في مسلسلات تركت علامة معنا وحققت نجاح كبير وقت عرضها ومازلنا تنتذكرها حتى الآن، ومنها مسلسل “وجه القمر”.. الذي كان سبب انطلاقة جيل من نجوم اليوام وورائه كواليس وتفاصيل لا يعرف أحد عنها سنكشفها اليوم من خلال التقرير التالي:
من 23 سنة طلع مسلسل مهم جدا اسمه “وجه القمر”.. قامت ببطلوته الفنانة فاتن حمامة ومعاها أحمد رمزي وجميل راتب.. وعدد من الوجوه الجديدة زي نيللي كريم وأحمد الفيشاوي وغادة عادل
مسلسل وجه القمر تم عرضه خلال شهر رمضان لعام 2000 .. وكان مكون من 18 حلقة فقط.. وكان التجربة التلفزيونية الثانية والأخيرة لسيدة الشاشة العربية بعد “ضمير أبلة حكمت”.. وعشان توافق على الدور وقتها خدت أعلى أجر في تاريخ الدراما المصرية بمعايير المرحلة.
مسلسل وجه القمر اللي بيحكي قصة المذيعة الشهيرة ابتسام البستاني.. اللي بتشتغلي في التلفزيون المصري.. ومستقرة في حياتها العائلية.. ومتجوزة رجل أعمال وعندها 3 أبناء.. لغاية ما بتعرف إن جوزها الأولاني وأبو أولادها لسه عايش.. ومتوفاش في حادث من سنين طويلة زي ما كانت فاكرة
المسلسل اللي أخرجه عادل الأعصر وألفته الناقدة ماجدة خير الله.. كان مترشح لبطولته الفنانة يسرا.. لكنها رفضت وقتها يمكن عشان الدور كان أكبر من سنها.. وبعدها اتعرض الدور على رغدة بس مردتش عليهم.. لغاية ما قرر المخرج يعرض الموضوع على فاتن حمامة.
لحسن حظهم وقتها فاتن حمامة كانت رايقة.. وقالت لهم موافقة بس هنعدل شوية في السيناريو.. ودي كانت أول مرة من سنين طويلة تجتمع مع أحمد رمزي في عمل.. وطبعا الكيمياء بينهم كانت زي ماهي من أيام الأبيض والأسود
اللي ناس كتير متعرفهوش كمان إن حنان ترك ومنى زكي كانوا مرشحين لأدوار .. نيللي كريم وغادة عادل.. بس فاتن حمامة رفضتهم.. وكانوا محتاجين بنت بترقص باليه فا وقع الاختيار على نيللي كريم.. خصوصا إن سيدة الشاشة كانت عاوزة وجوه جديدة.
وبرضه هي اللي طلبت إن أحمد الفيشاوي يبقى ابنها في المسلسل.. وعملت جلسات في بيتها للتعرف عليهم.. وقراءة النص.. وقعدوا يشربوا شاي وياكلوا كيك ويتناقشوا بقى.. لإنها كانت حريصة إنه يبقى في بينهم علاقة إنسانية قبل التصوير.. عشان الجمهور يصدق إنهم ولادها فعلا وإنهم إخوات
فاتن حمامة طلبت أجر مليون جنيه في المسلسل.. وعملوا لها لجنة مخصوص عشان يوافقوا على الرقم ده.. واشترطت إنه ميبقاش في إعلانات في الفواصل أثناء العرض.. وشروط فنية كتير.. والناس كانت شايفة إن عندها حق
كمان كان ليها طلب وهو تقليل بعض المشاهد الخارجية اللي كانت بتتصور في الشارع أو وهي بتسوق العربية.. شوية تفاصيل كده الست كانت كبرت في السن برضه وليها تحكمات شوية.. اه صحيح.. نسيت أقولكم إن فاتن حمامة غيرت اسم المسلسل وخلته “وتتساقط أوراق الخريف”.. بس المؤلفة ماجدة خير الله رفضت جدا.. واحترموا رأيها ورجع تاني “وجه القمر”.
