أثارت الراقصة هندية الجدل خلال الساعات الماضية على مواقع التواصل الاجتماعي بعد انتشار فيديو لها وهي تلقي كلبها في الشارع،وهو ما تسبب في هجوم عليها ولكن ردها على الواقعة استفز الجمهور اكثر فماذا قالت؟
محدش كان يعرفها..قول هندية كده؟ مين دى؟ وكانت فاكرة إن واقعة رمي الكلب فى الشارع هتعدى زى أى حاجة عدت عليها قبل كده ولا حس ولا خبر،ولا يمكن شهرتها وجوازها من رجل الأعمال الشهير هيساعدها فى كده؟ لكن إتعرفت إنها الراقصة هندية اللى عملت كده من فيديو إنتشر لها على الفيس بوك ،واللى استفز الناس أكتر ظهورها بعد الواقعة بتهاجم الجمهور هتتفاجئ ليه عملت كده؟ وليه فخورة إنها رقاصة؟
فى الساعات اللى فاتت إنتشر فيديو على جروب خاص بإنقاذ الحيوانات الأليفة و اللى صورته قالت فى واحدة ست معندهاش رحمة جابت الكلب ده فى العربية بتاعتها ورمته فى الميدان ورجله مكسورة ،ومتعرفش مين صاحبة الكلب ده..الفيديو ده إنتشر بشكل كبير جدا على السوشيال ميديا
الدنيا قامت عى السيدة دى من غير ما يعرفوا إنها الراقصة هندية،والهجوم زاد أكتر لما عرفوا إنها فنانة ومشهورة، وقالولها بكرة تترمى نفس الرمية دى بالظبط،ومتلاقيش حد ينقذك.
عارفة إنك عمال تسأل سؤال واحد، هندية مين دى اللى عملت فى كلبها كده؟وإستغربت الإسم صح؟بص يا سيدى لو إنت سنك مش كبير أوى مش هتعرفها عارف ليه؟
علشان هى فنانة وإختفت لفترة طويلة وإعتزلت الفن وإرتدت الحجاب والنقاب كمان ،وكانت متزوجة من رجل الأعمال المشهور أيمن السويدى ،شاركت فى فيلم حنفى الأبهة ودورها فى الفيلم كان سبب كبير فى شهرتها.
والبركة بقى فى برنامج كلام الناس والإعلامية ياسمين عز كعادتها بتستضيف الناس اللى إختفت عن الوسط الفنى وممكن تكون إعتزلت،وده كان بداية ظهورها الحقيقى بقى على السوشيال ميديا
يوم ما رجعت هندية للجمهور،كانت بهجوم كبير جدا منه على السوشيال ميديا بسبب اللى عملته لما ركت الكلب بتاعها وسابته ومشيت ،حتى مصعبش عليها ،كتر خيرها والله شالته وحطتته على الرصيف.الغريب إن كل كلاب الشارع فى قلوبهم رحمة أكتر منها ،إتلموا حوالين الكلب وكإنهم بيواسه.
المفروض بقى بعد إنتشار الفيديو ،تطلع وتهدى من هجوم الجمهور وتتأسف ،وتبرر موقفها بأى كلام فاضى مش معقول ،لكن هى عملت العكس تماما.
وظهرت فى فيديو بث مباشر وبتقول: أه أنا رميت الكلب فى الشارع مين له عندى حاجة؟أنا حرة،عاملين فيها أنكم رحماء، وعندكم رحمة، أنهي رحمة دي؟الرحمة إنكوا تشتموا الناس؟ كنت جيباه من أكتوبر عشان أوديه لـ دكتور هنا، أنتم هتحاسبوني؟ أنا حرة انشروها في كل حتة ودوها الدول العربية والأوروبية أنا حرة.
راسى معلهاش بطحة أنا رقاصة أه بس الناس تشهدلي بالاحترام والأخلاق ،علشان كده عرضت على جمعية الرفق بالحيوان إنها ترجع الكلب تانة ولكن الجمعية رفضت.
وطلعت الرقاصة اللى جواها فى كلامها،ووجهت أبشع ألفاط وكلام حاد جدا للجمهور،وده اللى زود الهجوم عليها من الجمهور وقال يعنى بدل ما تهدى من غضب الجمهور تظهر وتتكلم بالطريقة دى؟
الممثلة والمذيعة السورية، سارة نخلة، نشرت مقطع الفيديو عبر صفحتها الرسمية على “فيسبوك”، وقالت الرقاصة دي اسمها هندية يوم ما كلبها رجله اتكسرت راحت رمته فالشارع مش قادر يتحرك عديمة الضمير ، حسبنا الله ونعم الوكيل ، و ليها عين تشتم و تبجح مع اي حد بيدخل يكلمها،وشكرت اللى أنقذت الكلب ووصلته العيادة للعلاج.
سبحان الله من يومين بالظبط إنتشر فيديو لراجل بيعيط بطريقة هستيرية بسبب كلبه اللى ضاع منه ،وبعد ما لف عليها فى كل حتة وفقد الأمل ،عمل الفيديو دة بيتوسل اللى خد الكلبة يرجعها وياخد مكافأة.
الغريب إن الكلبة بتاعته بتاعنى من نفس المشكلة كسر فى رجليها ،شوف بقى تصرف الراجل العادى من تصرف الفنانة المشهورة،وقال إنه اللي بيعالجها وبياخد باله منها،مش رماها فى الشارع علشان مش ناقص وجع دماغ،وعايز يخلص منها.
وكأن ظهور الواقعتين دول ورا بعض رسالة واضحة لنا ،لو ركزنل فى تفاصيل الحكايتين هنعرف إن الرحمة والعطف ولين القلب مبيطلبوش،جت منك كتر خيرك مجاتش فى ألف حد الخير لسه جواه.
