بنتنا أحلى من جورجينا..كيف ردت الفنانة ياسمين صبري لأول مرة على كل من اتهموها إنها تقلد عارضة الأزياء جورجينا رودريغيز.. وما المشكلة التي تواجه الناس الذين يوجهوا لها هذه الاتهامات.
وليه جابت سيرة كيم كارداشيان وهل حقيقي ياسمين أحلى من جورجينا وليه قالت على نفسها إنها فنانة عالمية.. كل ده وأكتر هتعرفوا تفاصيله فيما يلي:
ياسمين صبري علطول متهمة بتقليد حبيبة الدون كريستيانو رونالدو اللي هي جورجينا رودريغيز ومحدش عارف هي فعلًا قاصدة تقلدها وليه الناس اتهموها بكده وإزاي ياسمين واجهت الاتهامات دي وردت عليها وإيه اللي خلى ياسمين صبري توصل للعالمية.. حكايات كتير اتكلمت فيها ياسمين صبري وفتحت قلبها وقالت بتحلم بإيه ونفسها تعمل إيه في حياتها.. يلا بينا.
تقليد جورجينا
كلنا عارفين طبعًا وقت جوازة ياسمين صبري من رجل الأعمال أحمد أبو هشيمة والكلام على تقليدها جورجينا والكل كان بيشوف وضعيات الصور اللي كانت بتنشرها ياسمين واللبس بتاعها والإكسسوارات وكلها كانت فعلًا شبه اللي بتعمله جورجينا.. وقتها ياسمين كانت عاملة ودن من طين والتانية من عجين وسابت اللي يتكلم يتكلم واللي يتهم يتهم لحد ما قررت إنها خلاص كفاية كده بقى ولازم الكل يقف عند حده.
الرد على التقليد
ياسمين صبري قالت إنها في سنة 2015 كانت ليه في بداية شهرتها والناس كانت بتتهمها بتقليد كيم كارداشيان ودي طبعًا نجمة عالمية معروفة وده طبعًا كان باب ياسمين للرد وقالت إزاي بقى الناس اللي كانت بتقول بقلد كيم دلوقتي بيقولوا إني بقلد جورجينا.. أنا مستغربة العقلية دي لكن إحنا عندنا مشكلة أكيد في التفكير مع إن ياسمين هي نفس الشخص متغيرتش عشان تقلد كيم أو تقلد جورجينا.
فين المشكلة؟
ياسمين اتكلمت بوضوح إننا في مصر والدول العربية عندنا مشكلة في عدم تقدير الذات اللي هو إزاي يكون عندنا حد حلو وجميل من غير تقليد نسخة من بره.. الناس شايف الأجنبي أحلى وكإن كل حاجة تيجي من بره بتكون هي الأفضل وإحنا معندناش حاجة حلوة.. طبعًا السوفت وير ده مش عند ياسمين عشان تفكيرها غير الناس دي لكن فعلًا هي شايفة الناس بتفكر كده وعشان كده تلاقي الناس بدأت تدعمها شوية وتقول بنتنا أحلى من جورجينا على أساس إن ياسمين كده قالت يا جماعة في إيه أنا أحلى وعندنا نماذج كتير أحلى من بره شوية ثقة بس في نفسنا يا جدعان مش كده.
فنانة عالمية
ياسمين صبري كل إجازة بتقضيها في جزيرة من الجزر وقالت إنها لو تقدر تلف جزر العالم كله هتعمل كده عشان هي بتحس براحة نفسية كل ما تزور جزيرة من الجزر الجميلة اللي في العالم ورغم الزيارات الكتير اللي عملتها لكن في جزر لحد دلوقتي هي موصلتش ليها ونفسها توصل لها.. كمان ياسمين شايفة نفسها مش قدوة لغيرها من الأجيال وهي كمان متقدرش تقول كده وكل الحكاية إنها بتشتغل على نفسها كنموذج كويس وصل للعالمية وبيشتغل مع براندات معروفة في العالم كله وبتشرف اسم بلدها مصر.. وكمان تمثل وتعمل أفلام متندمش عليها لما تكبر وتفضل عايشة مع الجمهور.
