أثناء إستضافة الفنان أحمد حلمي في برنامج “بعيشها بإنرجي” مع وائل منصور ومنة عامر، عبر إذاعة “راديو إنرجي، كشف السر وراء عدم تقديمه لمسلسلات تليفزيونية.
وقد تحدث أحمد حلمي قائلا: “أنا بحب التليفزيون وجمهوره كبير، لكن أنا محتار عايز أقدم شيء بسيط وسهل وإنك تلاقي شيء جاهز في التليفزيون دا صعب، أن يجيلك حلقات مكتوبة تختار بينها وبين موضوع تاني دا مبيحصلش، الموضوع بنسبة كبيرة منة بيتكتب عشانك، داخلين مسلسل بنقعد ونبدأ نكتب، مش بيتكتب بطريقة السيناريوهات حد بيكتب ويبعتلك عجبك بتعمله، دا بيخليك متقدرش تحكم حكم كامل على الحاجة، بيجيلك معالجة ومتبقاش عارف هيبقى عامل إزاي بعد ما يتكتب”.
وتابع حلمي: “دا اللي أخرني مش عارف ولازم تدخل في السيستم لأن مجهود كبير ومفيش حد هيكتب مسلسل 15 حلقة أو 30حلقة عشان يبتدي يعرضه على مين يعمله، أنا عايز الحاجة تجيلي اقراها وأعجب بيها ومبتجليش عمرها”.
وكشف أنه يتمنى أن يقدم رواية لأنه يعرف بدايتها ونهايتها قائلا: كان نفسي الاقي رواية خلاص قريتها وعرفت بتبدأ منين وتخلص فين والموضوع بيتكلم عن إيه، في روايات كتيرة قريتها بس مش هينفع تتعمل زي “البحث عن جسد” و”نائب عزرائيل” ليوسف السباعي”.
على جانب آخر، كان أحمد حلمي أعلن عن تحضيره لفيلم جديد يتعاون فيه مع زوجته الفنانة منى زكي.
وقال إن الفيلم من تأليفه مشيرا إلى أنه كتب عملين سينمائيين الأول بعنوان “عروس وعريسة” والثاني “وش وضهر” وهو اسم مؤقت للعمل واستغرق تحضيره وكتابته 9 سنوات.
على جانب آخر، يعرض الفنان أحمد حلمي مسرحيته “ميمو” في جدة، ويشارك في بطولتها هنا الزاهد، أحمد رزق، حمدي المرغني، محمد رضوان، جيلان علاء، نور إيهاب، إنتاج كرافت ميديا، تأليف ضياء محمد، إخراج هشام عطوة.
