إستحملت معاه الفقر وما قبل الشهرة، وبدأت معه من تحت الصفر ولما أصبح نمبر وان فرط فيها وتخلى عنها بسبب الشهرة.
محمد رمضان ساب مراته الأولى ودور على واحدة تانية علشان برستيجه،واحدة تليق بحياته الجديدة بعد الفلوس والعز!
مين زوجة رمضان الأولى! وإزاى حبها وأرتبط بها وباعها بعد شهرته! هل مراته التانية خطافة رجالة؟ليه وهو متجوزها وبعد الإنفصال مكانش بيظهر معاها ومخبيها عن الجمهور على عكس اللى بيعمله مع مراته التانية!أسرار وحكايات مثيرة فى حياة محمد رمضان الشخصية متقلش عن تصرفاته وأفعاله اللى بتقلب الدنيا.
محمد رمضان ثقة فى الله التريند بتاعه!ومرزق فى تصريحاته وتصرفاته الغريبة اللى بتعرضه دايما للإنتقادات والهجوم..ولما تعرف أسرار فى حياته الشخصية واللى عمله مع مراته الأولى وأم بنته حنين مش هتستغرب أوى لإن هو ده “نمبر وان ”
رمضان لما حب يكمل نص دينه كان عنده 20 سنة ، وطلب من أهلها يدوله مهلة 5 سنين عشان يكون نفسه..كان لسه على الله وفى بداية مشواره الفنى! وفجأة حصلت حاجة قلبت حياته رأسا على عقب! والزهر لعب معاه وقدر يتجوز زوجته الأولى فى 2008 .. وكانت من برة الوسط الفنى ومحجبة!
وده لما كان بيمثل في مسرحية “يمامة بيضا”،وملتزمش بالنص وإرتجل على المسرح شافه أمير عربي وأعجب بيه جدا، واداله قلم بساعة فيه 30 فص ألماظ هدية..وربنا بيقطع من هنا ويوصل من هنا ..حصلت خناقة بينه وبين على الحجار على اللى عمله فى المسرحية وطرده من المسرح .
قرر رمضان يبيع القلم ده وإكتشف إن سعره وقتها 150 ألف جنيه، وفعلا عمل كده وإتجوز بالفلوس دى ، لكن بعدها ب4 سنين حصل خلافات بينه وبين زوجته وانفصلوا بعد ما خلف بنتهم حنين ..
رمضان مكانش بيظهرها خالص للأضواء ،ولا بيتكلم عنها وهى على ذمته ولا حتى بعد الإنفصال،وكل اللى بيربطه بها بنته الكبيرة حنين وبس!
فى نفس السنة وبعد كام شهر من إنفصاله إتجوز رمضان للمرة التانية نسرين أبو النجا ومعملش فرح ..رغم إن وقتها كان نمبر وان على سن ورمح!
هنا الدنيا ساعتها قامت عليه بسبب سرعته فى الجواز،والجمهور هاجمه إنه بعد الشهرة باع مراته علشان القرش جرى فى إيديه! وإنها علشان محجبة مباقتش مناسبة لوضعه وبرستيجه ،وإنه كان على علاقة بنسرين قبل إنفصاله وده السر !
لكنه نفى الكلام ده وقال إنه لما طلق زوجته مكنش معاه فلوس أصلا، ومكنش مشهور، بالعكس ده استلف فلوس عشان يدفع لها النفقة ..
رمضان دايما بيصرح إن نسرين هى حب حياته وقال هي الوحيدة اللي بتفهمه ، وتستحمله ومقدره ظروف شغله!
ورغم إنفصال رمضان عن مراته الأولى إلا إن علاقته ببنته حنين كويسة جدا ،ودايما بتظهر معاه فى الصور والفيديوهات وأخرها لما شاركت معاه فى كليب مصباح علاء الدين ،والشبه بينهم كبير جدا فى إثارة الجدل وتصدرهم التريند بأفعالهم الجريئة!
الحق يتقال إن رمضان مسعاش إنه يخفى مراته الاولى ولا يظهر وبتباهى بالتانية ،ولكن الصدفة هى اللى ظهرت نسرين فى الإعلام لما إتعرضت لواقعة بعربيتها ،وإتحكم على السواق بتاعها بالحبس لإنه كان السبب فى رحيل سواق تانى ..وقتها إتصابت هى وصاحبتها .
رمضان بينه وبين التريند والشائعات عمار كبير ..ومفيش ساعة تعدى إلا وتطلع شائعات تقطم وسطه بس هو واقف ثابت ومش عايز حركة ثابت على المبدأ ثابت!
زى شائعات إرتباطه بحلا شيحة بعد ما عملوا مسلسل زلزال ،والغريبة إن رد محمد رمضان بيكون مفاجأة بصوره مع مراته نسيرين وكمان نجاحاته اللى مكسرة الدنيا ومحدش يقدر يقول تلت التلاتة كام على اللى بيعمله ،ولاإنتوا شايفين إيه؟ شاركونا برأيكوا فى التعليقات.
