه.
وبتقول أرملة وائل نور إنها في المشاكل دي بقالها 7 سنين عشان الميراث وتقسيم تركة الفنان الراحل طيب ما كل واحدة ليه أولاد منه بصوا ليهم عشان المركب تمشي، لكن الموضوع لسه مستمر والاتهامات بقت أكتر دي كمان قالت إن أميرة حرمت وائل طليقها من ولاده وقعد 6 سنين ميشوفهمش لحد ما رجعوا يعيشوا معاه، انا ليه كلي يوم أعيش في استغراب من اللي بيحصل ليه أعيش أنا وولادي وولادها في عذاب؟، ولادي بيشوفوني وأنا بعيط وفي حالة انهيار بسبب حياتي اللي مش مستقرة.
موقف أميرة العايدي
المهم أميرة العايدي من نوعية الشخصيات اللي بتكون حريصة جدًا في كلامها وموضوع ولادها وحرمانهم يشوفوا أبوهم والعكس دي بالنسبة لها مسألة شخصية ومش هتعلق عليها عشان مش من حق أي حد يتدخل في الموضوع ده، ويمكن وقتها هي كانت يا بتعاقب وائل نور يا إما كانت عاوزة تحافظ على ولادها من بيته التاني بس الأكيد إنها ليها وجهة نظر في قرارها ده.
المهم موضوع محاولتها طرد أرملة طليقها وولاده من الشقة قالت دي اتهامات أنا مش هرد عليها وهيكون الرد بالقانون عشان أصلًا في قضية تزوير وفي النهاية الحكم هيكون للقضاء المصري العادل واللي هيقف مع اللي ليه حق ويديهوله.
بعد الأزمة دي تفتكروا الأزمة هتفضل قائمة ولا ممكن أشرف زكي باعتباره نقيب الممثلين يتدخل ويحل الموضوع ودي وتنتهي حكاية المحكمة دي، ولا هما الاتنين يعقلوا كده ويبصوا للولاد اللي طالعين للدنيا ويحترموا حرمة الفنان اللي رحل ده ويحلوا مشكلتهم بالتراضي؟ اكتبولنا توقعاتكم في الكومنتات.
