“لو ده هيثبتلك إني.. بحببببببببك”.. هل تتذكر هذا المشهد الرومانسي الخطير، الذي تمكن فيه أحمد السقا من لفت انتباه منى زكي بحركة جريئة من حركاته، عندما ألقى نفسه من على جبل عالي لكي يخطف قلب البنت الجميلة، لكن هذه ليست الحقيقة؟
نجوم ومشاهير كتير بنحبهم وبنروح السينما مخصوص عشان نشوف أفلامهم وننبهر بمشاهد الأكشن الخطيرة اللي بيعملوها.. وجزء كبير من حبنا ليهم وتعلقنا بيهم هو الانبهار ده.. ازاي بيعملوا حركات جري وضرب وأكشن ومبيخافوش على نفسهم
طبعا في فنانين كتير بيعملوا مشاهد الأكشن بنفسهم ومعروفين إنهم بيرموا نفسهم في الخطر عشان بيحبوه.. زي توم كروز اللي بيرمي نفسه من الطيارات.. وبيتسلق برج خليفة بنفسه.. لكن في ناس تانية بتخاف على نفسها شوية.. وبيضطروا بقى يشوفوا لهم بديل
البديل ده اسمه في مجتمع السينما والأفلام الدوبلير، وده وجوده في الفيلم ميلقش أهمية عن النجم اللي اسمه على الأفيش، ولا المخرج اللي بيطلعهم الاتنين شخص واحد في النهاية.
وعندنا في مصر نجوم كتير ليهم دوبليرات، ينط مكانهم ، يضرب الأشرار بدالهم يبقى موجود في مكان تاني عشان يقوم بدوره.. في الوقت اللي البطل فيه بيكون شايل على كتافه مشاهد تانية
زي الفنان أحمد عز اللي عنده دوبلير ميقلش جمال ولذاذة وخطورة عنه، يطلع أحمد عز قدام الشاشة يخطف قلب البنات ووسامته، ويطلع الدوبلير مكانه في مشاهد الضرب والنط من العمارات والأكشن الخطير .. واحنا نشوفهم الاتنين عادي
زمان كان موضوع الدوبلير ده محدش يعرفه.. والفنانين كانوا بيخبوه عشان نجوميتهم وشعبيتهم محدش يشك فيها.. إنما النهارده بعد ما بقى كل واحد عارف وفاهم كل حاجة.. “ميمون بقت بتظهر من غير عقد” على رأي الفنان أحمد السقا
وزي ما أحمد السقا له دوبلير معين وأحمد مكي عنده نسخة طبق الأصل منه، في ناس بتبقى دوبلير لأي فنان في مشهد خطر.. يسوق مكانه العربية ،ينطق مكانه من مكان عالي.. وشطارة المخرج إنه يعرف يصوره من زاوية متبينش ملامحه.. عشان الطبخة تبقى مظبوطة
شريف ماكجيفر واحد من الناس اللي تعبت معانا في الشغلانة دي.. بيحل مكان النجوم في كل مشاهد الأكشن الخطيرة.. يلبس باروكة، يحلق شعره، هتلاقيه تقريبا في كل معركة وفي كل مشهد إثارة في السينما في الكام سنة اللي فاتوا.
عارفين إنه كان دوبلير الفنان أمير كرارة في مسلسل كلبش؟.. لا مش بس كده هو نفسه الشخص ده كان دوبلير عمرو يوسف في مسلسل طايع عادي جدا.. وظهر في مشاهد مكان محمد رمضان في فيلم الديزل.. وغيره وغيره من الشخصيات اللي لا يمكن تصدقوا إنهم مش هما دول الفنانين الأصليينز
ناس كتير كانت بتسأل ازاي الفنان أحمد مكي بيقدر يعمل 3 شخصيات في نفس المشهد في مسلسل الكبير أوي، سهلة جدا، الدوبلير، أحمد مكي زي غيره من الفنانين اللي عندهم دوبلير نسخة طبق الأصل منه، يلبس هو لبس جوني.. ولا يحط مكياج حزلقوم ويطلع في المشهد بضهره أو بوشه.. ونركب عليه صوت أحمد مكي.. واحنا نصدق ونشتري ونضحك كمان
الاستغناء عن الدوبلير مش أسهل قرار بياخده المخرج أو البطل.. لإنه ممكن يعرضه لخطر كبير خصوصا في أفلام الأكشن.. وفي معايير سلامة مينفعش يستغنوا عنها.. مش هنضحي بالنجم الكبير عشان مشهد ينط فيه من عمارة ولا يتحرق جوه عربية.. طالما في ناس مدربة وعارفة كويس شغلها وممكن تقوم بالحتة دي بسهولة.
